Liv Women
Chapit 8
Klike la pou koute lekti chapit sa1
Kounye a alò, pa gen okenn kondanasyon pou moun yo ki nan Kris Jezi, yo menm ki p ap mache daprè lachè, men pito, daprè Lespri a.
2
Paske, lalwa Lespri lavi a, pa mwayen Kris Jezi, te fè m libere anba lalwa peche ak lanmò a.
3
Paske, sa lalwa pa t ka fè, difèt ke li te fèb atravè lachè, Bondye te voye pwòp Pitit Gason pa Li a, nan resanblans lachè peche a, e poutèt peche, pou Li te ka kondane peche nan lachè.
4
Dekwa pou jistis lalwa a kapab akonpli nan sila yo ki p ap mache daprè lachè, men, daprè Lespri a.
5
Paske, moun k ap mache daprè lachè yo, se zafè lachè yo okipe; alòske, moun k ap mache daprè Lespri a, okipe zafè Lespri a.
6
Paske, lè lide nan tèt ou sou zafè lachè, se lanmò; men, lè lide nan tèt ou sou zafè Lespri a, se lavi ak lapè.
7
Paske tou, lide sa ki nan lachè a, se opozisyon kont Bondye, difèt ke l pa koube tèt li devan lalwa Bondye a, e li pa t ap kapab nonplis.
8
Kidonk, moun yo k ap viv nan lachè, pa kapab fè Bondye plezi.
9
Alòske nou menm, nou pa p viv nan lachè, men pito, nan Lespri a, si se vre ke Lespri Bondye abite nan nou. Kounye a alò, depi kèlkeswa moun lan pa gen Lespri Kris, sèke li pa ankenn pou Li vre.
10
E, si Kris nan nou, kò a mouri poutèt peche, men Lespri a se lavi, poutèt jistis.
11
Men, si Lespri Sila ki resisite Jezi pami mò yo a, abite nan nou, Li menm ki te resisite Kris pami mò yo, a va bay kò mòtèl nou yo lavi tou, pa mwayen Lespri Li ki abite nan nou an.
12
Kidonk, frè yo, nou se moun ki gen dèt nou ye, men se pa lachè nou dwe, kòmsi pou nou ta viv daprè lachè!
13
Paske, si se daprè lachè n ap viv, n ap mouri; men si, pa mwayen Lespri a, nou tiye tout aksyon kò a, nou va gen lavi.
14
Paske, tout moun ki gide pa Lespri Bondye, se pitit Bondye yo ye.
15
Paske tou, nou pa t resevwa yon lespri esklavaj ki pou ta lakòz ke nou pè toujou; men pito, nou resevwa Lespri adopsyon an, e se pa mwayen Li ke nou rele: Abba! Papa!
16
Lespri a poutèt pa L rann temwayaj bay lespri pa nou, ke se pitit Bondye nou ye.
17
E, si se pitit, donk eritye, eritye Bondye, epi, eritye ansanm ak Kris, si sa rive nou soufri avèk Li, dekwa pou ke ansanm, nou ka glorifye tou.
18
Paske, mwen konsidere ke soufrans yo nan tan kounye a, pa merite pou yo ta konpare ak glwa sa ki va gen pou vin parèt aklè nan nou an.
19
Paske, kreyasyon an, se ak kè cho ke l ap ret tann aparisyon aklè pitit gason Bondye yo.
20
Vremanvre, kreyasyon an te vin soumèt anba vanite, e se pa li ki te deside sa, men se te volonte Sila ki soumèt li a, ak esperans.
21
Konsa, kreyasyon an li menm tou a va delivre anba esklavaj koripsyon an, pou li vini nan libète sa ki plen ak glwa, ke pitit gason Bondye yo genyen an.
22
Paske, nou konnen, e se tout kreyasyon an k ap plenn e ki gen doulè tranche yo tout ansanm jis kounye a.
23
E, se pa yo sèlman, se nou menm tou, ki gen fwi premye dòn Lespri a; menm nou menm, n ap plenn nan kè nou, n ap ret tann pou adopsyon an vin vit, ak redanmsyon kò nou.
24
Vremanvre, nou sove pa mwayen esperans; men, yon esperans ki vizib, se pa esperans li ye; paske, sa yon moun deja wè, poukisa pou l ta gen esperans ankò pou li?
25
Men, si nou gen esperans pou sa nou pa wè, lè sa a, n ap ret tann li ak pasyans.
26
Se konsa tou ke Lespri a ede feblès nou yo; paske, nou pa konnen sa nou ta dwe lapriyè pou yo a, jan ke nou ta sipoze konn sa. Men, Lespri a Li menm, pran defans kòz nou ak plenn ke okenn mo pa ka eksplike sa L di.
27
Lèfini, Sila ki sonde kè yo, Li konnen sa ki nan lide Lespri a, paske, L ap defann kòz sen yo ann akò ak volonte Bondye.
28
E, nou konnen ke tout bagay travay ansanm pou byen moun ki renmen Bondye yo, pou moun ki se aple yo daprè plan Li.
29
Paske, sila ke Li te konnen davans yo, Li te ranje sa davans tou pou ke yo konfòm ak pòtre Pitit Gason Li a, dekwa pou Pitit Gason an te ka premye pitit pami anpil frè.
30
Anplis de sa, sila ke Li te chwazi davans yo, se yo tou ke Li te rele; e, sila ke Li te rele yo, se yo tou ke Li te jistifye; e, sila ke Li te jistifye yo, se yo tou ke Li te glorifye.
31
Kisa nou va di de bagay sa yo? Si Bondye pou nou, kilès ki va kont nou?
32
Li menm ki pa t epànye pwòp Pitit Gason L lan, men ki te livre L bay, pou nou tout, kòman pou Li pa ta ban nou tout bagay gratis tou, avèk Pitit Gason an?
33
Kilès ki va vin pote akizasyon kont moun Bondye chwazi yo? Se Bondye ki jistifye!
34
Kilès sa a ki kapab kondane? Se Kris wi ki te mouri! E plis ankò, Li te resisite, Li menm ki chita sou men dwat Bondye, epi k ap defann kòz nou.
35
Kisa ki va separe nou de lanmou Kris? Èske se va tribilasyon, oswa detrès, oswa pèsekisyon, oswa famin, oswa san rad pou n mete, oswa gwo danje, oswa zam epe?
36
Jan sa te ekri a: Se poutèt Ou ke y ap tiye nou tout lajounen; yo konte nou tankou mouton ki pou labatwa!
37
Men, nan tout bagay sa yo, nou gen plis ke laviktwa gras a Li menm ki renmen nou an.
38
Paske, mwen gen asirans ke ni lanmò, ni lavi, ni zanj, ni chèf nan syèl, ni fòs pouvwa, ni sa ki la kounye a, ni sa ki gen pou vini,
39
ni wotè, ni pwofondè, ni lòt kreyati, pa kapab separe nou ak lanmou Bondye ki nan Jezi Kris, Senyè nou an!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!