Liv Zèv Apot Yo
Chapit 13
Klike la pou koute lekti chapit sa1
Alèkile menm, nan legliz ki te Antyòch la te gen yon rado pwofèt ak anseyan; tankou Banabas, ak Simeyon ki te rele Nèg, ak Lisiyis moun Sirèn, ak Manayèn ki te elve ak Ewòd tetrak la, e ak Sòl.
2
Pandan ke yo t ap fè sèvis pou Senyè a, e ke yo t ap jene, Lespri Sen an di: Mete Banabas ak Sòl apa pou Mwen, pou travay sa ke Mwen te fè yo apèl pou li a.
3
Alò, lè yo te fin lapryè ak jene, epi ke yo te poze lamen sou de mesye yo, yo voye yo ale.
4
Konsa donk, yo menm ke Lespri Sen an te voye a, yo pati y al Selisi, epi de la etan yo pran bato pou y al Chip.
5
E, lè yo te rive Salami, yo preche Pawòl Bondye a nan sinagòg Juif yo; epitou, yo te gen Jan kòm èd yo.
6
Ansuit, lè yo te fin ap pase zile a jis yo rive Patòs, yo rankontre yon majisyen, yon fo pwofèt, yon Juif, non li se te Bajezi;
7
misye te ak delege an chèf zòn nan, Sèjiyis Polis, yon nonm lespri, li te fè rele Banabas ak Sòl, li te vle tande Pawòl Bondye a.
8
Men Elimas, majisyen an, (paske se sa non misye vle di lè w tradi li) te reziste ak yo, li t ap chèche yon jan pou detounen delege anchèf la de chemen lafwa a.
9
Alò Sòl, (ki te rele Pòl tou), ki te ranpli ak Lespri Sen an, fikse je l sou misye,
10
epi, li di: Ou plen ak malis ak magouy; ou menm pitit dyab la, ou menm ki se lènmi tousa ki jis, èske w p ap sispann pèvèti tout chemen dwat Senyè a?
11
Ebyen kounye a, gade non, men Senyè a tonbe sou ou, e ou va avèg, ou p ap wè solèy la pandan yon tan. Epi lamenm, gen yon lonbraj ak yon tenèb ki tonbe sou misye; epi, misye t ap mache chèche moun pou kenbe men l kondui li.
12
Alò, depite a, lè li wè sa k te fèt la, misye kwè, difèt ke l te sezi akòz ansèyman Senyè a.
13
Alèkile, lè Pòl ak konpayon l yo kite Pafòs, yo te vin rive Pèj, nan Panfili; epi, Jan t al kite yo pou li retounen Jerizalèm.
14
Men, lè yo te pati kite Pèj, yo te vin rive Antyòch, nan Pisidi; lèfini, jou Saba a, yo rantre nan sinagòg la, epi yo chita.
15
Apre ke lekti liv lalwa a ak pwofèt yo te fin fèt, dirijan sinagòg yo voye rele yo, yo di: Nou menm mesye frè yo, si nou gen kèk pawòl egzòtasyon pou pèp la, nou mèt pale wi!
16
Lè sa a, Pòl kanpe; e, anmenm tan l t ap fè siy ak men li, li di konsa: Nou menm moun Izrayèl yo, e nou menm ki gen krentif pou Bondye, koute non!
17
Bondye pèp Izrayèl sa a te chwazi zansèt nou yo; epi, Li te beni pèp la lè yo te rete kòm etranje nan peyi l Ejip; Ansuit, se te ak fòs ponyèt Li ke Li te fè l soti la.
18
E, se konsa ke pandan karantan, Li te tolere zak yo te fè nan dezè a.
19
Apre sa, lè Li te fin detwi sèt nasyon nan peyi Kanaran, Li te divize peyi a an moso bay zansèt nou yo.
20
Lèfini, Li te mete jij sou tèt yo pandan katsan senkantan, jis rive sou pwofèt Samyèl.
21
Alèkile, yo di ke yo vle yon wa. Konsa, Bondye ba yo Sayil pandan karantan, pitit gason Kis la, yon nonm nan tribi Benjamen an.
22
Apre, lè Li te vin wete misye, Li te leve David kanpe pou li vin wa yo; se sou misye ke Li te bay temwayaj, Li te deklare: Mwen jwenn David, pitit gason Izayi a, se yon nonm ki annakò ak kè Mwen, li va fè tousa M vle.
23
Se nan desandans nonm sa a ke Bondye, dapre pwomès ke L te fè, te leve yon Sovè kanpe pou Izrayèl: Jezi!
24
Jan t ap preche batèm repantans lan bay tout pèp Izrayèl la depi anvan ke Jezi te parèt.
25
E se konsa ke lè Jan t ap fini ak wout ke l te gen pou l fè a, li te mande: Kiyès nou panse ke m ye? Se pa Li mwen ye! Men, gade non, gen youn k ap vin apre m; Li menm, mwen pa merite delase soulye nan pye Li.
26
Mesye frè yo, pitit desandan Abraram yo, sila ki pami nou yo ki gen krentif pou Bondye yo, se ban nou yo voye pawòl sali nanm sa a.
27
Paske moun ki ret Jerizalèm yo ansanm ak chèf yo, difèt ke yo pa t konnen Li, nitou ke yo pa t konn vwa pwofèt yo ke yo li chak jou Saba yo, se konsa yo te akonpli pawòl sa yo, lè yo te kondane Li a.
28
E, atout yo pa t jwenn ankenn rezon nan Li ki ta ka merite lanmò, yo te vle pou Pilat fè tiye Li.
29
Epi, lè yo te fin akonpli tousa ki te ekri sou Li yo, yo te desann Li sot sou bwa a, epi yo te depoze L nan yon tonm.
30
Men, Bondye te resisite L pami mò yo.
31
E, moun ki te sot Galile vin Jerizalèm avèk Li yo te wè Li pandan plizyè jou; se yo ki temwen Li devan pèp la.
32
E, n ap anonse nou Bòn Nouvèl la, kòman ke pwomès sa a ki te fèt bay zansèt nou yo,
33
se li menm ke Bondye akonpli pou nou menm pitit yo, palefèt ke Li te resisite Jezi ankò; tankou sa ekri nan dezyèm Sòm nan: Ou se Pitit Gason Mwen an; jodi a Mwen ba W nesans.
34
Epi, konsènan lefèt ke se resisite Li te resisite L pami mò yo, pouke kounye a atò kò Li pa ka wè pouriti ankò; men sa L te di sou sa: M ap ba W tout mizerikòd David yo; sila ki asire yo.
35
Kidonk, Li te di tou nan yon lòt Sòm: Ou p ap pèmèt Sila ki Sen W nan rive wè pouriti.
36
Alòske, David, lè li te fin sèvi nan jenerasyon li a dapre volonte Bondye, li te mouri, e yo te antere l avèk zansèt li yo; e, kò li te wè pouriti.
37
Men, Sila ke Bondye resisite ankò a pa t wè pouriti.
38
Kidonk, mesye ak frè yo, nou dwe konnen ke se pa mwayen Nonm sa a ke yo preche padon pou peche ban nou.
39
E, se pa mwayen Li menm ke tout moun ki kwè yo jistifye nan tout bagay ke moun pa t kapab jistifye pa mwayen lalwa Moyiz la.
40
Konsa donk, fè atansyon pou sa ke pwofèt yo te di a pa rive nou:
41
Gade non, nou menm mokè, ret sezi, lèfini peri; paske, Mwen gen pou M fè yon travay nan jou nou yo, se yon travay nou p ap janm rive kwè menmsi yon moun ta rakonte nou li.
42
Alèkile, lè Juif yo te vin ap sòti anndan sinagòg la, Payen yo mande pou ke pawòl sa yo te ka preche ba yo nan pwochen Saba a.
43
Kounye a la a, lè kongregasyon an lage, plizyè nan Juif yo ak nan pwozelit devwe yo te suiv Pòl ak Banabas, ki yo menm, t ap pale avèk yo e konvenk yo pou yo kontinye mache nan gras Bondye.
44
E, nan Saba ki te vin apre a, se prèske tout vil la ansanm ki te vini pou koute Pawòl Bondye a.
45
Men, lè Juif yo gade wè foul moun yo, jalouzi te vin plen kè yo, epi yo pran pale kont sa Pòl t ap di yo; yo kontredi l, e yo denigre l.
46
Lè sa a, avèk asisrans, Pòl ak Banabas di yo konsa: Li te nesesè pou ke se a nou menm an premye ke Pawòl Bondye a te preche; men, puiske nou repouse l, epi nou jije ke nou pa merite lavi etènèl la, ebyen gade non, nou pral vire jwenn Payen yo.
47
Paske, se sa Senyè a te kòmande nou, Li te di: Mwen tabli w pou w ka yon limyè pou Payen yo, pouke w ka pote sali nanm nan dènye kwen sou latè.
48
Konsa, lè Payen yo tande sa, yo te kontan, yo bay Pawòl Bondye a glwa; epi, kantite moun yo ki te chwazi pou lavi etènèl la, yo te kwè.
49
E, Pawòl Bondye a te pwopaje nan tout zòn nan.
50
Men, Juif yo monte tèt medam devwe e onorab yo, ak gwo notab nan vil la pou leve yon pèsekisyon kont Pòl ak Banabas; lèfini, yo mete yo deyò nan zòn yo a.
51
Men, de mesye yo souke pousyè nan pye yo kont Juif yo, epi yo vin al Ikòn.
52
E, disip yo te plen ak lajwa e ak Lespri Sen.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!