Liv 1 Korentyen
Chapit 5
Klike la pou koute lekti chapit sa1
Yo rapòte ke anjeneral, gen imoralite nan mitan ou; e, yon kalite imoralite ki pa menm diskite pami Payen yo, pou ke yon nonm twouve gen madanm papa l kòm fanm.
2
Lèfini, w ap gonfle nan lògèy olye pou w ta nan tristès dekwa pou moun sa ki fè aksyon sa a ta va soti nan mitan w.
3
Vrèmanvre, pandan ke anpèsonn mwen absan, men, mwen prezan ann espri; e, mwen deja jije moun ki komèt zak sa a, kòmsi m te prezan.
4
Nan non Jezi Kris, Senyè nou an, lè ou rasanble ansanm ak lespri pa m, avèk puisans Senyè nou an, Jezi Kris,
5
se pou ou livre yon moun konsa bay Satan pou detwi kò a, dekwa pou espri a ta kapab sove nan Jou Senyè Jezi a.
6
Vante w ap vante tèt ou a pa bon! Èske ou pa konnen ke yon ti pense ledven lakòz tout pat la gonfle?
7
Kidonk, ou dwe netwaye ansyen ledven an, dekwa pou w vini yon pat tou nèf, tankou ke ou san ledven. Paske, menm Kris ki reprezante Pak nou an, yo te sakrifye Li pou nou.
8
Konsa donk, ann fete fèt la, nonpa ak ansyen ledven, nonplis tou ak ledven mètdam ak mechanste, men pito, ak pen san ledven senserite ak laverite a.
9
Mwen te ekri w nan yon lèt ke se pa pou w mele ak moun ki imoral yo.
10
Alò, se pa ak imoral yo ki nan monn sa a non, oswa ak ava yo non, oubyen ak piyajè yo non, oswa ak idolat yo non; paske lè sa a, nou t ap blije soti nan lemonn.
11
Men pito, sa ke mwen ekri w, se pou ou pa mele ak yon nonm ki rele tèt li yon frè, epi twouve se yon imoral li ye, oswa yon ava, oswa yon piyajè, oswa yon idolat, oswa yon eskandalè, oswa yon tafyatè, oswa yon ransonè; moun konsa, menm manje pa manje avè l.
12
Paske avredi, kisa mwen gen pou m wè nan jije moun ki deyò yo? Èske se pa moun ki anndan yo ke nou dwe jije?
13
Men, moun ki deyò yo, se Bondye ki va jije yo. Konsa donk, mete mechan an deyò nan mitan w!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!