Liv 1 Korentyen
Chapit 6
Klike la pou koute lekti chapit sa1
Ou kwè okenn nan ou ta oze, si li ta gen yon pwoblèm ak yon lòt, pou ke se devan enjis yo li ta al regle sa, olye ke se ta devan Sen yo?
2
Èske w pa konnen ke Sen yo va gen pou jije lemonn? E, si lemonn va gen pou li jije pa ou menm, atò, èske w pa merite jije bagay ki gen mwens enpòtans yo?
3
Èske ou pa konnen ke ou va jije zanj? Ale wè pou bagay ki gen rapò ak lavi sa a.
4
Alò, twouve ke lè ou gen jijman sou zafè ki konsène lavi sa a, kisa ou pran kòm jij, se moun ke legliz pi pa konsidere yo!
5
M ap di sa pou wont ou. Ou vle di ke pa gen okenn moun saj pami ou? Non, pa menm yon grenn ki ta va jije ant frè li yo?
6
Men, frè rele frè nan tribinal, epi se devan enkonvèti y ale.
7
Dayè, se deja yon kokenn defo lakay ou pou w twouve youn ap rele lòt nan tribinal! Sa k fè ou pa aksepte yo fè w enjistis pito? Sa k fè ou pa pèmèt ke yo deplimen w?
8
Now! Se ou menm k ap fè enjistis, se ou menm k ap deplimen; e, se kont pwòp frè ou w ap fè l.
9
Èske ou pa konnen ke moun ki pa dwat p ap eritye wayòm Bondye a? Pinga ou twonpe tèt ou! Ni imoral, ni idolat, ni adiltè, ni gason makòmè, ni pederas,
10
ni vòlè, ni ava, ni tafyatè, ni eskandalè, ni ransonè p ap eritye wayòm Bondye a.
11
E, se sa kèk nan nou te ye; men, nou netwaye, nou sanktifye; men, nou jistifye nan non Senyè Jezi, e pa mwayen Lespri Bondye nou an.
12
Tout bagay legal pou mwen; men, tout bagay pa itil mwen. Tout bagay legal pou mwen; men, mwen p ap kite pou m ta vin anba dominasyon ankenn bagay.
13
Manje yo, se pou vant lan, e vant lan, se pou manje yo; men, Bondye va alafwa detwi youn tankou lòt yo. Alèkile, kò a, se pa pou imoralite li la, men, se pou Senyè a; e, Senyè a, pou kò a.
14
E, Bondye ki te resisite Senyè a, ap resisite nou tou pa mwayen puisans pa L.
15
Èske nou pa konnen ke kò nou se manm Kris ke yo ye? Alò, èske se pou m ta pran manm Kris yo, lèfini pou m fè yo vin manm yon pwostitye? Mande Bondye padon non!
16
Sa l ta ye la a! Èske nou pa konnen ke yon moun ki ini ak yon pwostitye fè yon sèl kò avè l? Paske, men sa ke Li te di: Yo de a, va vin yon sèl chè.
17
Men, yon moun ki ini ak Senyè a, vin yon lespri ak Li.
18
Kouri pou imoralite. Tout peche moun fè, se andeyò kò l ke li fè l; men, moun ki komèt imoralite a, se kont pwòp kò l ke l peche.
19
Ki koze! Kòmsi, èske nou pa konnen ke kò nou se tanp Lespri Sen an ki nan nou an, Li menm ke Bondye ban nou an, e, ke nou pa mèt tèt nou?
20
Vrèmanvre, se byen chè wi, ke Bondye te achte nou; kidonk, glorifye Bondye nan kò nou ak nan lespri nou; se pou Bondye yo ye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!