Liv Zèv Apot Yo
Chapit 11
Klike la pou koute lekti chapit sa1
Epi, apot yo ak frè yo ki te nan Jide yo te tande ke Payen yo te resevwa Pawòl Bondye a tou.
2
Se konsa ke lè Pyè vin monte Jerizalèm, mesye nan gwoup moun sikonsizyon yo antre nan diskisyon avè l,
3
yo di: Ou te antre lakay ensikonsi; lèfini, ou te manje ak yo!
4
Men, Pyè reprann istwa a depi nan kòmansman, epi, li eksplike yo li nan lòd sa te fèt la; li di:
5
Mwen te nan vil Jope, m t ap lapriyè; epi, nan yon ekstaz, mwen fè yon vizyon; yon sòt de aparèy t ap desann, ou ta di yon gwo dra ki sot nan syèl pa kat pwent, epi l vin kote m nan menm.
6
E, anndan li, lè m fikse je m sou li, mwen byen gade, e m wè bèt kat pat sou latè, ak zannimo sovaj, ak bagay k ap ranpe, e ak zwazo nan syèl la.
7
Ansuit, m tande yon vwa ki di m konsa: Leve non, Pyè; tiye, epi manje!
8
Men, m reponn: O non, pa konsa Senyè! Paske anyen ki sal oswa pa pwòp pa antre nan bouch mwen okenn lè.
9
Men, vwa a reponn mwen ankò de anlè nan syèl la: Sa ke Bondye rann pwòp, pinga w rele l pa pwòp.
10
E, sa te rive twa fwa; apre sa, tout bagay te remonte nan syèl ankò.
11
Epi, vwala ke lamenm, te gentan gen twa zòm ki te vin nan kay kote m te ye a, ke yo te voye bò kote m soti Sezare.
12
Alò, Lespri a rekòmande m pou m ale avèk yo san doute. Anplis de sa, sis frè sa yo te akonpaye m; epi, nou antre lakay nonm nan.
13
Se konsa ke li esplike nou kijan l te wè yon zanj lakay li a, ki te kanpe e ki te di li: Voye kèk moun al Jope, fè rele Simon, ki gen ti non Pyè a;
14
se li ki va di w pawòl, k ap pèmèt ke ou menm ak moun lakay ou yo va sove.
15
Epi, pandan m te kòmanse pale, Lespri Sen tonbe sou yo, tankou Li te tonbe sou nou okòmansman an.
16
Lè sa a, mwen sonje pawòl Senyè a, kouman Li te di: Se vre, se avèk dlo ke Jan te batize; men nou menm, se avèk Lespri Sen an ke yo va batize nou.
17
Konsa donk, kòm Bondye ba yo menm kado Li te ban nou an, ki te kwè nan Senyè Jezi Kris yo; kisa m te ye pou m ta ka reziste ak Bondye?
18
Lè yo tande bagay sa yo, yo fèmen bouch yo; lèfini, yo glorifye Bondye, yo di: Alò, se vre ke Bondye fè Payen yo kado repantans ki mennen a lavi a tou!
19
Kounye a la menm, sila yo ki te pran rak akòz pèsekisyon ki te leve poutèt Etyèn nan, yo te vwayaje ale jis rive Fenisi, Chip, ak Antyòch; yo t ap preche Pawòl la bay okenn lòt moun eksepte Juif yo sèlman.
20
Men, kèk nan yo te moun Chip ak Sirèn; yo menm, lè yo te rive Antyòch, yo te pale ak Grèk yo, yo te preche Senyè Jezi.
21
E, men Senyè a te avèk yo, ki fè ke yon gran kantite moun te kwè, e yo te vire vin jwenn Senyè a.
22
Alò, nouvèl bagay sa yo rive nan zòrèy legliz ki te Jerizalèm lan; epi, yo voye Banabas ale pou li travèse rive jis Antyòch.
23
Misye li menm, lè l vini, e ke l te wè gras Bondye, li te kontan; e, li te egzòte yo tout pou ke se ak tout kè yo ke yo dwe kenbe la ak Senyè a.
24
Paske avredi, misye te yon moun debyen, ki te ranpli ak Lespri Sen, e plen ak lafwa; e, bonkou moun anplis te vin nan Senyè a.
25
Apre sa, Banabas pati al Tas, pou li chèche Sòl.
26
E, lè l fin pa jwenn misye, li mennen misye al Antyòch. Epi, sa rive ke yo met tèt yo ansanm ak legliz la pandan yon lane, e yo te anseye anpil moun. E, se Antyòch an premye ke yo te bay disip yo non Kretyen an.
27
E, nan jou sa yo, te gen pwofèt soti Jerizalèm ki te vin Antyòch.
28
Epi, youn nan yo ki te rele Agabis te kanpe, e li fè konnen dapre Lespri a ke pral gen yon gwo famin toupatou nan lemonn; sa ki te rive nan tan sou Klod Seza.
29
Alò, disip yo te deside, chak gason dapre mezi li kapab, pou yo voye pwovizyon bay frè ki te abite nan Jide yo;
30
sa tou ke yo te fè; e, yo te remèt li nan men Banabas ak Sòl, yo te voye l bay ansyen yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!