Liv Women
Chapit 1
Klike la pou koute lekti chapit sa1
Pòl, yon sèvitè Jezi Kris, ki te aple pou vin apot, ki te separe apa pou levanjil Bondye a,
2
(ke Li te pwomèt davans pa mwayen pwofèt Li yo, nan ekriti sent yo)
3
Osijè de Pitit Gason Li a, Jezi Kris Senyè nou an, ki te fèt nan desandans David daprè lachè;
4
e, ke yo deklare ki se Pitit Gason Bondye ak puisans, daprè Lespri Sentete a, pa mwayen rezireksyon Li pami mò yo.
5
Se pa mwayen Li menm ke nou resevwa e gras, e pòs apot la, pou obeyisans nan lafwa nan non Li, pami tout nasyon yo.
6
Se pami yo nou ye tou, nou menm ki se Aple Jezi Kris yo.
7
A tout byenneme Bondye yo ki nan Wòm, ki aple pou vin sen, gras pou nou, ak lapè Bondye, Papa nou an, e Senyè Jezi Kris.
8
Premyèman, mwen remèsye Bondye mwen an, pa mwayen Jezi Kris, pou nou tout, difèt ke y ap pale de lafwa nou, nan lemonn antye.
9
Paske Bondye se temwen m, Li menm ke m ap sèvi avèk lespri m nan levanjil Pitit Gason Li a, ke se san rete mwen nonmen non nou nan lapryè m yo.
10
M ap mande, si ta ka gen mwayen kounye a anfen, selon volonte Bondye, ke mwen te ka jwenn jou kè kontan sa a, pou m ta vin jwenn nou.
11
Paske, mwen anvi wè nou, dekwa pou m ta pataje kèk kado espirityèl avèk nou ansòt ke nou ta vin djanm.
12
Ki vle di ke m ta va rekonfòte ansanm avè nou pa mwayen lafwa nou toude genyen an, e nou menm, e mwen menm.
13
Konsa tou, mwen pa ta vle pou nou pa konnen, frè m yo, ke an plizyè fwa mwen te deside ale kote nou (men, sa pa t rive fèt jiskisi), dekwa pou mwen ta ranmase kèk fwi pami nou tou, menm jan sa rive pami lòt pèp yo.
14
Mwen gen dèt anegad e Grèk yo, e Baba yo; anegad e saj yo, e egare yo.
15
Kidonk, kanta pou mwen menm, mwen pare pou m preche levanjil la bay nou menm tou ki nan Wòm.
16
Paske, mwen pa wont levanjil Kris la, li se puisans Bondye pou sali nanm tout moun ki kwè; pou Jwif yo anpremye, epitou pou Grèk yo.
17
Paske tou, se ladan l ke dwati Bondye parèt aklè, soti nan lafwa pou rive nan lafwa, tankou sa te ekri: Moun ki jis la a va viv pa lafwa.
18
Paske kòlè Bondye parèt aklè nan syèl la kont tout malfezans ak tout enjistis lèzòm, yo menm ki kenbe verite a anchennen anba enjistis.
19
Paske, sa moun kapab konnen de Bondye, li manifeste lakay yo; paske Bondye te montre yo li.
20
Vremanvre, bagay envizib ki nan Li yo, tankou puisans etènèl Li ak divinite Li, parèt aklè depi kreyasyon lemonn, lè w konprann yo daprè bagay sa yo ki kreye a; konsa donk, yo san eskiz;
21
difèt ke lè yo te konnen Bondye, yo pa t glorifye Li antan ke Bondye; nonplis tou, yo pa t rann Li gras; Men, yo te vin pèdi nan imajinasyon san sans, epi kè yo ki te san konprann, te vin nwa kou lank.
22
Nan vante tèt yo kòmkwa yo se moun save, yo vin tounen moun fou,
23
epi yo twoke glwa Bondye ki enkòriptib la pou pòtre ki sanble lèzòm kòriptib, ak zwazo, bèt kat pat, epi bagay ki ranpe.
24
Poutèt sa, Bondye lage yo tou nan salte atravè move lanvi ki nan pwòp kè yo, pouke ant yo menm, yo dezonore pwòp kò yo.
25
Yo menm nan, ki twoke verite Bondye a pou yon manti, epi ki adore ak sèvi kreyati a plis pase Kreyatè a, Li menm ki beni etènèlman. Amèn.
26
Akòz de sa, Bondye lage yo pou vye dezi sansal pote yo ale; paske menm fi yo chanje lizaj natirèl la pou sa ki kont lanati;
27
e konsa tou, pou gason yo, y al kite lizaj natirèl fi a, e yo vin cho nan move lanvi youn pou lòt; gason ak gason ap fè malpwòpte, e yo resevwa nan yo menm menm rekonpans ke derayman yo a merite.
28
E, menm jan ke yo te derefize kenbe Bondye nan memwa yo, Bondye lage yo pou lide deprave pote yo ale, pouke yo fè bagay ki pa konvnab yo.
29
Yo chaje ak tout kalite enjistis, imoralite seksyèl, mechanste, move dezi, malis; yo plen ak anvi, asasinay, goumen, magouy, lide fè moun mal, tripotay;
30
se moun ki bay kout lang, ki rayi Bondye, ki awogan, ki gen gwo tèt, ki grandizè, entelijan nan fè mal, rebèl ak paran yo,
31
ki san bonkonprann, ki pa kenbe pawòl, ki san afeksyon natirèl, ki ensansib, ki pa gen mizerikòd.
32
Yo menm ki konnen jijman Bondye deklare ke moun ki komèt bagay sa yo merite lanmò, nonsèlman yo fè menm bagay yo, Men, yo bat bravo pou moun yo k ap fè yo a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!