Liv Zèv Apot Yo
Chapit 14
Klike la pou koute lekti chapit sa1
Alèkile, nan Ikòn sa te vin rive ke yo toude ansanm te ale nan sinagòg Juif yo; epi, jan yo te pale a te lakòz anpil moun te kwè, e pami Juif yo, e pami Grèk yo tou.
2
Men, Juif ki pa t kwè yo te monte tèt Payen yo, epi yo met move lide nan lespri yo kont frè yo.
3
Alò, anpil tan pase pandan ke yo t ap pale ak asirans nan Senyè a, sa ki te bay temwayaj de Pawòl gras Li a, e ki te pèmèt ke ak men yo, te gen mirak siy ak mèvèy ki t ap fèt.
4
Men, popilasyon nan vil la te divize; yon pòsyon te ak Juif yo, yon pòsyon te ak apot yo.
5
Se konsa ke lè te vin gen yon konplo ki te monte ant Payen yo ak Juif yo ansanm ak dirijan yo, pou yo te maltrete apot yo; lèfini, pou tiye yo anba kout wòch;
6
yo te vin konn sa, e yo te chape ale nan Lis ak Dèb, vil nan Likawoni yo, ansanm ak nan alantou zòn nan yo.
7
E, yo preche levanjil la kote sa a.
8
Se konsa ke te gen yon nonm ki te chita nan Lis, li te enfim nan pye; misye te paralize depi nan vant manman; e, li pa t janm mache.
9
Menm nonm sa a t ap tande Pòl k ap pale; e, Pòl li menm, te fikse je l sou misye, epi l reyalize ke nonm nan te gen lafwa pou l ta geri,
10
li di ak yon vwa byen fò: Leve kanpe sou de pye w! Epi, misye vole anlè, epi l mache.
11
Alò, lè foul la te wè sa Pòl te fè a, yo leve vwa yo, yo t ap di nan lang Likawoni: Se bondye yo wi ki desann vin jwenn nou sou fòm moun.
12
Kidonk, yo bay Banabas non Zeyis; epi Pòl, Emès, paske se li ki te pòtpawòl la.
13
Apre sa, prèt ki sèvi tanp Zeyis la, ki te pa devan antre vil yo a, vin ak towo bèf e ak kolye flè devan pòtay vil la, e li te pare pou ofri sakrifis ansanm ak foul la.
14
Bagay sa a, lè apot Banabas ak Pòl tande l, yo dechire rad sou yo; lèfini, yo kouri al jwenn moun yo, yo t ap rele.
15
Yo di: Mesye, poukisa n ap fè bagay sa yo? Nou menm tou, se moun nou ye menm jan avè n; e n ap preche nou dekwa pou n vire do kite vanite sa yo, epi vin jwenn Bondye Vivan an, Li menm ki kreye syèl la ak latè a, ak lanmè a, e ak tousa ki nan yo.
16
Li menm ki nan epòk anvan yo te pemèt nasyon yo mache dapre pwòp mannyè pa yo.
17
Sepandan, Li pa t kite tèt Li san temwen; avredi, Li te fè dibyen, Li te ban nou lapli soti nan syèl la, ak sezon rekòt, ki te ranpli kè nou ak manje e ak kontantman.
18
E, se te ak difikilte ke pawòl sa yo te resi anpeche moun yo ofri sakrifis pou yo.
19
Men, te gen kèk Juif ki te sot Antyòch ak Ikòn, yo te vin rive la a; alò, yo te konvenk foul la; e, apre yo te fin kalonnen Pòl ak wòch, yo te trennen l soti andeyò vil la, yo te kwè ke misye te mouri.
20
Men, disip yo te antoure misye, lèfini li leve kanpe, li antre nan vil la, epi nan demen, li pati al Dèb ansanm ak Banabas.
21
Epi, lè yo te anonse levanjil la nan vil sa a, e ke yo te anseye anpil moun, yo retounen nan Lis ak Ikòn e ak Antyòch ankò.
22
Yo te fòtifye nanm disip yo; yo te egzòte yo pou yo ret fèm nan lafwa, e fè yo konnen ke se anba anpil tribilasyon pou nou antre nan wayòm Bondye a.
23
Epi, apre ke yo te fin chwazi ansyen nan chak legliz yo, e ke yo te lapriyè pandan yo fè jèn, yo remèt yo nan men Senyè a, Li menm ke yo te kwè nan Li a.
24
E, apre ke yo te travèse Pisidi, yo te vin rive Panfili.
25
Epi, apre ke yo te preche levanjil la nan Pèj, yo desann ale Atali.
26
Se la ke yo pran batiman pou Antyòch, kote ke yo te jwenn rekòmandasyon dapre gras Bondye pou travay sa a ke yo te sot akonpli a.
27
E se konsa ke lè yo te rive, e ke yo te reyini legliz la ansanm, yo rakonte tousa ke Bondye te fè avèk yo; e, kijan Li te louvri pòt lafwa a bay Payen yo.
28
Epi, yo te ret la pandan lontan ak disip yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!