Liv Zèv Apot Yo
Chapit 5
Klike la pou koute lekti chapit sa1
Men, yon nonm yo te rele Ananyas, ak madanm li, Safira, te vann yon pwopriyete,
2
epi li sere yon pati nan pri a, madanm nan te okouran de sa tou; lèfini, misye pote yon pòsyon nan lajan an, e li depoze l nan pye apot yo.
3
Men, Pyè di konsa: Ananyas, poukisa Satan ranpli kè w pou w bay Lespri Sen an manti, epi pou w sere yon pòsyon nan pri teren an?
4
Lè li te rete la a, èske se pa pou ou l te ye? Epi, lè li te fin vann, èske se pa sou pouvwa pa w li te ye? Poukisa w al manniganse plan sa a nan kè w? Se pa moun ou bay manti non, men, se Bondye.
5
Alèkile, yon fwa Ananyas tande pawòl sa yo, li tonbe atè, epi li mouri. Alò, yon gwo laperèz tonbe sou tout moun ki te tande bagay sa yo.
6
Ansuit, kèk jenn gason leve, yo vlope kò l, epi yo pote l ale, e yo antere l.
7
Epi, se nan espas twazèdtan konsa apre, ke madanm misye ki pa t konnen sa k te pase a, vin rantre.
8
Alò, Pyè reponn li: Di m non, se te a tèl pri nou te vann teren an? Epi, manzè di: Wi, se a pri sa a.
9
Lè sa a, Pyè di li konsa: Kijan fè nou antann youn ak lòt pou nou tante Lespri Senyè a? Gade, pye sila ki sot antere mari w yo nan papòt la, e yo va tou mennen w ale.
10
Epi, manzè tonbe atè dwat devan pye misye, epi l mouri. Apre sa, jenn gason yo vini, yo jwenn li mouri, epi yo pote l ale, yo antere l akote mari li a.
11
Se gwo laperèz ki te tonbe sou tout legliz la ak sou tout moun ki te tande bagay sa yo.
12
E konsa, te gen anpil mirak ak mèvèy ki t ap fèt nan mitan pèp la; pa mwayen men apot yo; (e, yo tout te la nan tèt ansanm nan Galeri Salomon an.
13
E, pami rès moun yo, pèsonn pa t pran chans vin jwenn yo; men, pèp la t ap fè louwanj pou yo.
14
Ansuit, moun ki kwè yo t ap ogmante plis toujou an kantite nan Senyè a; fi kou gason);
15
Sitèlman, ke yo t ap pote moun malad soti nan lari, epi yo te depoze yo sou kabann ak branka, pou ke menm lonbraj Pyè te ka pase sou kèk pami yo.
16
Te gen yon bann nan yo ki te soti nan vil alantou Jerizalèm yo; yo te pote moun malad vini, ansanm ak moun ki te toumante pa move lespri; e, yo tout te geri.
17
Alèkile, sakrifikatè souvren an leve kanpe, e tout moun ki te avè l yo tou (yo menm ki te fè pati de sèk Sadiseyen an) yon sèl kòlè te monte yo.
18
Alò, yo met men sou apot yo; lèfini, yo fèmen yo nan prizon piblik la.
19
Men, nan mitan lannuit lan, zanj Senyè a louvri pòt prizon an e mennen yo deyò; epi, li di yo:
20
Ale, kanpe nan lakou tanp lan, anonse pèp la tout pawòl lavi sa a.
21
Konsa, lè yo tande sa, yo antre nan lakou tanp lan byen bonè nan maten, e yo anseye moun yo. Alòske, sarifikatè prensipal la te vini ak moun ki te avè l yo, epi yo te reyini Konsèy la ansanm ak tout asanble Ansyen pami pitit Izrayèl yo; epi, yo voye al nan prizon an pou mennen prizonye yo vini.
22
Men, lè ofisye yo rive, epi, yo pa jwenn yo nan prizon an, yo tounen, e yo di yo sa.
23
Yo fè deklarasyon pou di: Vremanvre, nou jwenn prizon an byen fèmen ak tout sekirite l, ak gad yo kanpe pa deyò, devan pòt yo. Epoutan, lè nou louvri pòt yo, nou pa jwenn pèsonn moun anndan an!
24
Alèkile, lè sakrikatè prensipal la ak kòmandan tanp lan ak sakrifikatè anchèf yo tande bagay sa yo, yo pa t konnen sa pou panse de apot yo, epi, yo t ap mande jis ki kote bagay sa a t ap rive.
25
Lè sa a, gen yon moun ki vin di yo: Gade, mesye nou te mete nan prizon yo, men yo kanpe nan tanp lan ap anseye pèp la.
26
Lè sa a, kòmandan an ak ofisye yo ale, epi yo mennen mesye yo vini san vyolans, paske yo te pè pou sa pa t rive ke pèp la kalonnen yo ak wòch.
27
Epi, lè yo te fin mennen yo, yo mete yo kanpe devan Konsèy la; alò, sakrifikatè souvren an mande mesye yo,
28
li di: Èske nou pa t pase n lòd fòmèl ke nou pa gendwa anseye nan non sa a? Alòske, gade, nou fin anvayi Jerizalèm ak ansèyman nou an; lèfini, nou vle lage chay san nonm sa a sou do nou menm chèf yo.
29
Lè sa a, Pyè ak lòt apot yo reponn, yo di: Se Bondye, olye de lèzòm, ke nou dwe obeyi.
30
Bondye zansèt nou yo te resisite Jezi ke nou te tiye lè nou te pann Li sou bwa a.
31
Se Li menm ke ak men dwat Li, Bondye leve anlè pou L vin yon Prens ak yon Sovè pouke L bay Izrayèl repantans ak padon peche.
32
E konsa, nou se temwen bagay sa yo, e Lespri Sen an se temwen tou; Li menm ke Bondye te bay moun ki te obeyi Li yo.
33
Lè yo tande sa, kè yo t ap fann, e konsa, yo pran desizyon pou tiye yo.
34
Lè sa a atò, youn nan manm konsèy la leve kanpe, se te yon Farizyen, ki rele Gamalyèl, yon pwofesè lalwa ki te gen bon jan repitasyon pami tout pèp la; epi, li bay lòd pou deplase yon ti moman ak apot yo.
35
Epi, li di yo konsa: Nou menm gason Izrayelyen yo, fè atansyon ak tèt nou ak lide sa a ke n genyen pou manyen mesye sa yo.
36
Paske, anvan jou n ap viv la a yo, Tedas te kanpe, li t ap fè grandizè kòmkwa se yon gwo zafè l te ye; e, te gen yon kantite moun, katsan konsa, ki t al asosye avè l. Men, lè yo te tiye misye, tout kantite moun ki t ap suiv li yo, yo tout te gaye, epi yo pa vin reprezante anyen.
37
Apre misye, te gen Jida, moun Galile, ki te leve nan epòk resansman an, e misye te rale anpil moun dèyè l; li menm tou, li te peri, e tout moun ki t ap suiv li yo te gaye.
38
Kounye a la a, men sa m ap di nou: kanpe lwen mesye sa yo; epi, kite yo trankil; paske, si plan sa a, oswa travay sa a, se nan lèzòm li soti, li p ap vin reprezante anyen;
39
men, si se nan Bondye l soti, nou pa ka elimine l. Pa kite sa rive pou nou ta twouve ap konbat kont Bondye.
40
Alèkile, yo dakò ak misye; e, apre ke yo fin rele apot yo, e ke yo fin bat yo, yo ba yo lòd pou yo pa pale nan non Jezi, lèfini, yo kite yo ale.
41
Konsa donk, apot yo soti devan Konsèy la, yo t ap rejwi difèt ke yo te merite pouke yo sibi imilyasyon pou non Jezi.
42
Apre sa, yo pa t sispann anseye e preche Jezi Kris chak jou, nan tanp lan ak nan tout kay yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!