Liv Zèv Apot Yo
Chapit 6
Klike la pou koute lekti chapit sa1
Nan jou sa yo, pandan ke kantite disip yo t ap miltipliye, te vin gen yon wounou wounou ki leve lakay Elenis yo kont Ebre yo, palefèt ke vèv pa yo te neglije nan separasyon ki t ap fèt chak jou a yo.
2
Alò, Douz yo rele tout lòt disip yo vin jwenn yo, epi yo di: Pa gen rezon pou nou kite Pawòl Bondye a pou n ap sèvi tab.
3
Konsa donk, frè yo, chèche sèt gason nan pami nou la a, nonm ki gen repitasyon onèt, ki ranpli ak Lespri Sen, ak sajès, pou nou mete anchaj travay sa a.
4
Men, nou menm Douz yo, nou va kontinye pèsevere nan lapriyè e ak nan sèvis Pawòl Bondye a.
5
E, pawòl sa a te fè tout bann moun yo plezi; kidonk, yo chwazi Etyèn, yon nonm plen ak lafwa e ak SentEspri a, ak Filip, ak Pwokò, ak Nikanò, ak Timon, ak Pameras, e ak Nikola, yon pwozelit ki te moun Antyòch.
6
Se yo menm ke moun yo te met kanpe devan apot yo; e, lè sa a, apot yo lapriyè, e poze lamen sou tèt mesye yo.
7
Epi, Pawòl Bondye a t ap vale teren, epi, kantite disip yo t ap miltipliye anpil nan Jerizalèm; e yon bon kou nan sakrifikatè yo t ap obeyi lafwa a.
8
E, Etyèn, ki te plen ak lafwa ak puisans, t ap fè gwo mèvèy ak mirak pami pèp la.
9
Se konsa te vin gen yon gwoup nan sinagòg ki te rele Sinagòg Afranchi yo, met ansanm ak sa ki te soti Sirèn, Aleksandri, Sisili, ak ann Azi yo, ki ye pete yon diskisyon ak Etyèn.
10
E, yo p at an mezi fè ankenn replik a sajès e a Lespri a ki t ap pale nan li a.
11
Alò, yo kowonp kèk moun ki vin di: Nou te tande nonm sa a ap di pawòl ki denigran kont Moyiz ak kont Bondye!
12
Epi yo soulve pèp la, ak Ansyen yo, e ak pwofesè lalwa yo. Lèfini yo mache sou misye, yo met lamen sou li epi yo mennen l bay Konsèy la.
13
Apre sa yo met fo temwen kanpe, e ki di: Nonm sa a pa sispann di yon rado pawòl kont kote ki sen an ak kont lalwa a;
14
paske nou te tande l ap di ke Jezi Moun Nazarèt sa a va detwi plas sa a, e Li va chanje koutim ke Moyiz te anseye nou yo.
15
Lè sa a yo tout ki te chita nan Konsèy la fikse je yo sou misye, yo te wè figi l tankou figi yon zanj.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!