Liv 1 Korentyen
Chapit 3
Klike la pou koute lekti chapit sa1
Avredi, mwen menm, frè yo, mwen pa t ka pale avèk nou tankou ak moun espirityèl, men tankou ak moun chanèl; m ta menm di, tankou tibebe ki nan Kris!
2
Mwen te nouri nou ak lèt, olye de manje, paske nou pa t ka tolere l; e menm kounye a nou pa kapab nonplis;
3
paske nou chanèl toujou. Paske anfèt, nan mitan nou twouve gen jalouzi, ak kont, ak divizyon. Atò, èske se pa chanèl nou chanèl, epi ke se dapre jan lèzòm mache ke n ap mache?
4
Vrèmanvre, lè youn di: Se pou Pòl mwen ye; epi, yon lòt: Se pou Apolòs mwen ye; èske nou pa chanèl?
5
Alò, kiyès Pòl ye; e kiyès Apolòs ye? Se sèvitè ase yo ye wi! Se te pa mwayen yo menm ke nou te kwè, dapre sa ke Senyè a te ba yo chak.
6
Mwen te plante, Apolòs te wouze; men, se Bondye ki te fè l pouse.
7
Kidonk, ni sila ki te plante a pa anyen, ni sila ki te wouze a; men, se Bondye ki te fè l pouse a.
8
Alèkile, sila ki te plante a ak sila ki te wouze a, se yon sèl yo ye; e, chak moun a va resevwa pwòp rekonpans pa l, dapre pwòp travay pa l.
9
Paske, nou menm, se ouvriye ansanm ak Bondye nou ye; ou menm, ou se jaden Bondye, ou se batiman Bondye.
10
Dapre gras Bondye a ke mwen te resevwa a, tankou yon bon enjenyè ta fè, mwen poze fondasyon an, lèfini, yon lòt bati sou li. Men, se pou chak moun fè atansyon ak jan ke l ap bati sou li a!
11
Paske, pèsonn pa fouti poze yon lòt fondasyon apa de sa k poze a, ki se Jezi Kris!
12
Alèkile, si sou fondasyon sa a, nenpòt moun ta bati ak lò, ajan, pyè presye, bwa, zèb, pay,
13
travay chak moun a va parèt aklè; paske, jou a ap deklare sa, poutèt ke se nan dife ke sa va revele; e, dife a va teste travay chak moun, pou wè ki kalite travay ke l te ye.
14
Si travay ke yon moun te bati sou li a rete kanpe, li va resevwa yon rekonpans.
15
Si travay yon moun ta va boule, moun nan va nan pèd; Li menm pou tèt li va sove, men se tankou l ta chape anba dife.
16
Èske nou pa konnen ke se tanp Bondye nou ye, epi, ke Lespri Sen abite nan nou?
17
Si nenpòt moun ta badidjonnen tanp Bondye a ak salte, Bondye va detwi moun sa a; paske, tanp Bondye a sen; e, tanp sa a, se nou menm.
18
Pinga pèsonn twonpe tèt li non! Si nenpòt nan nou te parèt kòmkwa li saj dapre sajès monn sa a, pito kite l vin yon moun fou, pou li ta ka vin saj!
19
Paske, sajès monn sa a, se foli l ye ak Bondye; paske sa te ekri: Li pran moun saj yo nan pwòp pèlen yo.
20
Epi ankò: Senyè a konn panse ki nan tèt moun saj yo; ke yo san valè.
21
Kidonk, pinga pèsonn vante tèt li nan lèzòm; paske, tout bagay se pou nou yo ye.
22
Ke se swa Pòl, oswa Apolòs, oswa Sefas, oswa lemonn, oswa lavi, oswa lanmò, oswa bagay kounye yo, oswa bagay ki gen pou vini yo, tout se pou nou yo ye.
23
Epi, nou menm, nou pou Kris; e Kris pou Bondye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!