Liv Zèv Apot Yo
Chapit 7
Klike la pou koute lekti chapit sa1
Lè sa a, Sakrifikatè souvren an di: Èske sa y ap di la a yo, se vre?
2
Alò, Etyèn reponn: Mesye yo, frè yo, ak gran paran yo, koute: Bondye laglwa a te parèt devan papa nou Abraram lè misye te Mezopotami, anvan ke l t al rete Karan an,
3
epi Li te di misye konsa: Soti deyò peyi w, ale kite fanmi w, epi vin nan peyi ke Mwen va montre w la.
4
Alèkile, Abraram soti nan peyi Kaldeyen yo, epi l al rete Karan. Epi, de la etan, lè papa l mouri, Bondye wete misye la pou l vin nan peyi kote n ap viv la a kounye a.
5
Men, Bondye pa t ba l ankenn eritaj nan peyi a; non, pa menm yon kote pou misye ta poze pye l sou li. Poutan, Bondye te pwomèt misye ke L ap fè l posede peyi a, li menm ak desandan l yo, alòske li patko gen pitit.
6
Bondye te pale konsa: ke desandan misye yo t ap gen pou yo te depasaj nan yon peyi etranje; epi, ke yo t ap fòse yo nan lesklavaj, e maltrete yo pandan katsanzan.
7
E, nasyon sa a ke yo va esklav li a, Bondye di: Mwen va jije l; lèfini, yo va retounen vini, epi y a va sèvi Mwen isit la.
8
Apre sa, Li te bay Abraram alyans sikonsizyon an. Se konsa ke Abraram te fè Izarak, epi li te sikonsi l nan uityèm jou a; epi, Izarak fè Jakòb; e Jakòb fè douz patriyach yo.
9
Ansuit, poutèt patriyach yo te anvye sò Jozèf, yo te vann misye pou l al ann Ejip; men, Bondye te avèk li,
10
e te delivre l anba tout tribilasyon l yo; epi, Li te ba l privilèj ak sajès nan je Farawon, wa Ejip la, ki te tabli Jozèf kòm gouvènè sou peyi Lejip ak sou tout lakay li.
11
Alèkile, te vin gen yon famin nan tout peyi l Ejip la e nan Kanaran, avèk anpil detrès; e, zansèt nou yo pa t jwenn manje.
12
Men, lè Jakòb aprann ke te gen ble ann Ejip, li voye zansèt nou yo yon premye fwa.
13
Epi, sou dezyèm fwa a, Jozèf te fè frè li yo rekonèt se li; se konsa Farawon te vin konn fanmi Jozèf.
14
Apre sa, Jozèf voye rele papa l vin jwenn li, ansanm ak tout fanmi l yo; yo te swasannkenz moun.
15
Donk, Jakòb te ale ann Ejip; epi, se la li mouri, li menm ak zansèt nou yo.
16
E, yo te mennen yo ale nan Sichèm, kote yo te mete yo nan kavo Abraram te achte nan men pitit gason Amò yo, papa Sichèm.
17
Men, lè tan pou pwomès la akonpli a te pre rive, pwomès Bondye te fè Abraram nan, pèp la te grandi e l te ogmante ann Ejip,
18
jis lè yon lòt wa te vin monte, youn ki pa t konn Jozèf.
19
Se menm wa sa a ki te twonpe fanmi nou yo, e ki te maltrete zansèt nou yo, ansòt ke yo te ekspoze tibebe yo, pou anpeche ke yo te viv.
20
Se nan epòk sa a ke Moyiz te fèt; e, se pa ti bèl li te bèl; e, yo te kenbe l ap nouri li lakay papa l pandan twa mwa.
21
Epi, lè yo te vin ekspoze li, pitit fi Farawon an te ale avè l, e li te pran swen l tankou pwòp pitit gason pa l.
22
Se konsa ke Moyiz te enstwi nan tout lasyans Ejipsyen yo; epi, misye te vin yon nonm puisan e nan pawòl, e nan zak.
23
Alèkile, lè misye te vin gen karantan, lide a antre nan kè l pou l al vizite frè l yo, pitit Izrayèl yo.
24
Epi, lè l te gade wè youn nan yo ke yo t ap fè pase mizè, li pran defans li, e, li tire revanch pou nonm yo t ap malmennen an; lèfini, li tiye Ejipsyen an;
25
avredi, misye te sipoze ke frè l yo t ap konprann kijan ke se ak men pa l ke Bondye ta pral libere yo; men, yo pa t konprann sa.
26
Epi, nan demen, li parèt bò kote yo a, kòm yo t ap batay, li te vle met lapè nan mitan yo, li di: Mesye, se frè nou ye, pouki youn ap fè lòt mal?
27
Men, sila ki te fè pwochen l mal la, pouse Moyiz sou kote, epi l di: Kiyès ki fè w vin yon chèf ak yon jij sou tèt nou an?
28
Èske w vle tiye m menm jan w te tiye Ejipsyen an yè a?
29
Lamenm, Moyiz te bwaze lè l tande sa; epi misye al viv kòm etranje nan peyi Madyan, kote l te fè de pitit gason.
30
Apre ke karantan te fin pase, te gen yon zanj Senyè a ki te parèt devan li nan dezè mòn Sinayi a, nan yon flanm dife ki te pran anndan yon touf bwa.
31
Lè Moyiz te wè li, misye te sezi wè sa ki te parèt devan l lan; epi, li vanse pi pre pou l gade l; e, vwa Senyè a te vin jwenn li;
32
Li di: Mwen se Bondye zansèt ou yo, Bondye Abraram nan, ak Bondye Izarak la, ak Bondye Jakòb la! Alò, Moyiz te pran tranble, e li pa t pran chans pou l gade.
33
Lè sa a, Senyè a di misye konsa: Wete soulye w yo nan pye w, paske kote w kanpe a se tè ki sen.
34
Mwen te wè, wi M te wè tribilasyon pèp Mwen an ki ann Ejip la; e, Mwen te tande plenn li yo; donk, Mwen desann vin delivre yo. Kounye a la a, vini non, Mwen pral voye w ann Ejip.
35
Moyiz sa a ke yo te rejte a, lè yo te mande: Kiyès ki te fè w vin yon chèf ak yon jij sou tèt nou an? Se li menm,
36
ki te mennen yo soti, apre ke l te fin montre mirak ak mèvèy nan peyi l Ejip, e nan Lamè Wouj, e nan dezè a pandan karantan.
37
Se Moyiz sa a ki te deklare ba pitit Izrayèl yo: A va gen yon Pwofèt ke Senyè a, Bondye nou an ap leve kanpe ban nou nan pami frè nou yo, tankou mwen menm; nou va koute Li.
38
Se Moyiz sa a ki te nan asanble nan dezè a ak zanj ki t ap pale avè l nan Mòn Sinayi a, e, ki ansanm ak zansèt nou yo, te resevwa tout pawòl vivan yo, epi pou ban nou yo.
39
Se li ke zansèt nou yo pa t vle obeyi a; okontrè yo te pouse l soti sou yo, lèfini, nan kè yo, se te ann Ejip yo te retounen,
40
yo t ap di Arawon: Fè bondye ki pou mache devan nou non; paske, nonm Moyiz sa a, ki te mennen nou soti kite peyi l Ejip la, nou pa konn sa l devni.
41
Se konsa yo te fè yon ti towo nan jou sa yo; epi, yo te ofri sakrifis bay zidòl la, e yo te rejwi poutèt zèv ke pwòp men pa yo te fè a.
42
Alò, Bondye vire do L, epi Li lage yo pou yo sèvi lame nan syèl yo; jan sa te ekri nan liv pwofèt yo: O, moun lakay Izrayèl yo, èske nou te ofri M bèt nou tiye, e sakrifis pandan karantan nan dezè a?
43
Sa nou te fè, se pote nou te pote tabènak Molòk la, avèk zetwal Ranfan an, bondye nou an; se imaj sa yo nou te fè pou nou te adore yo; konsa donk, M ap trennen nou ale depase Babilòn.
44
Zansèt nou yo te gen tabènak temwayaj la nan dezè a, jan ke Sila ki te pale ak Moyiz la te vle l la, lè Li te di misye ke l va konstwi l dapre menm modèl ak sa ke l te wè a.
45
Se tabènak sa a ke zansèt nou ki te vin apre yo te pote l ale ansanm ak Jozye nan peyi Payen yo ke Bondye te chase devan zansèt nou yo a, jis rive nan tan David;
46
li menm ki te jwenn favè devan Bondye, e ki te gen dezi pou l te bati yon tabènak pou Bondye Jakòb la.
47
Men, se Salomon ki bati yon kay pou Li.
48
Atousa, Bondye Pi Wo a pa abite nan tanp ke men lèzòm fè, jan pwofèt la di l la:
49
Se syèl la ki twòn Mwen, epi latè a se machpye Mwen; ki kay ke w pral bati pou Mwen? Bondye mande; oubyen, ki kote M ta itilize pou repo Mwen?
50
Èske se pa men Mwen ki kreye tout bagay sa yo?
51
Bann moun tèt di, ki ensikonsi e nan kè, e nan zòrèy, nou toujou la pou n reziste Lespri Sen an, sa zansèt nou yo te fè a, se sa nou fè tou.
52
Kiyès nan pwofèt yo zansèt nou yo pa t pèsekite? Epi yo te asasinen moun yo ki t ap anonse davans vini Sila ki Jis la gen pou vini an; Li menm ke kounye a, nou se moun ki trayi Li yo e ki asasinen L yo;
53
nou menm ki te resevwa lalwa a pa mwayen zanj, e ki pa t kenbe l.
54
Lè yo te tande pawòl sa yo, yon sèl kòlè anvayi kè yo, e yo t ap manje dan kont misye.
55
Men li menm, kòm li te ranpli ak Lespri Sen an, li te fikse je l anlè nan syèl la, epi li wè glwa Bondye, ak Jezi ki te kanpe sou lamen dwat Bondye;
56
epi, li di: Gade, men mwen wè syèl yo louvri, epi Pitit Gason Lòm nan ki kanpe sou lamen dwat Bondye.
57
Lè sa a, yo pran rele ak yon vwa byen fò; epi, yo bouche zòrèy yo; lèfini, yo tout fonse sou li an menm tan.
58
Apre sa, yo trennen l soti nan vil la, epi yo kalonnen l ak wòch; e, temwen yo te depoze rad yo devan pye yon jennonm ki te rele Sòl.
59
E, yo t ap kalonnen wòch sou Etyèn, ki li menm t ap fè apèl a Bondye, li t ap di: Senyè Jezi, resevwa lespri mwen!
60
E, li te mete l ajenou; epi li rele ak yon vwa byen fò: Senyè, pa lage peche sa a sou kont yo. E, apre ke l fin di sa a, li dòmi.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!