Liv Zèv Apot Yo
Chapit 23
Klike la pou koute lekti chapit sa1
Alèkile, pandan Pòl fikse je l sou Konsèy la, li di: Mesye yo e frè yo, m viv avèk tout bon konsyans mwen devan Bondye jis jounen jodi a.
2
Epi, Ananyas, sakrifikatè souvren an, pase moun ki te kanpe kote Pòl yo lòd pou yo frape misye sou bouch.
3
Alò, Pòl di: Bondye va frape w, miray blanchi ke w ye! Paske, ou chita la a pou w jije m dapre lalwa; pouki w bay lòd pou frape m, alòske sa kontrè ak lalwa?
4
Lè sa a, moun ki te kanpe kote l yo di: Apa w ap joure sakrifilatè souvren Bondye a!
5
Alò, Pòl di: Mwen pa t konnen non, frè yo, ke se te sakrifikatè souvren an sa; paske, men sa ki ekri: Ou pa gen dwa pale mal moun ki dirijan pèp ou a.
6
Men, lè Pòl vin reyalize ke yon pati te Sadiseyen, e lòt la te Farizyen; misye rele nan mitan Konsèy la: Mesye yo e frè yo, se yon Farizyen m ye, pitit gason yon Farizyen! Se poutèt esperans lan ak rezireksyon mò yo ke y ap jije m la a.
7
E, kou l fin di sa a, vin gen yon gwo diskisyon ki pete ant Farizyen ak Sadiseyen yo; kidonk, asanble a te vin divize.
8
Paske, Sadiseyen yo di ke pa gen rezireksyon, nitou pa gen zanj, ni lespri; alòske Farizyen yo kwè nan toude bagay sa yo.
9
Vin gen yon gwo bourara ki leve; epi, pwofesè lalwa ki te nan kan Farizyen yo leve kanpe, yo diskite pou di: Nou pa jwenn ankenn bagay mal nan nonm sa a; epi, si se te yon lespri oswa yon zanj ki te pale avè l, ann pa goumen kont Bondye.
10
Alèkile, lè vin ap gen gwo dezòd; e, kòmandan an chèf la, ki te pè pou ke se pa t pyès an pyès y al wete Pòl anba moun sa yo, li bay sòlda yo lòd pou yo desann, epi pou yo pran misye pa lafòs soti nan mitan yo; lèfini, pou yo mennen li antre nan kazèn lan .
11
Ansuit, lannuit apre a, Senyè a te vin kanpe kote li, Li di: Pran kouraj, Pòl! Paske, menm jan ke w te temwaye nan Jerizalèm pou Mwen an, se konsa tou ou va gen pou w temwaye pou Mwen nan Wòm.
12
Lè l te vin fè jou, kèk nan Juif yo te met tèt yo ansanm yo fòme yon gwoup ki sèmante pou madichon rive yo si yo ta swa manje swa bwè anvan ke yo tiye Pòl.
13
E, yo te plis pase karant ki te nan konplo sa a.
14
Alèkile, yo vin kote sakrifikatè anchèf yo ak Ansyen yo; epi, yo di konsa: Nou mare tèt nou ansanm anba yon sèman pouke madichon rive nou; nou p ap manje anyen pou jis nou tiye Pòl.
15
Kidonk, kounye a se pou nou menm ak Konsèy la ale kote kòmandan an chèf la pou nou mande ke l mennen misye desann vin jwenn nou demen; kòmkwa nou ta gen pou egzamine kichòy nan ka misye a pi byen toujou; lèfini, nou menm, depi misye pwoche, n ap pare pou tiye l.
16
Se konsa ke lè pitit gason sè Pòl la tande pale de pèlen yo t ap tann lan, l ale, li antre nan kazèn nan, epi li di Pòl sa.
17
Alèkile, Pòl rele youn nan santenye yo vin kote l, epi l di: Mennen jennòm sa a bò kot kòmandan an chèf la, paske l gen yon bagay pou li di l.
18
Donk, li pran misye e li mennen l al jwenn kòmandan an chèf la, epi li di: Pòl, prizonye a, rele m vin kote l epi li priye m pou mwen mennen jennòm sa a ba ou, li gen yon bagay pou l di w.
19
Alèkile, kòmandan an chèf la kenbe men misye; Ansuit, l ale avèk li yon kote an prive; epi, li mande misye: Kisa w gen pou w di m nan?
20
Alò, misye di: Juif yo mete yo dakò pou fè ke w ta aksepte desann ak Pòl demen devan Konsèy la, kòmkwa yo ta gen kèk kesyon anplis ke yo ta renmen poze li.
21
Men, pinga w okipe yo; paske, gen plis pase karant gason pami yo ki pare yon pyèj pou li; se yo ki mare tèt yo ansanm ak yon sèman, ki di ke yo pa gen dwa ni manje ni bwè toutotan yo pa tiye misye. Kidonk, kounye a yo pare, e se pwomès la y ap tann nan men w.
22
Alèkile, kòmandan an chèf la kite jenn gason an ale, e li ba l lòd sa a: Pinga w kite pèsonn konnen ke w pale bagay sa yo avè m.
23
Apre sa, li rele de santenye vin jwenn li, li di: Pare desan sòlda, ansanm ak swasanndis kavalye, e desan lansye, pou ale Sezare nan twazyèm è lannuit la.
24
Fè sele bèt pou yo met Pòl monte, epi pou l rive sennesof kote Feliks, gouvènè a.
25
Lèfini, li ekri yon lèt konsa:
26
Klod Lisyas ap salye sonnekselans gouvènè Feliks!
27
Nonm sa a, Juif yo te sezi l, epi yo ta pral tiye l; sètalò ke m te parèt ak yon lame, epi m te wete l anba danje, paske m te aprann ke se yon Women li ye .
28
Kòm mwen te vle konnen pouki rezon yo te akize l la, mwen mete l kanpe devan Konsèy yo a.
29
Mwen vin reyalize ke misye akize pou zafè ki konsène lalwa yo a; men, ke l pa t gen okenn plent kont li ki ta merite ni lanmò, ni chenn.
30
Epi, lè yo te vin fè m konnen ke Juif yo te pare yon pyèj pou nonm lan, mwen voye l lamenm ba ou; lèfini, mwen pase lòd bay moun ki akize l yo pou y al di devan w kisa yo genyen kont misye. Orevwa.
31
Alò, jan yo te ba yo lòd la, sòlda yo pran Pòl e yo mennen l ale Antipatris pandan lannuit la.
32
Nan demen, yo te kite kavalye yo kontinye ale avè l, e yo te retounen nan kazèn nan.
33
Kavalye yo yo menm, lè yo rive Sezare, yo remèt lèt la bay gouvènè a; epitou, yo prezante Pòl devan li.
34
Alèkile, apre ke gouvènè a fin li lèt la, li mande moun ki pwovens Pòl te ye; epi, lè l vin konnen ke se te Sisili l te soti,
35
li di: Mwen va tande w lè moun ki akize w yo va la tou. Ansuit, li pase lòd pou kenbe Pòl nan sal jijman Ewòd la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!