Liv Zèv Apot Yo
Chapit 18
Klike la pou koute lekti chapit sa1
Apre bagay sa yo, Pòl pati kite Atèn, e li vin Korent;
2
epi, misye rankontre ak yon sèten Juif yo rele Akilas, se te yon moun Pon ki te fèk rantre sot Itali ak madanm li, Prisil (paske Klod te kòmande tout Juif pou yo kite Wòm); Pòl al jwenn yo.
3
E kòm se te menm metye a li te fè, misye te abite avèk yo, e li te travay; se te tant ke yo te fè.
4
Epi, li te pale nan sinagòg la chak Saba, li te konvenk e Juif e Grèk.
5
Konsa, lè Silas ak Timote te vin rive sot Masedwàn, Pòl vin chofe nan lespri l, epi li temwaye bay Juif yo ke se Jezi ki Kris la.
6
E, lè yo te opoze tèt yo a sa; ansuit, ke yo t ap blasfeme, misye sekwe rad sou li, lèfini li di yo konsa: San nou, se sou pwòp tèt nou li va tonbe. Mwen klin nan sa! Apati de kounye a, se bò kote Payen yo mwen prale.
7
Apre sa, li deplase sot la, li antre lakay yon nonm yo rele Jistis; se te yon moun ki t ap sèvi Bondye; e, kay misye te tou kole ak sinagòg la.
8
Epi, Krispis, ki te alatèt responsab sinagòg la, te kwè nan Senyè a, ansanm ak tout moun lakay li; e, anpil nan Korentyen yo, lè yo te tande, yo te kwè, epi yo te batize.
9
Sètalò ke lannuit la, Senyè a te pale ak Pòl nan yon vizyon: Se pa pou w pè! Men, se pou w pale. Pinga kenbe pawòl nan bouch ou,
10
paske Mwen avè w; e, pèsonn p ap met lamen sou ou pou fè w mal; paske, M gen yon bon kou moun ki pa Mwen nan vil sa a.
11
Kidonk, Pòl te kontinye ret la pandan en an si mwa ap anseye Pawòl Bondye a pami yo.
12
Men, nan epòk Galyon te gouvènè Akayi, Juif yo met tèt yo ansanm pou leve kanpe kont Pòl; epi, yo mennen misye devan tribinal.
13
Yo di konsa: Eleman sa a ap pede pran tèt moun pou fè yo adore Bondye yon jan ki kontrè a Lalwa.
14
Se konsa ke apèn Pòl ta pral louvri bouch li, Galyon di Juif yo konsa: Si se te pou kòz yon enjistis oswa yon zak kriminèl, mesye Juif yo, alò, mwen t ap gen rezon pou m tande plent nou yo;
15
men, si se pou kesyon yon pawòl ak yon non, epi ak lalwa nou an, se nou ki pou okipe sa. Mwen p ap jije nan bagay sa yo.
16
Lèfini, li fè yo soti nan tribinal la.
17
Alèkile, tout Grèk yo pran Sostèn, chèf sinagòg la, epi yo bat misye devan tribinal la. E, Galyon pa t okipe l de bagay konsa.
18
Apre sa, Pòl te rete la kèk tan ankò, epi misye vin ale kite frè yo, e li te pran bato pou Siri; e, Prisil ak Akilas te akonpaye li. Li te kale tèt li lè l te rive Sankre, poutèt yon ve ke l te fè.
19
Alèkile, yo rive Efèz, misye depoze konpayon l yo, epi li antre nan sinagòg la, e l al kominike ak Juif yo.
20
Lè yo mande misye pou l pase plis tan avèk yo, li pa t dakò.
21
Men, li di yo orevwa, li di: Fòk mwen pase fèt sa k ap vini an Jerizalèm de tout fason. Men, m va retounen kote nou ankò si Bondye vle. Apre sa, li pran bato kite Efèz.
22
Epi, lè li debake Sezare, li monte pou l al salye legliz la; apre sa, li desann al Antyòch.
23
Ansuit, apre ke l te fin pase kèk tan la, li pati e li pase nan tout zòn Galasi ak Fiji yo, youn apre lòt; li t ap fòtifye tout disip yo.
24
Alèkile, te gen yon sèten Juif ki te rele Apolòs, moun Aleksandri, yon nonm ki te konn pale byen, epi ki te maton nan Lèzekriti, ki te vin rive Efèz.
25
Nonm sa a te resevwa enstriksyon sou Chemen Senyè a; e, kòm li te gen yon lespri ki te pasyone, li t ap pale e t ap anseye tout bagay Senyè a; alòske se de batèm Jan an sèlman ke li te okouran.
26
Se konsa ke l te kòmanse pale ak asirans nan sinagòg la. Lè Akilas ak Prisil te tande misye, yo pran l avèk yo, epi yo eksplike l chemen Bondye a pi kòrèk toujou.
27
E, lè misye te vin deside pou l travèse Akayi, frè yo te ekri lèt pou egzòte disip yo, dekwa pou yo te ka resevwa misye. E, lè misye te rive, li te ede sila ki te kwè pa gras yo anpil.
28
Paske avredi, li te konvenk Juif yo ak fèmte, e se anpiblik li t ap demontre pa mwayen Lèzekriti ke se Jezi ki Kris la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!