Liv Women
Chapit 5
Klike la pou koute lekti chapit sa1
Konsa donk, difèt ke nou jistifye pa lafwa a, nou gen lapè ak Bondye pa mwayen Senyè nou an Jezi Kris.
2
Se pa mwayen Li menm tou pa lafwa, ke nou gen aksè a gras sa ke nou kanpe fèm ladan l lan, e ke nou rejwi ladan l, nan esperans glwa Bondye.
3
E se pa sa sèlman; nou bay glwa nan tribilasyon tou, paske nou konnen ke tribilasyon pwodwi pasyans,
4
e pasyans, eksperyans; e eksperyans, esperans.
5
Epitou, esperans lan pa fè nou wont, paske lanmou Bondye blayi anndan kè nou pa Lespri Sen ke yo te ban nou an.
6
Paske, menm lè nou te san fòs, Kris te mouri pou moun ki san respè pou Bondye yo, nan tan ki te fikse a.
7
Vremanvre, se apenn si yon moun ta dakò mouri pou youn ki dwat; e petèt, sa t a ka rive ke yon moun aksepte mouri pou yon moun de byen;
8
Men, Bondye demontre lanmou Li pou nou, nan fason sa a: pandan menm ke nou te pechè a, Kris te mouri pou nou!
9
Donk, se plis rezon toujou, puiske nou jistifye pa mwayen san Jezi, nou va sove anba kòlè, gras a Li.
10
Paske, si lè nou te lènmi, nou te vin rekonsilye ak Bondye pa mwayen lanmò Pitit Gason Li a, se plis ankò, ke n ap sove gras a lavi Li.
11
E, se pa sa sèlman; nou gen lajwa tou nan Bondye atravè Senyè nou an, Jezi Kris, Li menm ke nou jwenn rekonsilyasyon an gras a Li a.
12
Se sa ki fè, menm jan ke se pa mwayen yon nonm ke peche antre nan lemonn, epitou lanmò vini pa mwayen peche, sa ki lakòz ke lanmò vin blayi sou tou lèzòm, paske yo tout peche;
13
(paske, jis lè lalwa te vini, peche te sou latè, men, peche pa konte lè pa gen lalwa.
14
Alòske, lanmò te domine depi sou Adan rive sou Moyiz, menm sou sila yo ki pa t peche daprè menm vyolasyon Adan te komèt la, li menm ki te yon reprezantasyon Moun sa ki te gen pou Li vini an.
15
Men, ofans lan pa menm jan ak kado gratis la non! Paske, si atravè ofans yon sèl moun, anpil moun jwenn lanmò, se plis ankò ke gras Bondye a, ak kado ki vin pa mwayen gras la, yo va tonbe ann abondans sou anpil moun; e sa soti nan yon sèl moun, Jezi Kris.
16
Epi ankò, jan sa te ye pou yon sèl ki te peche a, se pa konsa sa ye pou kado a non! Paske jijman an te vin kondanasyon apre yon sèl ofans, men kado gratis la mennen nan jistifikasyon apre anpil ofans.
17
Paske ankò, si poutèt ofans yon sèl òm, lanmò vin domine akòz li menm sèl, se plis toujou ke sila yo ki resevwa yon abondans gras ak kado jistis la, yo va dirije lavi yo, pa mwayen yon sèl Òm, Jezi Kris.)
18
Konsa donk, menm jan poutèt ofans yon sèl òm, jijman tonbe sou tèt tou lèzòm, pou rive nan kondanasyon; se konsa tou, ke pou jistis yon sèl Òm, kado gratis la blayi sou tou lèzòm, pou rive nan jistifikasyon lavi a.
19
Epi ankò, menm jan, pa dezobeyisans yon sèl òm, anpil moun te vin pechè, se konsa tou ke pa obeyisans yon sèl Òm, anpil moun ap vin jis.
20
Anplis de sa, lalwa a parèt, pou ofans nan ka debòde. Men, kote peche debòde, gras la Li menm, debòde plis pase l toujou.
21
Kidonk, menm jan peche domine pou mennen nan lanmò a, se konsa tou ke gras la va domine atravè jistis, pou mennen nan lavi etènèl pa mwayen Jezi Kris, Senyè nou an!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!