Liv Women
Chapit 2
Klike la pou koute lekti chapit sa1
Kidonk, ou sanzeskiz, O lòm, kèlkeswa moun ke w ye a, k ap jije; paske nan sa w ap jije yon lòt moun lan, ou kondane tèt ou; puiske ou menm k ap jije a w ap fè menm bagay yo.
2
Men, nou asire ke jijman Bondye ap kanpe sou laverite kont moun k ap fè bagay sa yo.
3
Èske w panse sa, O lòm? Ou menm k ap jije sila yo k ap fè bagay sa yo, epi k ap fè menm bagay yo a, èske w panse ke w ava chape anba jijman Bondye?
4
Oswa, èske se meprize w meprize richès bonte ak san-sipòtan, epi pasyans Li, difèt ke w pa rekonèt ke bonte Bondye ap mennen w nan repantans?
5
Men akòz tètdi epi kè w ki derefize repanti a, se ranmase w ap ranmase kòlè sou tèt ou nan jou kòlè a, lè jijman ki jis Bondye a, ap vin parèt aklè,
6
Li menm ki gen pou Li remèt chak moun daprè zèv pa l yo.
7
Pou sila yo ki, ak pasyans e ak pèseverans nan fè sa ki bon, yo t ap chèche laglwa, onè ak imòtalite, se va lavi etènèl.
8
Men, pou sila ki rebèl yo, e k ap dezobeyi laverite a, men k ap obeyi enjistis, se va gwo fache ak kòlè.
9
Se va tribilasyon ak touman pou nanm tout moun k ap fè mal; pou Jwif la anpremye, epitou, pou Payen an.
10
Men, se va laglwa, onè ak lapè pou tout moun k ap fè byen; pou Jwif la anpremye, epitou pou Payen an.
11
Paske pa gen paspouki ak Bondye.
12
Paske, tousa yo ki peche san lalwa, a va peri tou san lalwa; epi, tousa yo ki peche nan lalwa, a va jije pa lalwa.
13
Paske, se pa moun yo ki tande lalwa a ki jwenn jistis devan Bondye, men se moun yo ki obsève lalwa a ki va jistifye.
14
Paske, lè Payen yo, yo menm ki pa t gen lalwa a, fè bagay ki nan lalwa a, tankou se yon bagay ki natirèl lakay yo, yo menm ki pa gen lalwa a, vin tounen yon lalwa pou pwòp tèt pa yo.
15
Sa demontre ke zèv lalwa a ekri anndan kè yo; epitou, konsyans yo se temwen; lèfini, lide nan tèt yo ap swa akize, swa eskize youn ou lòt,
16
nan jou kote Bondye va jije sekrè lèzòm pa mwayen Jezi Kris, daprè levanjil mwen an.
17
Gade non, yo rele w yon Juif, e ou apiye sou lalwa, epi w itilize Bondye pou vante tèt ou,
18
epi, ou konnen volonte Li, e ou dakò ak bagay ki pi ekselan yo, difèt ke w te enstwi nan lalwa;
19
lèfini, ou asire tèt ou ke se yon gid ou ye pou avèg yo, yon limyè pou moun yo ki nan fènwa;
20
e ke w se yon anseyan pou egare, yon pwofesè pou timoun, difèt ke w gen fòm konesans ak laverite nan lalwa a;
21
Ou menm alò k ap anseye yon lòt la, ou pa anseye tèt pa w? W ap preche moun pou yo pa vòlè; èske w ap vòlè?
22
W ap di ke yon moun pa dwe komèt adiltè; èske w ap komèt adiltè? Ou menm ki pa vle wè zidòl, èske w ap komèt sakrilèj?
23
Ou menm ki pran lalwa pou vante tèt ou; lè w ap vyole lalwa, èske se pa dezonore w ap dezonore Bondye?
24
Paske y ap blasfeme non Bondye pami pèp Payen yo akòz ou menm, tankou sa te ekri a.
25
Paske, sikonsizyon benefisye w vremanvre, si w obsève lalwa. Paske avrèdi, sikonsizyon benefisye w, si w kenbe lalwa; men, si w ap vyole lalwa, sikonsizyon w nan vin tounen ensikonsizyon.
26
Kidonk, si ensikonsi a kenbe dwati lalwa a, èske ensikonsizyon l nan, pa ta dwe konte kòm sikonsizyon?
27
Epitou, èske ensikonsi ki natirèl la, si li akonpli lalwa, li pa ta dwe jije w, ou menm ki gen lèzekriti ak sikonsizyon, epi k ap vyole lalwa a?
28
Paske, se pa yon Jwif li ye non, sila a ki se yon Jwif sou deyò kò l; nonplis tou, se pa sikonsizyon l ye non, sa ki andeyò nan lachè a.
29
Men pito, Jwif la, se sila a ki se yon jwif anndan kò l; epi sikonsizyon an, se sikonsizyon kè w, nan lespri, e nonpa nan lèzekriti; e, louwanj pou moun sa a, se pa kote lèzòm non l ap soti, men se kote Bondye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!