Liv Women
Chapit 11
Klike la pou koute lekti chapit sa1
Alò, mwen mande: Èske se lage Bondye lage pèp Li a? Mande Bondye padon non! Paske, mwen menm tou, mwen se yon Izrayelyen, pami desandans Abraram nan, e ki soti nan tribi Benjamen an.
2
Bondye pa lage pèp Li a ke Li te konnen davans lan. Èske nou pa konnen kisa Lekriti te di de Eli? Jan ke misye te pot plent bay Bondye kont Izrayèl; li te di:
3
Senyè, yo tiye pwofèt Ou yo; yo chavire lotèl Ou yo! E, mwen sèl ki rete, epi y ap chèche pran lavi m!
4
Men, kisa repons Bondye a te di misye? Mwen te rezève sètmil òm apa pou Mwen; moun ki pa met jenou atè devan pòtre Bahal.
5
Se menm jan an tou pou tan kounye a, gen yon ti rès.
6
E, si se pa mwayen gras, alò, se pa zèv ankò, osinon gras la pa t ap gras ankò. Men, si se pa mwayen zèv, donk, se pa gras ankò; sinon, zèv la pa t ap zèv ankò.
7
Alò, kisa ki rive? Izrayèl pa t jwenn sa li t ap chèche a; men, Chwazi yo te jwenn li; epi, rès moun yo te gen je yo bouche.
8
(Se daprè jan sa te ekri a: Bondye te ba yo yon lespri tèt lou, je pou yo pa ka wè, ak zòrèy pou yo pa ka tande, jis jounen jodi a.
9
E, David te deklare: Se pou tab yo a vin tounen yon pyèj, ak yon pèlen, e yon pyè dachopman, ansanm ak yon chatiman pou yo!
10
Se pou je yo nan fènwa pou yo pa ka wè; epi, fè ke do yo koube tout tan!
11
M ap mande alò: Bite yo bite a, èske se pou yo ka tonbe? Mande Bondye padon non! Okontrè, se pa mwayen bite yo a ke sali nanm vin rive jwenn Payen yo, yon fason pou fè yo fè jalouzi.
12
Kounye a la, si bite yo bite a vin richès pou lemonn, epi, desann yo desann nan vin richès pou Payen yo, èske sa p ap plis ankò lè yo vin okonplè?
13
Paske se ak nou menm Payen yo ke m ap pale, palefèt ke se apot Payen yo ke m ye, m ap fè elòj ministè m lan,
14
pou si nan nenpòt jan mwen ta ka eksite jalouzi lakay sila yo ki ras mwen yo, dekwa pou m ta sove kèk nan yo.
15
Paske, si rejte yo rejte yo a se rekonsilyasyon sa pote ak lemonn, kisa sa va ye menm lè yo va resevwa yo; èske se p ap lavi sa pote pami mò yo?
16
Paske, si premye fwi yo sen, tout lo a sen tou; e, si rasin nan sen, branch yo sen tou.
17
E, si kèk nan branch yo te koupe, lèfini, ou menm ki se yon pye oliv mawon, yo te vin grefe w nan yo, e ke w ap pataje e rasin, e grès pye oliv la;
18
se pa pou w vante tèt ou devan branch yo. Epi, si w vante tèt ou, se pa ou menm k ap pote rasin nan, men pito, se rasin nan k ap pote w.
19
Alò, w a va di konsa: Branch yo te koupe dekwa pou m te ka grefe ladan l!
20
Se vre, poutèt kwè yo pa t kwè a, yo te koupe rache, lèfini, ou menm, ou te kanpe pa lafwa. Men, pinga w gonfle lestomak ou, gen krentif pito.
21
Paske, si Bondye pa t epànye branch ki natirèl yo, fè atansyon pou Li pa ta va epànye w nonplis.
22
Konsa donk, gade pou w wè bonte ak severite Bondye: Ak yo menm ki tonbe a, severite; alòske nan ka pa w la, bonte, si w kontinye rete nan bonte Li a; si se pa sa, ou menm tou, y a va koupe rache w tou.
23
Konsa tou pou yo menm, si yo pa pèsiste nan pa kwè yo a, y a va grefe ladan l; paske, Bondye kapab grefe yo ankò.
24
Paske, si ou menm, ou te koupe rache soti nan yon pye oliv ki mawon daprè nati li, lèfini, ou te vin grefe nan yon bon pye oliv, opoze ak nati w, èske sa pa va plis toujou, pou yo menm ki se branch natirèl, yo ta grefe nan pwòp pye oliv pa yo a?
25
Paske, mwen pa ta vle, frè yo, ke nou pa ta konn mistè sa a, pou sa pa rive ke nou ta pran tèt nou pou moun ki entelijan; sèke anpati, gen yon ‘pa ka wè’ ki tonbe sou Izrayèl, jiskaske kantite Payen yo a vin antre okonplè.
26
Epi konsa, tout Izrayèl va sove; jan sa te ekri a: Se va nan Siyon ke Liberatè a ap soti; e, Li va fè malveyans vire soti sou Jakòb.
27
Paske, sa se kontra M avèk yo, lè M a va wete peche yo.
28
Nan sa ki gen pou wè ak levanjil la, yo se lènmi poutèt nou menm; men, konsènan eleksyon an, yo se byenneme poutèt zansèt yo.
29
Vrèmanvre, kado Bondye yo ak apèl Bondye a pa gen chanjman.
30
Paske, nan tan anvan yo, nou pa t kwè Bondye, epoutan, nou resevwa mizerikòd atravè pa kwè yo a.
31
E, menm jan an, sila yo tou ki kounye a pa byenneme, atravè mizerikòd pa w la, yo ka jwenn mizerikòd tou.
32
Paske, Bondye fèmen yo tout nan enkredilite, dekwa pou Li ka gen mizerikòd pou tout moun.
33
Se pa ti kalite pwofondè richès ki genyen nan sajès ak nan konesans Bondye! Jan ke pa gen mwayen sonde jijman Li yo, ni pa gen mwayen konprann chemen Li yo!
34
Vremanvre, kiyès ki te konnen lide ki nan tèt Senyè a? Oswa ankò, kiyès ki te yon konseye pou Li?
35
Oubyen toujou, kiyès ki te ba Li anvan, jis pou moun lan ta rive jwenn rekonpans pou sa?
36
Paske, se de Li menm, e se atravè Li menm, e se pou Li menm ke tout bagay egziste. Se Li menm ki pou gen glwa etènèlman! Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!