Liv 1 Korentyen
Chapit 7
Klike la pou koute lekti chapit sa1
Kounye a la a, konsènan bagay nou te ekri m sou yo a: Li bon pou yon nonm pa manyen yon fanm;
2
sepandan, pou evite imoralite, kite chak nonm gen madanm pa l, epi, kite chak fanm gen mari pa l.
3
Kite ke mari a bay madanm nan tout afeksyon ke l dwe ba li, e ke madanm nan fè menm jan an tou pou mari a.
4
Madanm nan pa gen otorite sou pwòp kò l, men se mari a; e, konsa tou, mari a pa gen otorite sou pwòp kò pa l, men, se madanm nan.
5
Pinga nou youn derefize lòt, eksepte si nou ta antann nou sou sa pou yon sèten tan, dekwa pou nou devwe tèt nou nan jèn ak lapriyè; lèfini, pou nou retounen ansanm ankò, pou ke Satan pa tante nou ak anvi seksyèl san kontwòl nou an.
6
Alò, m ap di sa antan ke opinyon pa m, se pa yon kòmandman;
7
Avredi, mwen ta prefere ke tout gason te menm jan avè m. Men, chak òm gen don pa l nan men Bondye; youn, nan tèl fason; epi yon lòt, nan tèl lòt fason.
8
Se poutèt sa m ap di moun ki pa marye yo, ak vèv yo, ke li t ap bon pou yo si yo te rete menm jan avè m.
9
Men, si yo pa ka kontwole tèt yo, kite yo marye; paske li preferab pou w marye pase pou w boule.
10
Epi, pou moun ki marye yo, m ap bay kòmandman sa a, alò, pa mwen menm non, men Senyè a: Se pa pou madanm nan kite ak mari li.
11
Men, oka ke l ta ale, se pou l rete san marye, oswa pou l rekonsilye ak mari l; e, se pa pou mari a kite ak madanm li.
12
Men, pou rès moun yo, men sa m ap di, se pa Senyè a ki di l: Si yon frè ta gen yon madanm ki pa yon kwayan, epi ke manzè dakò ret viv avè l, se pa pou frè a kite avè l.
13
E, si yon madanm ta gen yon mari ki pa yon kwayan, e ke misye dakò ret viv avèk li, se pa pou madanm nan kite avè l.
14
Paske, mari ki pa kwayan an sanktifye atravè madanm nan; e, madanm ki pa kwayan an sanktifye atravè mari a. Si se pa t sa, timoun nou yo t ap gate; alòske kounye a la a, yo sen.
15
Men, si sila ki pa kwayan an pati ale, kite l ale. Yon frè oubyen yon sè pa gen pye l mare ankò nan ka sa yo; avredi, Bondye te fè nou apèl pou nou jwenn lapè.
16
Vrèmanvre, kijan w fè konnen, ou menm madanm, si wi ou non wa va sove mari w? Oswa, kijan w fè konnen, ou menm mesye, si wi ou non wa va sove madanm ou?
17
Men, se dapre jan Bondye separe bay chak moun, jan ke Bondye fè apèl a chak moun, se jan sa a moun nan dwe mache. E, se konsa ke m anseye nan tout legliz yo.
18
Si yon moun te sikonsi lè li te resevwa apèl la; alò, se pa pou l vin ensikonsi. Si yon moun jwenn apèl la pandan l pa t sikonsi; alò, se pa pou l al sikonsi.
19
Sikonsi an pa anyen, e pa sikonsi an pa anyen; men, sa k yon bagay, se kenbe kòmandman Bondye yo.
20
Kifè, se pou chak moun rete jan ke li te ye a lè ke l te resevwa apèl la.
21
Èske w te jwenn apèl la pandan ke se esklav ou te ye? Pinga w chaje tèt ou pou sa; men si gen yon mwayen pou w ta ka vin lib, regle sa pito.
22
Paske, sila a ki jwenn apèl Senyè a pandan ke l te esklav, se moun lib Senyè a ke l ye; menm jan an tou, sila a ki te jwenn apèl la pandan ke l te lib, se esklav Kris ke l ye.
23
Se a yon pri byen chè ke y achte nou; se pa esklav lèzòm pou n ye!
24
Frè yo, nan jan chak moun te jwenn apèl la, se konsa ke l dwe rete ak Bondye.
25
Kounye a la a menm, kanta pou vyèj yo, mwen pa gen ankenn lòd ke m resevwa de Senyè a, men, m ap bay panse pa m antan ke yon moun ki te resevwa mizerikòd bò kote Senyè a, dekwa pou mwen fidèl.
26
Alò, sa m panse ki bon, poutèt malè ki la a kounye a, li preferab pou yon moun ta ret konsa.
27
Èske w gen lyen ak yon madanm? Pa chèche pou w lage l. Èske w pa gen lyen ak yon madanm? Pa chèche yon madanm.
28
Men, si w ta marye, se pa peche w peche; e, si yon vyèj ta marye, se pa peche l peche. Men, moun konsa yo ap gen boulvèsman nan lachè, alòske se sa m vle evite nou.
29
Men sa m ap di, frè yo, tan an kout; alèkile, se pou alafwa ke sila ki gen madanm yo fè kòmkwa yo pa t genyen;
30
epi, ke sila k ap kriye yo fè kòmkwa yo pa p kriye; sila ki nan lajwa yo fè kòmkwa yo pa nan lajwa; e, sila k ap achte yo fè kòmkwa yo pa posede anyen;
31
epi, sila yo k ap itilize monn sa a fè kòmkwa yo pa konte sou li; paske, mòd monn sa a ap pase ale.
32
Men, mwen ta vle ke nou pa gen anyen k ap chaje tèt nou. Sila ki pa marye a, l ap okipe l de bagay ki konsène Senyè a, kijan ke l ka fè Senyè a plezi.
33
Men, sila ki marye a menm, se de bagay ki nan lemonn ke l ap okipe l, kijan ke l ka fè madanm li plezi.
34
E, gen yon diferans tou ant yon madanm ak yon vyèj. Fanm ki pa marye a okipe l de zafè Senyè a, dekwa pou li ka sen alafwa nan kò ak nan lespri; alòske sila ki marye a okipe l de bagay nan lemonn yo, kijan ke l ka fè mari l plezi.
35
E, se nan enterè pa nou ke m ap di bagay sa yo wi; se pa kontwòl m ap chèche pran sou nou non! Men pito, se pou sa ki konvnab, epi, pou ke nou kapab okipe nou de zafè Senyè a san ankenn distraksyon.
36
Si yon moun ta twouve ke se pa konvnab pou pitit fi l ki vyèj ta depase laj vyèy fi, e ke konsa, li ta vle marye l, kite l fè sa l vle, li pa peche; kite yo marye.
37
Sepandan, moun ki pran desizyon fèm nan kè l, san ankenn moun pa fòse l, men ki se ak volonte pa l ke l deside pou li kenbe vyèj pa l la, li byen fèt.
38
Kidonk, moun ki bay li pou marye a, byen fèt; men, moun ki pa bay li pou marye a pi byen fèt toujou.
39
Madanm nan angaje dapre lalwa toutotan ke mari l la vivan; men, si mari l la ta mouri, madanm nan lib pou li marye ak nenpòt ki moun ke l vle; men sèlman, se dwe moun ki nan Senyè a.
40
Men, l ap pi byenerèz si l ta ret konsa, dapre jijman pa m; e, mwen menm tou, mwen kwè ke m gen Lespri Bondye a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!