Liv 1 Korentyen
Chapit 8
Klike la pou koute lekti chapit sa1
Kounye a la a, konsènan bagay ke yo ofri bay zidòl, nou konnen ke nou tout gen konesans. Konesans gonfle lògèy; men, lanmou edifye.
2
E, si nenpòt moun ta panse ke l konn kichòy, li poko konn anyen jan ke l ta dwe konnen l.
3
Men, si yon moun renmen Bondye, moun sa a, se yon moun Bondye konnen.
4
Donk, osijè de manje bagay sa ke yo ofri nan fè sakrifis pou zidòl yo, nou konnen ke yon zidòl pa anyen nan lemonn, e ke pa gen okenn lòt apa de Bondye, Li menm sèl.
5
Avredi, gen de zèt ke yo rele bondye, keseswa nan syèl ou sou latè, (kòmkwa gen plizyè bondye, ak plizyè senyè);
6
men, pou nou menm, pa gen plis ke yon sèl Bondye: Papa a; se de Li menm ke tout bagay egziste, epi nou nan Li; lèfini, gen yon sèl Senyè Jezi Kris, se pa mwayen Li menm ke tout bagay te kreye, e, se pa Li menm nou fèt.
7
Men, se pa tout moun ki gen konesans sa a; gen de moun ki gen zidòl la nan konsyans yo jis kounye a, e yo manje manje a tankou se bagay ki te ofri bay yon zidòl; e, feblès konsyans yo lakòz konsyans yo sal.
8
Men, manje pa rapwoche nou de Bondye; paske, swa ke nou manje, sa pa fè n vin pi bon; swa ke nou pa manje, sa pa fè nou vin pi mal.
9
Men, fè atansyon pou ke sa pa rive ke libète sa a vin yon pyè dachopman pou sila ki fèb yo.
10
Paske, si nenpòt moun wè ou menm ki gen konesans lan, ou chita ap manje nan tanp zidòl, èske konsyans moun sa a ki fèb la p ap pouse l al manje bagay sa ki ofri bay zidòl yo,
11
epi konsa, akòz konesans ou an, frè ki fèb la peri, li menm Kris mouri pou li a?
12
Men, lè nou ta peche konsa kont frè yo, epi nou ta blese konsyans yo ki fèb la, nou peche kont Kris.
13
Alò poutèt sa, si manje ka lakòz ke frè m chite, mwen p ap manje vyann toutotan lemonn egziste, pou sa pa rive ke frè m ta chite.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!