Liv Zèv Apot Yo
Chapit 12
Klike la pou koute lekti chapit sa1
Alèkile, vè epòk sa a, Ewòd, wa a, te lonje men l pou li maltrete kèk manm legliz la.
2
Se konsa li tiye Jak, frè Jan an ak kout epe.
3
Epi, difèt ke misye te wè ke sa te fè Juif yo plezi, li t al pi lwen ke sa toujou, li te fè arete Pyè tou. (Lè sa a, 'jou pen san ledven yo' te vin rive).
4
Alò, lè misye te arete l la, li te mete l nan prizon; epi, li te livre nan men kat eskwad fòme ak kat sòlda chak, pou gade li; entansyon misye se te pou ke apre Pak, li te fè l konparèt devan pèp la.
5
Kidonk, Pyè te ret nan prizon; men, lapriyè Bondye san rete t ap fèt nan legliz la pou li.
6
Se konsa ke lè Ewòd ta pral fè misye konparèt la, nan menm lannuit sa a, Pyè t ap dòmi nan mitan de sòlda; li te mare ak de chenn; lèfini, gad yo ki veye prizon an te kanpe devan pòt la.
7
Epi, men li, zanj Senyè a vin parèt sou li; e yon limyè klere anndan prizon an; apre sa, li teke Pyè bò kòt li, li reveye misye, li di: Leve kanpe vit! Epi, chenn nan men li yo sot tonbe.
8
Ansuit, zanj lan di misye: Met sentiwon w sou ou, epi mare sandal ou. Alò, Pyè fè sa. Epi, zanj lan di l konsa: Met rad ou sou ou, epi suiv mwen.
9
Epi, Pyè soti, li suiv li; misye pa t kwè ke sa zanj lan te fè a se te yon bagay tout bon; li te panse se te yon vizyon ke l te wè.
10
Lè yo te fin pase premye ak dezyèm gwoup gad yo, yo vin rive sou pòtay an fè ki bay sou lavil la; pòtay la louvri pou kò l ba yo pase; epi, yo sot deyò, yo travèse yon riyèl, epi lamenm, zanj lan disparèt devan misye.
11
Alò, lè Pyè vin pran kap li, misye di: Kounye a mwen konnen tout bon vre ke se Bondye ki te voye zanj Li a, e ke Li delivre m anba men Ewòd ak tousa pèp Juif la t ap atann ki va rive yo.
12
E, lè li reflechi sou sa, l ale lakay Mari, manman Jan ki te gen ti non Mak la; anpil moun te reyini la, yo t ap lapriyè ansanm.
13
Epi, lè Pyè frape nan pòt baryè a, yon demwazèl ki te rele Wod te vin reponn.
14
Men, lè li rekonèt vwa Pyè, li si tèlman kontan ke li pa louvri pòt baryè a non, men, se kouri l kouri rantre pou l al di, men Pyè twouve kanpe devan baryè a.
15
Alò, yo di li: Ou pa byen nan tèt! Men, li pèsiste di yo ke se te tout bon vre. Lè sa a, yo di: Se zanj misye!
16
Men, Pyè kontinye frape; kidonk, lè yo te louvri pòt la, epi yo wè misye, yo te sezi.
17
Men, misye li menm fè yo siy ak men li pou yo pe, epi, li rakonte yo kouman Senyè a te mennen l soti kite prizon an. Lèfini, li di: Ale anonse bagay sa yo bay Jak ak frè yo. Apre sa, li soti, l al yon lòt kote.
18
Kounye a menm, depi l te fè jou, se pa t nan ti tèt chaje sòlda yo te ye, pou yo konnen sa ki te pase ak Pyè.
19
Epi, lè Ewòd te voye chèche misye, lèfini yo pa jwenn li an; li kesyone gad yo; apre sa, li bay lòd pou kondane yo amò. Ansuit, li desann kite Jide pou l ale Sezare, e se la ke l t al abite.
20
Ewòd te fache anpil kont moun Tyr ak moun Sidon yo; men, yo te mete tèt yo ansanm pou vin kote li; e, difèt ke yo te fè Blastis, ofisye desèvis nan chanm wa a, vin yon zanmi pou yo; yo te chèche fè lapè, paske se peyi wa a ki te ba peyi pa yo manje.
21
Nan yon jou ke yo te anonse, Ewòd abiye l ak rad wayal li, epi li chita sou twòn li; lèfini li fè yon diskou pou yo.
22
Lè sa a, pèp la bay yon rèl, yo di: Sa a, se vwa yon bondye l ye, se pa vwa yon moun.
23
Epi lamenm, zanj Senyè a frape misye, paske se pa Bondye misye te bay glwa a; e, vè te manje misye; epi, li bay dènye souf li.
24
Men, Pawòl Bondye a t ap grandi, e li t ap vale teren.
25
Ansuit, Banabas ak Sòl pati kite Jerizalèm lè yo te fin akonpli misyon yo an; epi, yo te pran Jan avèk yo, sila a ki te gen ti non Mak la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!