Liv Zèv Apot Yo
Chapit 24
Klike la pou koute lekti chapit sa1
Epi, senk jou apre sa, Ananyas, sakrifikatè souvren an, desann ak ansyen yo e avèk yon sèten paladò ki te rele Tètilis ki te fè deklarasyon plent kont Pòl la devan gouvènè a.
2
Alèkile, lè Pòl vin parèt, Tètilis kòmanse akize l, li di konsa: Pa lefèt ke se gras a ou menm nou jwi yon gran trankilite; e, ke de kalite gwo travay reyalize o benefis nasyon sa a grasa a pwoteksyon w;
3
nou toujou rekonèt sa; e, se konsa sa ye toupatou, Sonnekselans Feliks; ak tout remèsiman nou!
4
Men, pou evite ke m annuiye w plis ke sa, m ap priye w pou ke w ta fè nou favè tande sa nou gen pou di w la an detwa mo.
5
Twouve ke nou jwenn nonm sa a, misye se yon pès, e se moun k ap mache simen divizyon nan mitan tout Juif nan lemonn antye; li se yon chèf alatèt sèk Nazareyen yo.
6
Se misye tou ki t al pwofane tanp lan; e, ke nou te kenbe dekwa pou n te jije l dapre lalwa nou an.
7
Men, kòmandan an chèf Lizyas te vin parèt sou nou; e, se ak gwo vyolans ke li te rape misye anba men nou.
8
Li mande moun ki akize misye yo pou yo vini kote w, dekwa pou ke w kapab egzamine yo; epi pou w enfòme de tousa ki nan akizasyon nou an kont misye.
9
Epi, Juif yo apwouve tou, yo di ke se konsa vre bagay yo te ye.
10
Alèkile, apre ke gouvènè a fè l siy pou l pale, Pòl reponn: Difèt ke m konnen ke depi plizyè ane se ou menm ki jij sou nasyon an, se yon rezon anplis ki fè ke se ak kèkontan m ap reponn pou defann tèt mwen.
11
Ou kapab verifye sa; apèn gen douz jou ke m te monte Jerizalèm pou m t al adore.
12
E, yo pa t ni kenbe m nan tanp lan ap diskite ak pyès moun, ni ki t ap monte tèt pèp la, kit nan sinagòg yo, kit nan vil la.
13
Nonplis tou, yo pa kapab bay prèv de bagay y ap akize m de yo kounye a.
14
Men, sa ke m ap admèt devan w, sèke se dapre Chemen ke yo di ki se yon erezi a, ke mwen menm m ap adore Bondye zansèt mwen yo; e, mwen kwè nan tousa ki ekri nan lalwa a ak nan pwofèt yo.
15
Epi, mwen gen esperans nan Bondye; sa ke yo menm, yo aksepte tou, ke va gen yon rezireksyon mò yo, e sa ki jis yo, e sa ki enjis yo ansanm.
16
E, se poutèt sa ke mwen toujou asire ke m gen yon konsyans ki san repwòch e devan Bondye, e devan lèzòm.
17
Vin twouve kounye a ke apre plizyè ane, mwen te vin pote lomön bay pèp mwen an avèk ofrann.
18
Se konsa kèk Juif ki sot ann Azi jwenn mwen ki t ap pirifye tèt mwen nan tanp lan; se pa t ni ak foul moun, ni ak briganday.
19
Se yo ki ta dwe la a devan w, epi pou yo ta akize, sizoka yo te gen yon bagay kont mwen.
20
Osinon, kite ke sila yo menm nan ki la a di si yo te jwenn nenpòt ki kalite malfezans nan mwen pandan m te kanpe devan Konsèy la.
21
Amwenske se ta poutèt rèl sa ke m te fè lè m te nan mitan yo a: Se poutèt afè rezireksyon mò yo wi ke m ap jije devan nou jodi a!
22
Alèkile, apre ke Feliks tande sa, kòm li te gen bon jan konesans konsènan Chemen an, li ranvwaye yo, li di: Lè Lizyas, kòmandan an chèf la va desann, mwen va egzamine ka nou an pi plis.
23
Lèfini, li pase yon santenye lòd pou li kontinye kenbe Pòl; e, pou ba l plis libète; epi, pou l pa anpeche okenn moun nan antouraj Pòl yo rann li sèvis oswa vin vizite l.
24
Epi, kèk jou apre sa, lè Feliks te vin ak madanm li, Drisiy, ki te yon fanm Juif, misye te voye rele Pòl; e, li koute l ap pale konsènan lafwa an Kris.
25
Men, kou li te vin ap pale de jistis, de disiplin moral, ak de jijman ki gen pou vini an; Feliks tranble, epi li reponn: Ou mèt al fè wout ou kounye a; lè m va jwenn yon tan ki konvnab, m a fè rele w.
26
Avredi tou, misye te gen espwa jwenn lajan nan men Pòl, pou l ta ka lage li; se sa k fè li te fè chèche l pi souvan pou pale avè l.
27
Men, dezan apre sa, se Pòsiyis Festis ki te vin pran plas Feliks; konsa donk, Feliks ki t ap fè Juif yo plezi, te kite Pòl nan prizon.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!