Liv Zèv Apot Yo
Chapit 15
Klike la pou koute lekti chapit sa1
Apre sa, te vin gen kèk mesye ki te desann sot nan Jide ki t ap anseye frè yo; e, yo t ap di: Eksepte si nou sikonsi dapre metòd Moyiz la, nou pa kapab sove.
2
Kidonk, se pa ti deba ak diskisyon ke Pòl ak Banabas te genyen avèk yo; se konsa ke yo deside pou ke Pòl ak Banabas e ak kèk nan pami yo menm ta dwe monte Jerizalèm al jwenn apot ak ansyen yo konsènan kesyon sa a.
3
Epi, apre ke legliz te akonpaye yo, yo travèse Fenisi ak Samari, yo pale de konvèsyon Payen yo; e, yo te lakòz anpil kèkontan lakay tout frè yo.
4
Alèkile, lè yo te rive Jerizalèm, legliz la, ak apot yo, e ak ansyen yo te resevwa yo; epi, yo te rakonte tousa ke Bondye te fè avèk yo.
5
Men, te gen kèk kwayan pami sèk Farizyen an ki te leve kanpe, yo di konsa ke li te nesesè pou sikonsi yo, e kòmande yo pou obsève lwa Moyiz la.
6
Kidonk, apot yo ak ansyen yo reyini pou yo ka egzamine sijè sa a.
7
Epi, apre ke anpil diskisyon te fin fèt, Pyè leve kanpe, e li di yo konsa: Mesye frè yo, nou konnen ke depi lontan sa, Bondye te fè yon chwa pami nou, pou ke se te pa mwayen bouch mwen ke Payen yo te tande Pawòl levanjil la, e ke yo te kwè.
8
E, Bondye, Li menm ki konnen kè lèzòm, Li te ba yo temwayaj, difèt ke Li ba yo Lespri Sen an, menm jan ke Li te fè l pou nou an.
9
E, Li pa t fè ankenn diferans ant nou menm avèk yo, difèt ke Li pirifye kè yo pa mwayen lafwa.
10
Kounye a la a menm, poukisa n ap tante Bondye, nan vle nou vle mete yon jouk nan kou disip yo, sa ke ni zansèt nou yo, ni nou menm pa t janm kapab sipòte.
11
Men, nou kwè ke se atravè gras Senyè Jezi Kris ke nou va sove, menm jan avè yo.
12
Lè sa a, tout asanble a fè silans; lèfini, yo bay Banabas ak Pòl pale; yo rakonte ki kalite mirak ak mèvèy Bondye te fè avèk yo nan mitan Payen yo.
13
Epi, lè yo te fin pale, Jak reponn, li di: Mesye frè yo, koute sa m ap di:
14
Simon te rakonte nou kijan ke pou lapremyè fwa Bondye te vizite Payen yo, pou Li te mete apa nan mitan yo, yon pèp pou pote non Li.
15
E, sa annakò ak pawòl pwofèt yo; jan sa te ekri a:
16
Apre sa, M a va retounen, e Mwen va rebati tabènak David la ki tonbe atè a; e, Mwen va rekonstwi ruin li yo ankò, epi Mwen va remete l kanpe;
17
dekwa pou restan nan lèzòm yo va bouske dèyè Senyè a, ansanm ak tout Payen yo ke non M envoke sou tèt yo a; se sa Senyè a deklare, Li menm nan ki fè tout bagay sa yo.
18
Konesans tout travay Li yo, Bondye te deja genyen l depi kreyasyon latè.
19
Kidonk, sa m ta di, sèke nou pa ta dwe twouble sila yo pami Payen ki rive vin jwenn Bondye yo;
20
okontrè, se pou nou ta ekri yo, voye di pou yo kanpe lwen kontaminasyon zidòl, ak fònikasyon, ak bèt ki trangle, epi ak san.
21
Paske, depi nan tan lontan nan chak vil te gen moun k ap preche Moyiz, dèske yo te li l nan sinagòg chak jou Saba.
22
Alò, apot yo, ansyen yo e legliz la nèt te deside pou yo voye kèk gason yo chwazi pami asanble yo a pou ale Antyòch ansanm avèk Pòl ak Banabas; se te Jid, ki te gen tinon Basabas, epi Silas; ki se te lidè pami frè yo.
23
Donk, yo ekri yon lèt konsa ke yo te remèt mesye yo: Apot yo, ansyen yo, ak frè yo voye salye frè nou yo ki pami Payen yo nan Antyòch, nan Siri ak nan Silisi.
24
Dapre sa nou tande, gen kèk moun ki soti kote pa nou bò isit ki al twouble nou ak pawòl, boulvèse nanm nou, yo di: Nou dwe sikonsi e obsève lalwa; nou pa t bay moun sa yo ankenn lòd konsa.
25
Nou wè ke l ta bon pandan ke nou reyini la a, e nou dakò ansanm, pou nou voye bò kote nou menm yo kèk gason ke nou chwazi pou akonpaye byenneme nou yo Banabas ak Pòl,
26
mesye sa yo ki met lavi yo an danje pou non Senyè nou an Jezi Kris.
27
Se konsa ke nou voye Jid ak Silas ki va yo menm tou deklare ak bouch yo menm bagay yo ban nou.
28
Paske sa ki bon dapre Lespri Sen an e dapre nou, sèke pa gen bezwen chaje do nou menm yo ak pi gwo fado pase sa ki nesesè.
29
Se pou nou kanpe lwen e vyann ki te sakrifye bay zidòl, e san, e bèt ke yo trangle, e fònikasyon. Si nou kenbe tèt nou lwen bagay sa yo, nou va byen fèt. Orevwa!
30
Alò, yo menm, lè yo te fin voye yo ale, yo te vin Antyòch; lèfini, yo te reyini asanble a, epi yo te remèt lèt la.
31
Lè yo li lèt la, frè yo te rejwi poutèt ankourajman an.
32
Epi, Jid ak Silas, ki yo menm tou te pwofèt, yo te egzòte frè yo avèk anpil pawòl, e yo te fè yo kanpe fèm.
33
E, apre ke yo te ret mize la pou yon tan, frè yo voye yo ale tounen kot apot yo.
34
Epoutan, Silas te pito rete toujou.
35
Pòl ak Banabas, yo menm tou te rete Antyòch; yo t ap anseye e preche Pawòl Senyè a, ansanm ak plizyè lòt moun tou.
36
Epi, apre kèk jou, Pòl di Banabas konsa: Ann tounen al vizite frè nou yo nan tout vil kote nou te preche yo Pawòl Senyè a non, pou n wè kijan yo ye.
37
Alò, Banabas te deside mennen Jan, ki gen tinon Mak la avèk yo;
38
men, Pòl pa t panse ke se te yon bon bagay pou pran misye avèk yo; li menm nan ki te lage yo Panfili, epi ki pa t ale nan travay la avèk yo a.
39
Kidonk, dezakò sa a te sitèlman fò ant yo ke yo youn separe ak lòt; e konsa, Banabas te pran Mak, li anbake pou al Chip.
40
E, Pòl te chwazi Silas, epi yo pati; frè yo te remèt yo anba gras Bondye.
41
Epi, li travèse Siri ak Silisi, li fòtifye legliz yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!