Liv Zèv Apot Yo
Chapit 19
Klike la pou koute lekti chapit sa1
Sa te vin rive ke pandan Apolòs te Korent lan, Pòl, ki te pase atravè kot ki anlè yo, te vin rive Efèz; epi, misye rankontre kèk disip.
2
Li di yo konsa: Èske nou resevwa SentEspri a depi ke nou te kwè a? Epi, yo reponn: Menm tande nou pa tande te gen yon SentEspri, non!
3
Alò, li mande yo: Nan ki kalite batèm nou te batize? Epi, yo reponn: Nan batèm Jan an, wi.
4
Alèkile, Pòl di: Avredi, Jan te batize ak batèm repantans lan, li te di moun yo ke yo te dwe kwè nan Sila ki te gen pou vini apre li a, ki vle di Kris Jezi.
5
Lè yo tande sa, yo resevwa batèm nan non Senyè Jezi.
6
Epi, apre ke Pòl te poze lamen sou yo, Lespri Sen an vini nan yo; epi, yo te pale an lang, yo te pwofetize.
7
Antou, mesye yo te douz konsa.
8
Apre sa, Pòl ale nan sinagòg la, misye pale ak fèmte pandan espas twa mwa, kote l t ap diskite e li t ap konvenk sou bagay ki konsène wayòm Bondye a.
9
Men, lè ke plizyè moun te fè rèd nan kè yo, e ke se pale yo t ap pale mal de Chemen an devan foul la, Pòl vire do ba yo, epi li mete disip yo apa, kote ke li te vin ap diskite chak jou nan lekòl Tiranis la.
10
E, sa te kontinye konsa pandan espas de lane; konsa donk, tout moun ki te rete ann Azi yo te tande Pawòl Senyè Jezi a; kit Juif yo, kit Grèk yo.
11
Epi, Bondye t ap fè de kalite mirak ekstwòdinè avèk men Pòl;
12
opwen ke moun te pran mouchwa ak moso twal ki te touche ak kò misye, epi yo te pote yo bay malad, lèfini, maladi yo te sot sou yo, move lespri t al kite yo.
13
Men, te gen kèk nan Juif ki te konn ap pwomennen chase demon yo, ki te tanmen nonmen non Senyè Jezi sou moun ki te gen move lespri yo. Yo t ap di: Nou kòmande w, nan non Jezi ke Pòl ap preche a!
14
Se konsa ke te gen sèt pitit gason Sera yo, yon Juif ki te chèf prèt yo, ki t ap fè sa.
15
Alò, move lespri a reponn, li di: M konn Jezi, e m konn Pòl; nou menm, kiyès nou ye?
16
Lèfini, moun ke move lespri a te nan li a, fonse sou yo, epi l kenbe yo sou kontwòl li, li genyen batay la kont yo, jouk se kouri yo kouri soti nan kay la, toutouni, e tou blese.
17
E, bagay sa a te yon istwa ke tout Juif e tout Grèk yo te okouran de li; e laperèz te anvayi yo tout. E, non Senyè Jezi te glorifye.
18
Epi, anpil nan moun ki te kwè yo vini, yo te temwaye, e yo deklare aksyon ke yo te fè yo.
19
Plizyè pami sila ki te konn fè maji yo, tout ansanm, yo pote liv yo vini, lèfini, yo boule yo devan je tout moun. E, lè yo te kalkile valè sa yo koute, yo te jwenn ke li te vo senkant mil pyès ajan.
20
Konsa donk, Pawòl Bondye a t ap vale teren e li t ap domine.
21
Apre ke bagay sa yo te fin pase, Pòl te gen nan lespri l pou ke kou l fin travèse Masedwàn ak Akayi, pou l ale Jerizalèm. Li te di: Apre m fin al la, fò m al wè Wòm tou.
22
Kidonk, li voye de nan moun ki t ap ede l yo Masedwàn; se te Timote ak Eras; men, li menm, li te rete ann Azi kèk tan toujou.
23
Men, nan menm epòk sa a, se pa ti deblozay ki te vin genyen poutèt Chemen an.
24
Paske, te gen yon sèten Demetriyis, yon òfèv ki te konn fè ti biblo ann ajan tanp Atemis la; e, se pa t ti benefis jwèt ke sa te rapòte ouvriye
25
ke misye te rele yo ansanm ak lòt travayè ki te nan menm metye a. Alò, li di: Mesye yo, nou konnen ke se nan komès sa a ke nou fè richès nou.
26
Kounye a la a, nou wè e nou tande ke se pa nan Efèz sèlman, men se prèske toupatou ann Azi ke Pòl sa a ap konvenk e ap detounen yon kantite moun; misye ap mache di ke pa gen okenn Bondye ki fèt ak men lèzòm.
27
Ki fè ke non sèlman biznis nou an danje pou l pa vin gen ankenn valè; mentou, ke tanp gran deyès nou an Atemis ap vin meprize, e grandè l ap vin detwi; li menm nan ke tout Azi ak lemonn antye adore a.
28
E, lè yo tande pawòl sa yo, yo te fè gwo kòlè, yo rele byen fò, yo di: Atemis Efezyen yo gran!
29
E tout vil la te plen ak boulvès. Lèfini, apre ke yo te met lamen sou Gayis ak Aristak, moun Masedwàn ki te konpayon vwayaj Pòl, yo te dakò youn ak lòt pou trennen yo nan stad la.
30
Alèkile, Pòl te vle antre parèt devan foul la, disip yo pa t pèmèt li.
31
Epi, kèk nan otorite ann Azi yo ki te zanmi misye te voye kote l pou di l yo pa t vle ke l al mete tèt li an danje nan stad la.
32
Kifè, yon gwoup moun t ap rele di yon bagay; yon lòt, yon lòt bagay; poutèt ke asanble a te boulvèse; e pifò pa t menm konnen pou ki rezon yo te reyini an.
33
Epi, yo rale Aleksann soti nan foul la, Juif yo mete misye pa devan. Alèkile, Aleksann fè siy ak men l, kòmkwa li te vle defann tèt li devan pèp la.
34
Men, lè yo vin konnen ke se yon Juif misye te ye, yo tout ansanm, ak yon sèl vwa, yo pran rele byen fò pandan yon espas dezèdtan: Atemis Efezyen yo gran!
35
Lè sa a, sekretè vil la, apre ke l fin kalme foul la, li di konsa: Nou menm moun Efèz, kiyès la a ki pa konnen ke lavil Efezyen yo se yon vil ki sèvi gran deyès Atemis ak stati li ki soti nan Jipitè pou l tonbe sou latè?
36
Difèt ke bagay sa yo, se pa bagay moun ka pale mal de yo, se pou nou pe, epi se pa pou nou fè anyen nan tètcho.
37
Paske, nou mennen nonm sa yo la a, alòske yo pa ni vòlè tanp, ni moun ki denigre deyès nou an.
38
Kidonk, si Demetriyis ak ouvriye ki avèk li yo gen yon pwoblèm ak kèlkeswa moun nan; tribinal la louvri, e gen pwokonsil ki la; kite youn al pote plent kont lòt.
39
Men, si se yon lòt bagay n ap chèche regle, sa dwe fèt nan yon asanble ki legal.
40
Paske, kounye a la a, nou an danje pou yo kesyone nou poutèt dezòd jodi a, kòm pa gen okenn eskiz nou ka bay pou jistifye manifestasyon sa a.
41
E, apre ke li fin pale konsa, li voye foul la ale.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!