Liv Zèv Apot Yo
Chapit 17
Klike la pou koute lekti chapit sa1
Kounye a la, apre ke yo fin travèse Anfipolis ak Apoloni, yo rive nan Tesalonik; te genyen yon sinagòg Juif la.
2
E Pòl, jan abitid li te ye a, ale kote yo, epi li rezone ak yo sou Lèzekriti pandan twa jou Saba.
3
Li te kòmanse pale e li t ap anonse yo ke fòk Kris la te soufri; lèfini, fòk Li te resisite pami mò yo; e, Jezi sa a ke m ap preche ban nou an, se Li menm ki Kris.
4
E konsa, gen kèk nan yo ki te kwè, e yo te asosye yo avèk Pòl ak Silas, ansanm ak yon kantite Grèk devwe; e, kantite medam nan lelit la pa t piti.
5
Men, Juif ki pa t kwè yo te kite jalouzi anpòte yo; yo pran kèk nonm mechan, yon kalite move moun, e yo fè yon foul; epi, yo vire lòlòj tout vil la; lèfini, yo debake lakay Jazon ak entansyon pou fè mesye yo soti al jwenn pèp la.
6
E, lè yo pa t jwenn mesye yo, yo trennen Jazon ak kèk lòt frè devan otorite vil la, yo rele pou yo di: Moun sa k ap mete lemonn tèt anba a, yo rive isit la tou.
7
Se yo ke Jazon resevwa a, e se moun ki opoze kont lwa Seza yo, y ap di ke gen yon lòt wa, ki se Jezi.
8
Alèkile, yo te twouble pèp la ak otorite vil la yo lè yo tande bagay sa yo.
9
E, apre ke yo te pran yon amann nan men Jazon ak lòt moun yo, yo kite yo ale.
10
Epi, lamenm pandan lannuit la, frè yo voye Pòl ak Silas ale Bere. Yo menm, lè yo te rive la, y ale nan sinagòg Juif yo.
11
Juif sa yo te pi moun debyen pase sila ki te Tesalonik yo, palefèt ke yo te resevwa Pawòl la ak yon lespri byen dispoze; epi, yo t ap egzamine Lèzekriti toulejou pou gade wè si se konsa bagay yo ye vre.
12
Donk, plizyè nan yo te kwè; e, pami medam nan lelit la yo ki te Grèk; e, kanta mesye yo, se pa t yon ti kantite.
13
Men, lè Juif Tesalonik te aprann ke Pawòl Bondye a t ap preche pa Pòl nan Bere, yo ale la tou, epi yo chofe tèt foul la.
14
Alò, lamenm, frè yo voye Pòl ale pa wout bò lanmè a; men, Silas ak Timote te ret la toujou.
15
Moun sa ki te akonpaye Pòl yo, mennen l Atèn; epi yo resevwa lòd pou di Silas ak Timote pou yo vin jwenn li tousuit; lèfini, yo pati.
16
Kounye a la a, pandan Pòl te rete nan Atèn ap tann yo a, lespri l te boulvèse difèt ke l wè tout vil la te lage nèt nan idolatri.
17
Kidonk, misye t ap diskite chak jou nan sinagòg la avèk Juif yo e ak moun devwe yo; epi, sou plas piblik la ak moun ke l te rankontre yo.
18
Se konsa ke te vin gen kèk filozòf Epikiryen ak Estoyisyen ki te kontre avè l. Epi, gen nan yo ki di: Kisa paladò sa a ap di la a? Gen lòt ki reponn: Sanble ke misye ap preche kèk bondye etranje; se te palefèt ke li t ap preche Jezi ba yo, ak rezireksyon.
19
Alò, yo pran li, epi yo mennen l nan Areyopaj la; lèfini, yo t ap di l: Èske nou kapab konnen kisa nouvo ansèyman ke w ap pale de li a ye?
20
Paske w vini ak yon kalite bagay dwòl nan zòrèy nou; kidonk, nou ta renmen konnen kisa bagay sa yo vle di.
21
(Paske tout moun Atèn, ansanm ak etranje ki te abite la yo, yo pa t pase tan yo ap fè lòt bagay, apa de swa rakonte oubyen koute kèk nouvo bagay.)
22
Alèkile, Pòl kanpe nan mitan Areyopaj la, li di: Nou menm moun Atèn yo, sa ke mwen obsève sèke nan tout bagay nou kwè nan twòp sipèstisyon.
23
Paske antan m t ap pwomennen e ke m t ap obsève adorasyon nou yo, mwen te jwenn yon lotèl ki te gen mo sa yo grave sou li: POU BONDYE SA NOU PA KONNEN AN. Konsa donk, Li menm ke nan iyorans nou n ap adore a, se Li ke m ap anonse ban nou an.
24
Bondye ki kreye lemonn ak tout bagay ki ladan l yo, palefèt ke Li se Mèt syèl la ak tè a, Li pa abite nan tanp ki bati ak men moun;
25
nonplis tou, se pa men lèzòm ki sèvi L, kòmkwa Li ta bezwen kichòy; avredi, se Li ki bay tousa k egziste lavi, ak souf pou respire, avèk tout bagay.
26
Se Li ki avèk yon sèl san fè tout nasyon moun yo soti pou ke yo abite sou tout sifas latè; epi Li te detèmine e tan ki fikse pou yo a, e lizyè bitasyon yo;
27
dekwa pou yo te chèche Senyè a; e, si yo ta byen fè rechèch dèyè Li, ke yo ta va twouve Li, kwake Li pa lwen okenn nan nou.
28
Paske se nan Li ke nou gen lavi, ak mouvman, e ke nou gen egzistans nou; tankou kèk nan powèt nou yo te di l tou: Paske, se desandans Li nou ye tou.
29
Kidonk atò, kòm se desandans Bondye nou ye, nou pa dwe panse ke Bondye sanble ak bagay tankou lò, ajan, oswa wòch ki taye dapre ladrès atistik lèzòm.
30
Vremanvre, nan tan iyorans sa a, Bondye te fèmen je L sou sa; men kounye a Li kòmande tout moun toupatou pou yo repanti;
31
paske Li fikse yon jou kote ke L pral jije lemonn dapre ladwati, pa mwayen Nonm sa a ke L te chwazi a; e Li te pwouve sa bay tout moun, lè Li resisite L pami mò yo.
32
E, lè yo tande afè rezireksyon mò a, kèk nan yo pase sa nan rizib, kèk lòt di: N a va koute w ap pale sou sa yon lòt lè.
33
Konsa, Pòl deplase sot nan mitan yo.
34
Men, te gen kèk moun ki te rete atache avè l; e, ki te kwè. Pami yo, te gen Deni, yon manm Areyopaj la, ak yon dam yo rele Damaris epi lòt moun ansanm ak yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!