Liv Women
Chapit 12
Klike la pou koute lekti chapit sa1
Poutèt sa, m ap ankouraje nou, frè yo, daprè mizerikòd Bondye yo, pou nou prezante kò nou tankou yon sakrifis vivan, ki sen, ki akseptab devan Bondye; se va yon sèvis ki rezonab pou nou bay Bondye.
2
Lèfini, se pa pou n ap kopye sa k ap fèt nan monn sa a, men pito, se pou nou vin transfòme pa mwayen renouvle lespri nou renouvle a, dekwa pou nou kapab demontre sa ki bon an, ki akseptab, e ki kòrèk nèt nan volonte Bondye.
3
Kidonk, m ap di sa, daprè gras ke Bondye ban mwen an, a chak moun ki pami nou, pou li pa panse pi wo de tèt li ke sa ke li ta dwe panse; men pito, se pou li panse ak tèt klè, daprè jan ke Bondye pataje mezi lafwa bay chak moun.
4
Paske, menm jan nou gen plizyè manm nan yon sèl kò a, e ke tout manm yo pa gen menm djòb la,
5
konsa tou, nou menm ki plizyè a, nou fè yon sèl kò nan Kris, epi nou tout se manm youn lòt.
6
Nou genyen don ki diferan, daprè gras ki vin jwenn nou an; si se ta va pwofesi, se pou nou pwofetize ann akò ak pòsyon lafwa a;
7
Oubyen, si se ministè, se pou nou itilize l nan rann sèvis; oswa, sila k ap anseye a, se pou l itilize l nan ansèyman;
8
oswa, sila k ap ankouraje a, nan ankourajman; sila k ap bay la, se pou l bay san rezèv; sila k ap dirije a, se pou l fè l ak devouman; sila k ap montre mizerikòd la, se pou l fè l ak kè kontan.
9
Se pou lanmou san okenn ipokrizi. Rayi sa ki mal; kenbe fèm nan sa ki byen.
10
Se pou nou, ak jantiyès, montre afeksyon youn pou lòt avèk lanmou fratènèl; nan onè, se pou nou youn konsidere lòt plis pase tèt li.
11
Nou pa dwe parese nan travay n ap fè. Se pou nou gen devouman nan lespri nou. Se pou nou sèvi Senyè a.
12
Se pou nou nan lajwa akòz esperans; gen pasyans nan tribilasyon; kontinye lapryè san rete;
13
Kontribye nan bezwen ke sen yo genyen; pre pou nou resevwa etranje lakay nou.
14
Beni moun k ap pèsekite nou yo, beni, pinga modi!
15
Rejwi ak sila k ap rejwi yo, epi kriye ak sila k ap kriye yo.
16
Se pou nou gen menm santiman youn pou lòt; pa gen anbisyon pou gwo bagay, men pito, bese tèt nou nan nivo moun ki malere; pinga met nan tèt nou ke n entelijan.
17
Pa rann pèsonn moun mal pou mal. Fè sa ki onèt devan je tout moun.
18
Si sa posib, toutotan ke sa depann de nou, viv nan lapè ak tout moun.
19
Chè byenneme, pa tire revanch pou pwòp tèt nou, men pito, kite plas pou kòlè; paske, men sa ki te ekri: Vanjans se zafè pa Mwen, se Mwen ki va bay peman! Senyè a ki di sa.
20
Konsa donk, si lènmi w grangou, ba l manje; si li swaf, ba l bwè; paske lè w fè sa konsa a, ou va sanble chabon dife sou tèt li.
21
Pa kite pou w ta pèdi batay kont sa ki mal, men, se pou w gen laviktwa sou sa ki mal, pa mwayen sa ki byen.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!