Liv 1 Korentyen
Chapit 4
Klike la pou koute lekti chapit sa1
Kite ke se konsa pou moun konsidere nou, tankou sèvitè Kris, epi, moun ki responsab mistè Bondye yo.
2
Anplis de sa, bagay sa ke yo mande pou responsab yo genyen, se ke yo jwenn ke moun nan se yon moun ki fidèl.
3
Men, kanta pou mwen, sa pa ta anyen ditou pou m ta jije pa nou menm, oswa pou m ta sibi jijman lèzòm; avredi, m pa jije tèt pa m.
4
Paske, m pa gen konesans de anyen sou mwen; epoutan se pa sa k fè m jistifye non; men, moun k ap jije m nan, se Senyè a.
5
Kidonk, nou pa dwe jije anyen anvan lè l, jiskaske Senyè a vini, Li menm ki va alafwa klere limyè e sou bagay ki kache nan fènwa yo, e ki va devwale dezi ki anndan kè; se lè sa a ke chak moun a va resevwa lwanj pa l nan men Bondye.
6
E, bagay sa yo, frè yo, se kòm egzanp ke mwen te sèvi ak tèt pa m e ak Apolòs pou transmèt yo ban nou; dekwa pou ke w ka aprann de nou menm pou w pa panse pi plis de sa lòm vo, andeyò de sa ki ekri a; epi, pou ke okenn nan nou pa vin gonfle ak lògèy pou yon moun kont yon lòt.
7
Vrèmanvre, kiyès ki fè ke w diferan de yon lòt moun? Epitou, kisa w genyen ke se pa t resevwa ou te resevwa l? Alèkile, si se resevwa ke w te resevwa l, poukisa w ap vante tèt ou la a, kòmsi se pa t resevwa ke w te resevwa l?
8
Kounye a la a, twouve ke ou menm, ou gentan santi w rich, twouve ke ou gentan ap reye kòm wa, san nou; m ta mande Bondye ke w t ap reye tout bon vre, konsa, nou ta va reye avèk ou tou.
9
Paske mwen panse ke Bondye te mete nou andènye, kòmkwa se moun ki kondane amò; paske, nou vin tounen yon espektak pou lemonn, pou zanj yo, ak pou lèzòm.
10
Nou menm, nou se moun fou poutèt Kris, men ou menm, ou se moun saj nan Kris; nou menm, nou fèb, men ou menm, ou fò; ou menm, yo onore w, nou menm, yo meprize nou.
11
Jouk jounen jodi a, nou alafwa e grangou, e swaf, e san rad, yo bat nou, epi nou pa gen ankenn kote pou n rete.
12
Lèfini, nou redi, nou travay ak pwòp men nou; lè yo joure n, nou beni; lè yo pèsekite n, nou sipòte l;
13
lè yo pale nou mal, nou egzòte; yo fè nou vin tounen tankou fatra nan lemonn; e, se nou ki retay tout bagay jis jounen jodi a.
14
Mwen pa ekri bagay sa yo pou m fè w wont non; men, antan ke pitit gason byeneme mwen, se avèti m ap avèti w.
15
Avredi, menmsi w ta gen dimil anseyan an Kris, sepandan, ou pa gen anpil papa; paske, se mwen ki ba w nesans an Kris Jezi, pa mwayen levanjil la.
16
Kidonk, m ap sipliye ou, se moun k ap imite m pou ou ye.
17
Se pou rezon sa a ki fè m voye Timote ba ou, Li menm ki se pitit gason byeneme mwen, e ki fidèl nan Senyè a; li va rafrechi memwa w sou wout ke m ap suiv yo an Kris, jan ke m anseye toupatou nan tout legliz.
18
Kounye a atò, gen kèk moun ki gonfle ak lògèy, kòmkwa mwen pa ta dwe vin kote w.
19
Men, m ap vin kote w talè konsa, si Senyè a vle; e, sa m ap konnen, se pa pawòl nan bouch moun ki gonfle ak lògèy yo, men se puisans lan.
20
Paske, wayòm Bondye a, se pa nan pawòl li ye non; men, se nan puisans lan.
21
Kisa w vle? Èske se pou m ta vin kote w ak yon baton, oswa nan lanmou, avèk yon lespri tandrès?
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!