Liv Women
Chapit 16
Klike la pou koute lekti chapit sa1
Mwen rekòmande ban nou, Febe, sè nou, ki se yon sèvant nan legliz ki nan Sankre a;
2
pouke nou resevwa li nan Senyè a, jan sen yo merite sa a; epi, pou nou ba li asistans nan kèlkeswa afè ke li ta bezwen èd nou. Paske, li te pote sekou bay anpil moun, e bay mwen menm tou.
3
Salye Priska ak Akilas, konpayon travay mwen yo nan Kris Jezi.
4
Se moun ki te riske pwòp tèt yo pou lavi pa m; e, se pa mwen menm sèl ki remèsye yo, men, se tout legliz Payen yo tou.
5
Menm jan an tou, salye bon jan byenneme mwen an, Epayinèt, ki se premye fwi nan Akayi pou Kris.
6
Salye Mari, ki te fè anpil travay pou nou.
7
Salye Andwonikis ak Jinyas, fanmi mwen yo, e konpayon m nan prizon; e, ki gen bon renome bò kote apot yo, epitou, ki te nan Kris anvan m.
8
Salye Anpliyas, byenneme mwen an nan Senyè a.
9
Salye Iben, konpayon travay nou nan Kris, ak Estakis, byenneme mwen an.
10
Salye Apelès, ki bay prèv li nan Kris. Salye sila yo ki se moun lakay Aristobil yo.
11
Salye Ewodyon, fanmi mwen an. Salye sila yo ki se moun lakay Nasis yo, sa yo ki nan Senyè a.
12
Salye Trifèn ak Trifoz, k ap travay nan Senyè a. Salye byenneme mwen an, Pèsid, ki travay di nan Senyè a.
13
Salye Rifis, chwazi nan Senyè a, ak manman li, ki se manman m tou.
14
Salye Asankrit, Flegon, Èmas, Patwobas, Èmès, ak frè sa yo ki avèk yo a.
15
Salye Filològ ak Jili, Nere ak sè li a, e Olenpas ak tout sen sa yo ki avèk yo a.
16
Nou youn a va salye lòt avèk yon bo ki sen. Legliz Kris yo salye nou.
17
Kounye a la a, mwen ankouraje nou, frè yo, pou nou veye moun sa yo k ap kreye divizyon ak eskandal yo, kontrèman a ansèyman ke nou te aprann lan; lèfini, se pou nou pran distans nou ak yo.
18
Paske, moun konsa yo, se pa Senyè Jezi Kris y ap sèvi, men pito, se pwòp vant yo; epi, pa mwayen bèl pawòl ak gwo diskou, y ap twonpe kè moun sa yo ki senp lan.
19
Vrèmanvre, obeyisans nou an rive lòtbò nan zorèy tout moun. E konsa donk, mwen kontan pou nou. Men, mwen ta vle pou nou entelijan konsènan bagay sa ki byen yo, epi, pou nou sòt konsènan sa ki mal yo.
20
Alèkile, Bondye lapè a, a va kraze Satan anba pye nou talè konsa. Ke gras Senyè Jezi Kris la avèk nou. Amèn.
21
Timote, konpànyon travay mwen, ak Liziyis, Jazon, ak Sosipatè, fanmi m yo, salye nou.
22
Mwen menm Tètiyis ki ekri lèt sa a, mwen salye nou nan Senyè a.
23
Gayis, ki resevwa mwen, e ki resevwa tout legliz la tou, salye nou. Eras, majistra lavil la, salye nou; ak Kwatis, yon frè.
24
Ke gras Senyè Jezi Kris la avèk nou tout. Amèn.
25
Kounye a, se pou Sila a ki posede tout pouvwa a fè nou kanpe fèm daprè levanjil mwen an, e daprè predikasyon Jezi Kris yo, ann akò ak revelasyon mistè a ke yo te kenbe sekrè depi kòmansman monn lan.
26
Men, kounye a, yo fè li parèt aklè, e, sa rive pa mwayen sa ke pwofèt yo te ekri yo, ann akò ak kòmandman Bondye ki etènèl la; yo fè tout pèp yo konnen li poutèt obeyisans nan lafwa a.
27
Se pou Bondye, Li menm sèl ki saj la, jwenn glwa atravè Jezi Kris pou tout tan. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!