Liv Women
Chapit 3
Klike la pou koute lekti chapit sa1
Ki avantaj Jwif la genyen menm? Oswa, ki pwofi ki genyen nan sikonsizyon an?
2
Tout jan w gade l, li anpil; toudabò, difèt ke se te nan men yo ke ekriti Bondye yo te konfye a.
3
Bon, e si kèk nan yo pa t kwè? Èske pa t kwè yo a va lakòz fidelite Bondye a vin anile?
4
Mande Bondye padon non! Wi, kite ke se Bondye ki di laverite, epi pou tout moun se mantè; jan sa te ekri a: Dekwa pou Ou ka gen jistifikasyon nan pawòl Ou yo, epi pou ke se Ou ki gen laviktwa lè yo jije W.
5
Men, si se enjistis nou ki ta demontre jistis Bondye, kisa nou ta di menm? Èske Bondye enjis palefèt ke Li pran vanjans lan? (M ap pale tankou yon moun)
6
Mande Bondye padon non! Paske, si se ta pou sa, kijan Bondye ava jije lemonn?
7
Bon, e si verite Bondye a ta pran jarèt pa mwayen yon manti m bay pou glwa Li; atò, poukisa pou m twouve ap jije kòm pechè ankò?
8
Epitou, sa k fè nou pa di: (tankou moun k ap denigre m yo deklare ke mwen di a) An nou fè sa ki mal pou byen ka soti ladan l? Kondanasyon moun sa yo jistifye.
9
Alò, sa ki rive? Èske nou miyò pase yo? Non, ditou! Paske talè a, nou sot demontre ke e Jwif e Payen, yo tout anba peche.
10
Jan sa te ekri a: Pa gen okenn ki dwat, pa menm yon grenn.
11
Pa gen okenn ki konprann, pa gen okenn k ap chèche Bondye;
12
yo tout pèdi kite chemen an, yo tout ansanm vin pa vo anyen, pa gen okenn k ap fè byen; non, pa menm yon grenn.
13
Gòj yo se yon kavo tou louvri; yo simayen twonpri ak lang yo; se pwazon sèpan aspik ki anba po bouch yo.
14
Epi bouch moun sa yo plen avèk mo sal ak rayisab.
15
Pye yo lejè pou fè san koule.
16
Se destriksyon ak mizè ki sou chemen yo;
17
lèfini, yo pa t janm konnen chemen lapè a;
18
epi, pa gen okenn krentif pou Bondye devan je yo.
19
Kounye a, nou konnen ke nenpòt kisa lalwa a di, li di l a moun yo ki anba lalwa a, pou ka fèmen tout bouch, epi, pou lemonn antye vin koupab devan Bondye.
20
Kidonk, pa mwayen zèv lalwa yo, pa gen pyès moun k ap jistifye devan je Li. Paske, se ak lalwa a nou vin konn sa peche ye.
21
Men kounye a, san lalwa a, jistis Bondye vin parèt aklè, e, li gen lalwa ak pwofèt yo kòm temwen.
22
Se jistis Bondye sa a menm ki vini pa mwayen lafwa nan Jezi Kris sou tout e pou tout sila yo ki kwè; puiske pa gen okenn diferans:
23
Paske tout moun peche, e yo pa rive jwenn glwa Bondye;
24
yo menm atò, yo jistifye gratis pa gras Li atravè redanmsyon ki nan Jezi Kris la,
25
Li menm ke Bondye te chwazi depi davans pou pwopisyasyon (viktim boukantay) atravè lafwa nan san Li, pouke Li deklare jistis Li annegad padon peche ki te komèt pandan tan pase yo, nan epòk Bondye te frennen jijman L lan;
26
pou ke Li deklare, jan m di l la, jistis Li kounye a, dekwa pou Li ka jis, e pou se Li ki jistifye moun yo ki kwè nan Jezi a.
27
Alò, kote ka gen vante tèt la a? Li pa ka la! Daprè ki lwa? Èske se zèv? Non! Men pito, daprè lwa lafwa a.
28
Konsa donk, nou dakò pou n di ke yon moun jistifye pa mwayen lafwa, san zèv lalwa yo.
29
Bon, èske se Bondye Jwif yo Li ye sèlman? Èske Li pa pou Payen yo tou? Wi, Li pou Payen yo tou!
30
Puiske gen yon sèl Bondye, se Li ki va jistifye sikonsi yo ak lafwa, epi ensikonsi yo pa mwayen lafwa.
31
Bon, èske se anile nou anile lalwa pa mwayen lafwa a? Mande Bondye padon non! Okontrè, se tabli nou tabli lalwa a!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!