Liv Women
Chapit 14
Klike la pou koute lekti chapit sa1
Sila a ki fèb nan lafwa a, ou va resevwa l, men se pa pou ke w antre nan diskisyon de dout ke l genyen yo.
2
Pa egzanp, youn kwè ke l gen dwa manje tout bagay; yon lòt, ki fèb, manje legim ase;
3
Se pa pou sila ki manje a meprize sila ki pa manje a; nonplis tou, se pa pou sila ki pa manje a jije sila ki manje a; paske Bondye resevwa li.
4
Kiyès ou ye pou w twouve ap jije sèvitè yon lòt moun? Se pou mèt pa li ke swa li va kanpe, swa li va tonbe. Wi, li va ret kanpe, paske Bondye gen puisans pou Li fè l kanpe.
5
Yon moun bay yon jou plis valè pase lòt yo; epi yon lòt moun bay tout jou yo menm valè a; se pou chak moun gen konviksyon pa l nan lespri li.
6
Sila a ki okipe jou a, li okipe l poutèt Senyè a; e, sila ki pa okipe jou a, se poutèt Senyè a ke li pa okipe l. Sila ki manje a, li manje pou Senyè a, paske li rann Bondye gras; epi, sila ki pa manje a, se pou Senyè a ke l pa manje a, e li rann Bondye gras.
7
Vrèmanvre, nou youn pa viv pou tèt pa l, e okenn moun pa mouri pou tèt pa l.
8
Paske, swa ke n ap viv, se pou Senyè a; swa ke n mouri, se pou Senyè a. Kifè, kit n ap viv, kit nou mouri, se pou Senyè a nou ye.
9
Se poutèt sa ke Kris te mouri, e resisite, e vin vivan ankò, dekwa pou Li te ka vin Senyè e mò, e vivan.
10
Men, poukisa w ap jije frè w? Oubyen ou menm, poukisa w ap meprize frè w? Paske nou tout va gen pou kanpe devan fotèy jijman Kris la.
11
Paske, men kisa ki te ekri: Tankou ke M ap viv la, Senyè a di, tout jenou va pliye devan M, epi tout lang va konfese bay Bondye.
12
Kidonk, nou chak va gen pou rann kont de tèt li bay Bondye.
13
Alò, se pa pou nou youn ap jije lòt ankò; men, jije sa a pito: pou okenn moun pa mete yon pyè dachopman osinon yon okazyon pou chite nan chemen frè li.
14
Paske, mwen konnen, e m gen asirans nan Senyè Jezi, ke pa gen anyen ki pa pwòp an li menm; men, moun sa a ki kwè ke yon bagay pa pwòp la, se pou li ke bagay la pa pwòp.
15
Men, si frè w nan lapenn poutèt manje w la, alèkile, ou p ap mache nan lanmou ankò. Pinga avèk manje w la, ou detwi sila ke Kris mouri pou li a!
16
Konsa donk, pa kite pou sa w ap fè byen an, se mal y ap pale de li.
17
Paske, wayòm Bondye a, se pa manje ak bwè li ye; Men, se dwati ak lapè, epi, lajwa nan Lespri Sen an.
18
Paske, sila a k ap sèvi Kris nan jan de bagay tankou sa yo, li fè Bondye plezi, epi, lèzòm dakò ak li.
19
Alò, an nou mache dèyè bagay yo ki pote lapè a, ak bagay sa yo ki va pèmèt ke nou youn edifye lòt.
20
Pinga detwi zèv Bondye a pou manje. Tout bagay pwòp, se vre; men, se yon move bagay pou moun k ap manje a ap ofanse.
21
Sa pa bon pou ni manje vyann, ni bwè diven, ni nenpòt kisa ki lakòz frè w chite oswa fache, oubyen ki fè l febli.
22
Èske w gen lafwa? Ebyen, kenbe l pou tèt ou devan Bondye. Se yon moun ki gen kè kontan, moun sa a ki pa kondane tèt li nan sa ke l aksepte ki fèt.
23
Konsa donk, moun sa ki gen dout la l ap kondane si l manje; paske, li pa manje ak lafwa; paske, tou sa ki pa avèk lafwa, se peche.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!