Liv Women
Chapit 15
Klike la pou koute lekti chapit sa1
Kidonk, nou menm ki fèm yo dwe sipòte feblès fèb yo, olye pou se tèt nou ke n ap fè plezi.
2
Se pou chak moun pami nou menm sèvyab ak pwochen l pou byen l, sa ki va edifye l.
3
Paske menm Kris pa t fè tèt pa Li plezi; men pito, jan sa te ekri a: Jouman sila yo ki t ap fè W repwòch yo, tonbe sou Mwen!
4
Paske, kèlkeswa bagay sa yo ki te ekri alavans lan, yo te ekri pou ansèyman nou, dekwa pouke pa mwayen andirans ak asirans ke Lèzekriti ban nou an, nou ka gen esperans.
5
Kounye a la a, ke Bondye andirans ak konsolasyon an fè ke nou vin gen menm santiman youn pou lòt, daprè Kris Jezi.
6
Dekwa pouke ak yon sèl espri e yon sèl bouch, nou va bay Bondye glwa, Li menm ki Papa Senyè nou an, Jezi Kris.
7
Kidonk, nou youn dwe resevwa lòt, tankou ke Kris Li menm tou te resevwa nou pou glwa Bondye.
8
Kounye a, m ap di ke Jezi Kris te yon minis sikonsizyon an poutèt laverite Bondye a, pou konfime pwomès ki te fèt bay zansèt yo.
9
Epitou, pouke Payen yo ka bay Bondye glwa poutèt mizerikòd Li; jan sa te ekri a: Se pou rezon sa a ke mwen va louwe W nan mitan Payen yo, e mwen va chante pou leve Non W anlè.
10
Apre sa, li di ankò: Rejwi non, nou menm Payen yo, ak pèp Li a!
11
Epi ankò: Louwe Senyè a, nou tout Payen yo; e, selebre Li, nou tout pèp yo!
12
Apre sa ankò, Ezayi te di: A va gen yon rasin ki sot nan Izayi; e, Li va leve pou gouvène sou tèt Payen yo; se nan Li ke Payen yo va mete konfyans yo.
13
Kounye a la a, Bondye esperans lan va plen nou ak tout kè kontan e lapè nan kwayans nou; dekwa pou nou vin gen esperans ann abondans, pa mwayen puisans Lespri Sen an.
14
E, mwen menm tou, mwen gen sa kòm asirans de nou, frè mwen yo, sèke nou plen ak bonte, epi nou plen ak tout kalite konesans ki pèmèt nou youn ka gide lòt.
15
Sepandan, frè yo, mwen te ekri kèk bagay ki yon jan parèt radi, se kòmsi ke m te vle rafrechi memwa nou, poutèt gras la ke Bondye ban mwen an,
16
pouke mwen vin minis Jezi Kris bò kote Payen yo, pou mwen fè sèvis levanjil Bondye a, dekwa pou Payen yo prezante kòm yon ofrann ki va aseptab, ki sanktifye pa Lespri Sen an.
17
Konsa donk, mwen gen dekwa pou m vante tèt mwen atravè Jezi Kris nan bagay sa yo ki gen pou wè ak Bondye.
18
Paske, mwen pa t ap oze pale de okenn bagay ke Kris pa t fè avèk mwen, pou fè Payen yo vin obeyisan, e avèk pawòl, e avèk aksyon;
19
atravè gwo kalite mirak siy ak mèvèy, pa mwayen Lespri Bondye; dekwa pou soti nan Jerizalèm ak zalantou yo, rive Iliri, se nèt ale ke mwen preche levanjil Kris la.
20
Wi, konsa, mwen fè tout efò pou m pa preche levanjil nan kote non Kris te deja nonmen, pou sa pa ta rive ke mwen bati sou fondasyon yon lòt moun.
21
Tankou sa te ekri a: Moun ke yo pa t pale de Li ba yo a, yo va wè; e, sila yo ki pa t tande yo, a va konprann!
22
Se sa ki lakòz tou ke anpil fwa, mwen te gen anpechman pou mwen vin kote nou.
23
Men kounye a, difèt ke mwen pa gen okenn kote ankò nan zòn sa yo, e, difèt ke depi tout ane sa yo mwen gen yon gwo anvi pou m vin kote nou,
24
nenpòt lè ke m ap vwayaje pou m al ann Espay, m ap vin kote nou, paske, mwen gen konfyans ke m ap wè nou pandan vwayaj mwen an; lèfini, n a akonpaye m pou m kontinye ale. Men, anvan sa, fòk mwen fin jwi de tan ke m ap pase avèk nou an.
25
Kounye a la a, mwen pral Jerizalèm, pou m okipe sèvis pou Sen yo.
26
Paske, yo menm nan Masedwàn ak Akayè, yo te pran plezi pou yo te ranmase yon kòlèt pou pòv pami Sen yo ki nan Jerizalèm.
27
Vrèmanvre, sa te fè yo anpil plezi; e, yo dwe yo sa. Paske, si Payen yo vin ap patisipe nan byen espirityèl pa Jwif yo, se devwa yo tou pou ede Jwif yo ak byen materyèl yo.
28
Konsa donk, lè m a fin regle bagay sa a, e ke m remèt yo don sa a, m ap pase kote nou pou m al ann Espay.
29
E, mwen gen asirans ke lè mwen vini kote nou an, mwen va vini nan abondans benediksyon levanjil Kris la.
30
Kounye a, mwen ankouraje nou, frè yo, poutèt Senyè Jezi Kris, e avèk lanmou Lespri Sen an, pou nou lite ansanm avè m, nan lapriyè nou a Bondye pou mwen;
31
pouke mwen va delivre anba sila nan rejyon Jide a ki pa kwè yo, e, pouke Sen yo va aksepte sèvis ke mwen genyen pou m bay nan Jerizalèm nan;
32
dekwa pou mwen ta vin jwenn nou ak kè kontan, selon volonte Bondye, e ke mwen pran yon ti repo avèk nou.
33
Kounye a, se pou Bondye lapè a avèk nou tout. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!