Liv Zèv Apot Yo
Chapit 28
Klike la pou koute lekti chapit sa1
Epi, se lè yo te fin chape ke yo te aprann ke zile a te rele Malta.
2
E, se pa t ak ti kras jantiyès pèp baba a te resevwa nou; paske, yo te limen yon dife pou yo te resevwa nou tout, poutèt lapli ki t ap tonbe a, e poutèt fredi a.
3
Epi, apre ke Pòl te fin sanble yon pil branch bwa pou met sou dife a, gen yon sèpan vipè ki soti nan chalè a epi ki vlope nan men misye.
4
Alò, lè pèp baba a wè sèpan bèt (venime)* a pandye sou men misye; antre yo, youn di lòt konsa: Pa gen mwayen pou nonm sa a se pa yon asasen l ye; paske malgre l fin chape nan lanmè a; men, jistis pa pèmèt li viv.
5
Alèkile, Pòl souke bèt la jete nan dife a; e, misye pa t santi okenn pwoblèm.
6
Men, moun yo menm, yo t ap gade wè kilè misye ta pral anfle, oswa pou l ta tonbe mouri sibit; men, apre ke yo te ret ap gade pandan lontan, lèfini yo pa t wè ankenn malè ki te rive misye; yo chanje lide yo, e yo di ke misye se yon bondye li ye.
7
Nan menm zòn sa a, te gen tè ki te pou pi gran sitwayen nan zile a, non li se te Pibliyis; misye te resevwa nou, e se ak koutwazi li te ban nou ladesant pandan twa jou.
8
Epi, twouve ke papa Pibliyis te kouche malad ak yon lafyèv e yon dyare. Pòl antre kote l, e li lapriyè, li poze lamen sou li; epi l geri misye.
9
Alèkile, lè sa te fin rive, lòt moun tou ki te gen maladi sou zile a te vini, e yo te geri;
10
yo menm tou se ak anpil onè yo te onore nou. E, nou ta pral pati, yo te ban nou tousa nou te bezwen.
11
Se konsa ke apre twa mwa, nou te anbake nan yon bato Aleksandri ki te pase ivè a sou zile a; ensiy sou bato a, se te De Frè Jimo yo.
12
Epi, nou koste Sirakiz, e nou pase twa jou la.
13
Epi, de la etan, nou lonje kòt la; e nou rive Rejyo; yon jou apre sa, van Sid la te leve, e nan demen nou rive Pouzòl.
14
Se la ke nou te rankontre kèk frè ki te vle nou ret pase sèt jou avè yo; lèfini, nou pran direksyon pou n al Wòm.
15
E de la etan, lè frè yo te tande pale de nou, yo soti vin rankontre nou jis nan zòn Mache Apiyis ak Twa Restoran. Lè Pòl wè yo, li di Bondye mèsi, e li pran kouraj.
16
Alèkile, lè nou rive Wòm, santenye a remèt prizonye yo bay kòmandan gad yo; men, yo te pèmèt Pòl pou l te rete poukont li, ak sòlda ki t ap veye l la.
17
Epi, sa vin rive ke twa jou apre sa, Pòl te voye rele chèf nan pami Juif yo. Lè yo te rasanble, li di yo: Mesye e frè yo, atout mwen pa t komèt anyen kont pèp la, oswa kont koutim zansèt nou yo, twouve ke yo te arete m nan Jerizalèm e yo te livre m nan men Women yo.
18
Yo menm atò, lè yo te egzamine m, yo te vle lage m; paske pa t gen anyen nan mwen ki pou ta fè m merite lanmò.
19
Men, lè Juif yo te fè opozisyon kont sa, m te blije mande pou m konparèt devan Seza; se pa ke m gen yon akizasyon m ap fè kont nasyon mwen an.
20
Alò, se rezon sa a ki fè m te voye rele nou an; pou m te wè nou, e pale ak nou; paske, se poutèt esperans Izrayèl la wi ki fè m mare nan chenn sa a.
21
Epi, yo di l konsa: Nou pa ni resevwa lèt ki soti Jide sou ou, nitou pa gen okenn nan frè ki vini yo ki montre oubyen ki di anyen mal sou ou.
22
Men, nou ta renmen tande w, pou w di nou sa w panse; paske, kanta pou sèk relijye sa a, nou konnen ke se toupatou y ap pale kont li.
23
Epi, apre ke yo te fin fikse yon jou pou li, se anpil nan yo ki te vin jwenn li kote l te rete a; se ba yo menm ke misye te eksplike e temwaye wayòm Bondye a, li te konvenk yo sou sa ki konsène Jezi, alafwa nan lalwa Moyiz la ak nan pwofèt yo; li te fè sa depi nan maten rive jis nan aswè.
24
Konsa, kèk moun te kwè bagay sa ki te pale yo; e, kèk lòt pa t kwè.
25
Alèkile, kòm yo pa t ka antann yo youn ak lòt, anvan y ale, Pòl te di yo yon pawòl: Lespri Sen an te byen pale wi lè ke pa mwayen pwofèt Ezayi, bay zansèt nou yo,
26
Li te di: Ale kote pèp sa a, epi di konsa: Se tande n a va tande; men, nou p ap konprann; se gade n a va gade; men, nou p ap wè.
27
Paske, kè pèp sa a fin andisi; epi, yo tande di nan zòrèy; e, yo pito fèmen je yo; tan pou yo ta wè ak je yo, tande ak zòrèy yo, konprann ak kè yo; lèfini, yo ta va konvèti; epi, Mwen ta va geri yo.
28
Kidonk, sa nou dwe konnen, sèke sali nanm Bondye a, se bay Payen yo Li voye l; e ke se yo menm ki va tande l.
29
E, lè misye te fin di pawòl sa yo, Juif yo ale; yo te gen anpil diskisyon pami yo.
30
Epi, Pòl pase dezan anplen nan pwòp kay pa l ke li te lwe; li te resevwa tout moun ki te vin kote l.
31
Li t ap preche wayòm Bondye a; epi, avèk asirans, li t ap anseye bagay ki konsène Senyè Jezi yo; pyès moun pa t anpeche l.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!