Liv 1 Korentyen
Chapit 2
Klike la pou koute lekti chapit sa1
E, mwen menm, frè yo, lè m te vin kote nou an, mwen pa t vini ak yon kalite langaj oswa sajès ki siperyè, pou m te deklare temwayaj Bondye a ban nou non.
2
Paske, mwen te deside nan tèt mwen pou m pa t konnen anyen dòt nan mitan nou, sof Jezi Kris, e, Jezi Kris krisifye!
3
E se te nan eta feblès, laperèz, ak bonjan latranblay mwen te ye pandan m te avè nou an.
4
Lèfini, lè m te pale ak lè m te preche, se pa t ak pawòl ki pou konvenk moun avèk sajès lèzòm non; men pito, se te yon demonstrasyon Lespri a, ak puisans;
5
dekwa pou lafwa nou pa kanpe sou sajès lèzòm, men nan puisans Bondye.
6
Kwake se sajès n ap anonse bay moun ki rive alapèfeksyon yo, men, se pa sajès monn sa a, ni sajès chèf monn sa a yo, k ap vin pa vo anyen an.
7
Men, n ap anonse sajès pa Bondye a, nan yon mistè; menm sajès sa a ki te kache a, e ke Bondye te pare davans pou glwa nou, depi anvan lemonn te la.
8
Yon sajès ke okenn nan chèf monn sa a pa t konnen, paske, si yo te konnen l, yo pa t ap krisifye Senyè laglwa a.
9
Men, tankou sa ekri a: Se yon kalite bagay ke je poko wè, ni ke zòrèy poko tande, nonplis tou ki poko antre nan kè lòm, bagay sa ke Bondye pare pou moun ki renmen L yo ye.
10
Men, Bondye te revele yo ban nou pa mwayen Lespri Li; paske, Lespri a sonde tout bagay; wi, menm bagay sa yo ki nan fon kè Bondye.
11
Vrèmanvre, kilès moun ki konn zafè yon moun, apa de lespri moun nan ki nan li menm nan? Se menm jan an tou, zafè Bondye, okenn moun pa konnen yo, apa de Lespri Bondye.
12
Kounye a la a, nou menm, se pa t lespri monn sa a nou te resevwa non; men pito, se Lespri ki soti nan Bondye a, dekwa pou nou ka konnen bagay sa yo ke Bondye ban nou gratis yo.
13
E, bagay sa yo tou, nou pa pale yo ak pawòl ke sajès lèzòm anseye non; men, ak sa ke Lespri Sen anseye. Nou aliyen bagay espirityèl yo ak sa ki espirityèl.
14
Men, lòm natirèl pa resevwa bagay Lespri Bondye yo, paske se foli yo ye pou li; epi, li pa ka konnen yo nonplis, difèt ke se espirityèlman ke w ka dekouvri yo.
15
Men, moun ki espirityèl la, li jije tout bagay; epoutan, pèsonn pa jije l.
16
Vrèmanvre, kiyès ki te konn lide nan tèt Senyè a, jouk pou l ta anseye Li? Alòske nou menm, se lide nan tèt Kris ke nou genyen.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!