Liv Zèv Apot Yo
Chapit 27
Klike la pou koute lekti chapit sa1
Alèkile, lè yo te deside ke nou dwe pran bato pou n ale Itali, yo livre Pòl ak yon kantite lòt prizonye nan men yon nonm ki rele Jiliyis, ki te santenye nan rejiman Samajeste a.
2
E, se konsa nou monte abò yon bato Adramit; epi, nou derape; nou ta pral pase arebò kòt Azi yo; te gen yon sèten Aristak, moun Masedwàn, ki te la avèk nou.
3
Epi nan demen, nou koste Sidon; e, Jiliyis te trete Pòl ak anpil koutwazi; li te pèmèt misye ale lakay zanmi l pou pran swen tèt li.
4
Apre ke nou deplase kite la, nou lonje arebò kòt Chip yo, paske van yo te kontrè.
5
Ansuit, apre ke n te fin travèse lanmè Silisi ak Panfili a, nou vin rive Mira, yon vil nan Lisi;
6
e se la ke santenye a te jwenn yon bato Aleksandri ki t ap pran vwal pou Itali; e, li fè n anbake ladan l.
7
Apre sa, nou te pase plizyè jou ap navige tou dousman; e, se ak difikilte ke nou te rive anfas Nid, kote van an pa t bann mwayen pou n koste; epi, nou pase pa anba kòt zile Krèt la, pou n al parèt Salmòn.
8
Epi, apre ke nou te fin pase l anba traka, nou rive yon kote yo rele Bonpò, tou pre kote vil Laze a te ye a.
9
Kounye a menm, apre ke bon kou tan te fin pase, e ke l te vin gen danje pou pran vwal; paske menm tan pou fè jèn nan te deja pase; Pòl avèti yo,
10
e li di yo konsa: Mesye, mwen santi ke vwayaj la pral gen dezas ak anpil pèd, non sèlman pou kagezon an ak batiman an, mentou pou lavi nou.
11
Men, santenye a te kwè plis nan kaptèn ak mèt bato a pase sa Pòl te di yo a.
12
E, poutèt pò a pa t bon pou yo te pase ivè ladan l, pifò pami moun yo te konseye pou ale kite l tou, pou gade wè si yo te ka gentan rive Feniks pou yo pase ivè a; se te yon pò nan Krèt, ki te bay fas li sou sidwès ak nòdwès.
13
Alèkile, lè yon ti van sid te vin ap soufle, yo te sipoze ke plan yo a t ap ka mache; kidonk, yo leve lank; e, yo lonje toupre avèk kòt Krèt la.
14
Men apre sa, pa t gen anpil tan ki pase, epi yon sèl van tanpèt yo rele Erakilon vin dechennen kont zile a.
15
E, lè bato a pran ladan l, epi ke li pa t kapab kenbe tèt avè l, nou kite l bwote nou.
16
Nou te vin pase bò kote yon zile ki te rele Kloda; men, se te ak anpil difikilte ke nou te resi pran kontwòl bato a.
17
Lèfini, yo ise l abò; epi, yo itilize mwayen ki pou sentre bato a; Ansuit, kòm yo te pè pou yo pa t al echwe sou sab Lasit la, yo bese vwal yo; epi, yo kite l ale pou kò l.
18
Men, kòm tanpèt la t ap sakaje nou depase mezi; nan demen, yo voye chay jete pou rann bato a pi leje.
19
Epi, sou twazyèm jou a, se nou menm ak pwòp men nou ki voye aparèy bato a jete nan dlo.
20
E, apre plizyè jou kote nou pa wè ni solèy ni zetwal parèt; epi, se pa t ti tanpèt ki t ap sakaje nou; alò, tout espwa pou ke nou ta sove te fin pèdi.
21
Men, apre yon bon kou tan san manje, Pòl leve kanpe nan mitan yo, epi li di: Mesye yo, nou te dwe koute m, e nou pa t sipoze pran vwal kite Krèt, pouke se dega ak pèd sa a nou vin pran.
22
Men kounye a, m ap mande nou pou nou pran kouraj; paske, p ap gen ankenn pèd lavi pèsonn pami nou la a; sof bato a k ap pèdi.
23
Paske, lannuit la, zanj Bondye a te vin kanpe kote mwen, Bondye ki Mèt mwen an, e ke m ap sèvi a.
24
Li di m konsa: Pòl, pa pè! Fòk ou konparèt devan Seza; epi, gade non! Bondye ba w tout moun k ap vwayaje avèk ou yo.
25
Kidonk, mesye yo, se pou nou pran kouraj; paske, mwen fè Bondye konfyans, ke sa va gen pou l pase jan yo te di m li an.
26
Men, nou va gen pou nou echwe sou yon sèten zile.
27
Men, lè nou te rive sou katòzyèm nuit la, antan nou t ap balanse monte desann sou lanmè Adriya; vè minui konsa, maren yo te sispèk ke nou t ap pwoche tè kèk peyi.
28
Alèkile, lè yo voye sonn, yo jwenn ven brass. E, apre ke yo fin vanse pi devan, yo voye sonn ankò, yo jwenn kenz bras.
29
Lè sa a, yo te vin pè pou sa pa ta rive ke n al echwe sou resif, yo lage kat lank nan poup bato a, pa dèyè l; epi, yo t ap priye pou jou louvri.
30
Men, kòm maren yo t ap chèche sove kite bato a, yo te desann kannòt la nan lanmè, yo t ap pran pòz ke se lank pa devan bato yo ke yo t ap lage;
31
Pòl di santenye a ak sòlda yo: Sèlman, sof si mesye sa yo rete nan bato a; nou menm, nou p ap ka sove!
32
Alò, sòlda yo koupe kòd kannòt la; e, yo kite l tonbe.
33
Epi, antan jou t ap leve, Pòl t ap ankouraje yo tout pou yo manje; li di yo: Jodi a fè katòz jou ke nou kontinye rete san manje, nou pa janm pran anyen.
34
Se pousa m ap mande nou pou n manje kichòy; paske se pou byenèt nou sa ap bon; avredi, p ap gen yon grenn cheve k ap sot tonbe nan tèt okenn nan nou.
35
Epi, apre ke li fin pale konsa, li pran pen, e li rann Bondye gras devan yo tout; e apre ke l te kase pen an, li kòmanse manje.
36
Alèkile, yo tout te pran kouraj, epi yo manje kichòy.
37
Antou, nou te desanswasannsèz moun nan bato a.
38
Epi, lè yo te fin manje ase manje, yo fè bato a pi leje, yo voye rès ble a jete nan lanmè.
39
E, lè l vin fè jou, yo pa t rekonèt tè a; men, yo gade, yo wè yon ans ki te gen yon plaj; se nan direksyon li ke yo te deside dirije bato a, si sa t ap posib.
40
Kidonk, yo leve lank yo, e yo kite yo ap flote nan lanmè a; lèfini, yo lage kòd gouvènay la yo, e yo monte vwal sant nan anlè, leve ovan; epi, yo pran direksyon plaj la.
41
Men, y al tonbe yon kote ki te gen de kouran dlo ki kontre; yo fè bato a echwe; devan bato te ret kanpe dwat san bouje; men, pati dèyè a li menm te demantibile anba vyolans vag lanmè yo.
42
Alèkile, plan sòlda yo se te pou yo tiye prizonye yo, dekwa pou okenn nan yo pa t naje ale pou yo sove.
43
Men, santenye a, ki te vle sove Pòl, anpeche yo aplike plan yo a; misye pase lòd pou moun ki konn naje lage kò yo anvan nan lanmè a, pou yo rive sou tè;
44
lèfini, rès moun yo va monte sou planch oswa moso pyès ki sot nan bato a. Sa te pase konsa, e tout moun te rive atè sennesof.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!