Liv 1 Korentyen
Chapit 1
Klike la pou koute lekti chapit sa1
Pòl, aple pou te vin apot Jezi Kris dapre volonte Bondye; e Sostèn, frè nou an,
2
a legliz Bondye a ki Korent lan, a sila ki sanktifye nan Kris Jezi yo, ki gen apèl pou yo sen, ansanm ak tout moun toupatou k ap rele non Jezi Kris, Senyè nou an, ki se e Senyè pa yo, e Senyè pa nou.
3
Se pou gras avèk nou, ansanm ak lapè bò kote Bondye Papa nou an e bò kote Senyè nou an, Jezi Kris.
4
Mwen toujou ap remèsye Bondye anegad nou menm, poutèt gras Bondye ki vin jwenn nou an, pa mwayen Jezi Kris,
5
pou ke nan tout bagay, nou gen plis richès atravè Li, nan tout pawòl ak konesans;
6
menm jan temwayaj Kris la te konfime nan nou an,
7
dekwa pou nou pa manke ankenn don pandan ke n ap tann retou Senyè nou an, Jezi Kris.
8
Se sa tou ka p fè nou ret djanm jiska lafen, pou ke nou ka san repwòch, nan jou Senyè nou an, Jezi Kris.
9
Bondye fidèl, Li menm ki te fè nou apèl pou nou vin nan kominyon avèk Pitit Gason Li a, Jezi Kris, Senyè nou an.
10
Kounye a, m ap egzòte nou, frè yo, nan non Senyè nou an, Jezi Kris, se pou nou tout pale menm pawòl la, se pa pou gen divizyon pami nou; men pito, se pou nou ini tèt nou ansanm alapèfeksyon nan menm lespri ak nan menm bon konprann.
11
Paske, sa ke mwen tande sou nou, frè m yo, nan bouch moun lakay Klore yo, sèke gen kont nan mitan nou.
12
Sa m vle di pa la, sèke nou chak ap di: Se pou Pòl mwen ye; oswa, se pou Apolòs mwen ye; oswa, se pou Sefas mwen ye; oswa, se pou Kris mwen ye!
13
Èske Kris divize? Èske Pòl te krisifye pou nou? Oswa, èske nou te batize nan non Pòl?
14
Mwen remèsye Bondye dèske m pa t batize ankenn nan nou, sof Krispis ak Gayis,
15
pou sa pa rive ke nenpòt moun ta di ke mwen t ap batize nan non pa m.
16
Epitou, m te batize moun lakay Estefanas yo; apa de sa, mwen pa gen konesans ke m te batize lòt moun.
17
Paske, se pa t batize Kris te voye m batize, men se pou m te preche levanjil la; e, se pa avèk sajès ki nan pawòl non, dekwa pou sa pa rive ke Kris ta vin sanzefè.
18
Paske, predikasyon lakwa a se yon foli l ye pou moun k ap peri yo; men, pou nou menm ki sove a, se puisans Bondye li ye.
19
Anfèt, men sa ki te ekri: Mwen gen pou M detwi sajès moun ki saj yo, e Mwen gen pou M disparèt entelijans moun ki entelijan yo!
20
Kote moun ki saj la? Kote pwofesè lalwa a? Kote filozòf nan monn sa a? Èske Bondye pa fè sajès monn sa a vin tounen foli?
21
Avredi, apre ke nan sajès Bondye, lemonn lan sajès pa l pa t konn Bondye; sa te fè Bondye plezi pou ke se pa mwayen predikasyon ke moun ki kwè yo sove.
22
Paske, Jwif yo ap mande yon siy, epi Grèk yo ap kouri dèyè sajès;
23
men, n ap preche Kris krisifye; sa ki se yon pyè dachopman pou Jwif yo, e ki se yon foli pou Grèk yo;
24
alòske, pou sila ki aple yo, kit Jwif, kit Grèk, se puisans Bondye ak sajès Bondye ke li ye.
25
Paske, foli Bondye gen plis sajès pase lèzòm; e, feblès Bondye gen plis fòs pase lèzòm.
26
Gade apèl ke Bondye fè nou an, frè yo, kòman ke pa gen anpil moun saj dapre lachè, pa gen anpil otorite, pa gen anpil lelit ki aple;
27
men, Bondye te chwazi bagay ki se foli yo nan monn lan, pou vire lòlòj bagay sa k saj yo. Epi, Bondye te chwazi bagay ki fèb yo nan monn lan, pou twouble bagay ki fò yo;
28
lèfini, se bagay ki san valè nan monn lan, ak bagay ki meprize yo ke Bondye te chwazi; wi, bagay ki pa la yo, pou anile bagay ki la yo;
29
dekwa pou pyès lachè pa vin glorifye tèt li devan Bondye.
30
Alòske, se gras a Li kifè nou nan Kris Jezi, Li menm ki nan Bondye, te vin sajès, ak dwati, ak sanktifikasyon, ak redanmsyon pou nou;
31
pou ke jan sa te ekri a: Moun k ap glorifye tèt li a, kite ke se nan Senyè a li glorifye l.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!