Liv Women
Chapit 13
Klike la pou koute lekti chapit sa1
Se pou tout moun soumèt a otorite ki anlè tèt yo. Paske, pa gen okenn otorite apa de sa ke Bondye bay; e, otorite ki ekziste yo, se Bondye ki tabli yo.
2
Kidonk, nenpòt moun ki reziste kont otorite a, l ap reziste kont lòd Bondye; e, moun sa yo k ap reziste a, va resevwa malediksyon pou tèt pa yo.
3
Paske, dirijan yo pa fè pè poutèt bòn zèv ke moun ap fè, men poutèt sa ki mal. Èske w ta vle pa pè otorite? Alò, fè sa ki byen, konsa w a va jwenn konpliman nan men l.
4
Paske, se sèvitè Bondye li ye sou ou, pou byen w; men, si w ap fè sa ki mal, ou mèt pè, paske li pa pote zam epe a pou anyen. Vrèmanvre, se sèvitè Bondye li ye, li la pou pran revanj e egzekite kòlè kont moun nan k ap fè sa ki mal la.
5
Konsa donk, nou dwe soumèt nou non sèlman poutèt kòlè a, men tou, pou rezon konsyans.
6
Se pou rezon sa a tou kifè w peye enpo; paske, se minis Bondye yo ye, y ap okipe de bagay sa a menm.
7
Alò, remèt chak moun sa ke w dwe l: enpo bay sa ke w dwe enpo; taks bay sa ke w dwe taks; onè bay sa ke w dwe bay onè.
8
Pinga dwe okenn moun anyen, sof pou nou gen lanmou youn pou lòt; paske, moun nan ki renmen lòt la, li akonpli lalwa a.
9
Konsa donk: Ou pa dwe komèt adiltè, Ou pa dwe asasinen, Ou pa dwe vòlè, Ou pa dwe bay fo temwayaj, Ou pa dwe gen anvi pou bagay lòt moun, e, si ta gen lòt kòmandman toujou, yo tout ka rezime nan yon sèl pawòl, ki se: Ou va renmen pwochen w tankou ke w renmen tèt pa w.
10
Lanmou pa fè sa ki mal kont pwochen li; kidonk, lanmou se akonplisman lalwa a.
11
Epi, difèt ke nou konnen tan n ap viv la, e ke kounye a, li lè pou nou leve nan dòmi; paske kounye a la a, sali nanm nou pi pre pase lè ke nou te kwè a.
12
Lannuit la vanse fini, jou a fin rive. Alò, se pou nou debarase nou de zèv fènwa yo; epi, se pou nou abiye nou ak zam limyè yo.
13
Se pou nou mache dwat, tankou nou nan fèklè; se pa pou nou nan banbòch ak nan bwè tafya, se pa pou nou nan salte seksyèl ak fònikasyon; se pa pou nou nan fè kont ak nan fè jalouzi.
14
Men pito, se pou nou mete Senyè Jezi sou nou; lèfini, pa fè okenn pwovizyon bay lachè, pou nou ta vin satisfè move dezi li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!