Liv Zèv Apot Yo
Chapit 20
Klike la pou koute lekti chapit sa1
Apre ke eskandal la te vin sispann, Pòl voye rele disip yo vin kote l, epi li ba yo akolad, lèfini li pati pou l ale nan Masedwàn.
2
Ansuit, lè l te fin travèse zòn sa yo e ke l te ba yo bon jan egzòtasyon, li te ale an Grès;
3
e, li pase twa mwa la. Alèkile, lè Juif yo te poze yon pyèj pou li pandan ke l ta pral bake pou l al Siri, li deside pou l retounen travèse Masedwàn.
4
Sila yo ki te akonpaye l rive ann Azi a, se te Sopatè, moun Bere; Aristak ak Segon, moun Tesalonik; Gayis, moun Dèb; ak Timote; epi, Tichik ak Twofim, moun Azi.
5
Yo menm, yo te pran devan, epi yo t al tann nou Twowas.
6
Nou te pran bato kite Filip apre ‘Jou Pen San Ledven' an, epi nou rive kote yo sou senk jou; (nou ret la pandan sèt jou.)
7
Epi, nan premye jou semèn nan, lè ke disip yo reyini pou kase pen, Pòl t ap preche moun yo; misye te pare pou l pati nan demen, e li kontinye mesaj li a jiska minui.
8
Konsa, te gen plizyè lanp limen nan chanmòt kote yo te reyini ansanm nan.
9
Twouve ke te gen yon jennòm yo te rele Etich ki te chita nan yon fenèt; misye te gen yon gwo dòmi ki te pote l ale; e, kòm Pòl t ap preche yon mesaj ki long, dòmi an ale nèt ak misye, epi l glise tonbe anba soti nan twazyèm etaj la; e lè y al leve l, li te mouri.
10
Lè sa a, Pòl desann, li panche sou li, e pandan li pran misye nan bra l, li di: Pa twouble tèt nou, paske li gen lavi l nan li toujou!
11
Konsa, apre ke l te fin remonte a, e ke l te kase pen, ke l te manje, epi ke l te pale pandan bon kou tan pou jis li jou, lè sa a, misye pati.
12
Alèkile, moun yo te leve jenn gason an vivan; se pa ti konfòte sa te konfòte yo.
13
Epi, nou menm, nou te bake anvan; ansuit, nou te navige rive Asòs; se la nou te gen pou nou pran Pòl abò; se aranjman sa a ke misye te fè lè l te deside ale apye a.
14
Konsa donk, lè li rankontre nou Asòs, nou pran l avèk nou, epi n ale Mitilèn.
15
Apre sa, nou fè vwal soti la, epi nan demen nou rive anfas Kiyòs; ansuit, jou apre a nou rive Samòs; epi nou te Twojil; lèfini, nan demen nou te rive Milè.
16
Se difèt ke Pòl te detèmine pou l fè vwal an pasan pa Efèz, dekwa pou l pa t pèdi tan ann Azi, kòm misye te prese, ansòt ke si sa te posib, pou l te rive Jerizalèm nan jou Lapannkòt la.
17
De Milè etan, li voye moun al Efèz pou rele ansyen yo nan legliz la.
18
E, lè yo te vini kote l, li di yo konsa: Nou konnen ke depi premye jou ke m te vin ann Azi a, kòman mwen te konpòte m avèk nou pandan toutan sa a.
19
Mwen te sèvi Senyè a ak tout imilite nan lespri m, avèk dlo nan je, e nan mitan zeprèv ki te tonbe sou mwen akòz konplo Juif yo.
20
E, nou konnen ke m pa t sere anyen ki te ka fè nou dibyen; okontrè, mwen te montre nou, mwen te anseye nou an piblik, e m te fè sa de kay an kay.
21
M te pwoklame repantans annegad Bondye, ak lafwa nan Senyè Jezi Kris, alafwa e bay Juif yo, e bay Grèk yo tou.
22
Men, kounye a la a, gade! Se ak yon lespri fèm ke mwen prale Jerizalèm, atout mwen pa konnen sa ki ka rive m la.
23
Sòf ke Lespri Sen an temwaye nan chak vil, pou Li di ke se kòd ak tribilasyon k ap tann mwen.
24
Men, ankenn nan bagay sa yo pa fè m pè; nitou, mwen pa konsidere lavi m gen valè pou mwen menm; dekwa pou m ka fini kous mwen an ak kè kontan, ansanm avèk ministè ke mwen te resevwa nan men Senyè Jezi a, pou mwen temwaye levanjil gras Bondye a.
25
E, kounye a, gade! Mwen konnen ke nou tout pami sila yo ke mwen te mache preche wayòm Bondye a ba yo a, nou p ap wè figi m ankò.
26
Kidonk, mwen pran nou kòm temwen jodi a, ke mwen inosan annegad san tout òm.
27
Paske, mwen pa t gen ankenn rezèv lè ke m t ap deklare konsèy Bondye a ban nou.
28
Alò, fè atansyon ak tèt nou ansanm ak tout twoupo a ke Lespri Sen an mete nou kòm gadyen an, pou nouri legliz Bondye a, ke Li achte avèk pwòp san L lan.
29
Paske, men sa m konnen: sèke apre depa m, va gen lou mechan ki vin antre nan mitan nou; yo p ap epaye twoupo a.
30
Menm jan an tou, pami nou menm la a, va gen moun ki parèt, k apral pale yon kalite bagay malfezan pou yo ka rale disip pa yo dèyè yo.
31
Kidonk, se pou nou veye; lèfini, sonje ke pandan yon peryòd twazan, mwen pa t sispann avèti nou chak, lannuit kou lajounen, ak dlo nan je.
32
Alèkile frè yo, mwen rekòmande nou bay Bondye, ak bay Pawòl lagras Li a ki kapab edifye nou e ban nou yon eritaj pami sila ki sanktifye yo.
33
Mwen pa t dèyè pran ajan, oswa lò, oubyen rad pyès moun.
34
Wi, nou menm, nou konnen ke se men sa yo ki te pran swen bezwen pa m ansanm ak moun ki te avè m yo.
35
Mwen te fè tout jan pou montre nou kijan ke se travay pou nou travay dekwa pou nou ede sa ki fèb yo; epi, pou nou te sonje pawòl Senyè Jezi yo, jan Li te di konsa: Gen plis benefis lè w bay, ke lè w resevwa.
36
E, apre ke Pòl te fin pale konsa, li ajenou, e li lapriyè ak yo tout.
37
Epi, tout moun te ak gwo dlo nan je; yo pase men nan kou Pòl; e, yo bo misye.
38
Sa ki te fè yo plis lapenn pase tout bagay, se te pawòl Pòl te di yo a, ke yo p ap wè figi l ankò a. Apre sa, yo kondi misye al nan bato a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!