Liv 1 Korentyen
Chapit 9
Klike la pou koute lekti chapit sa1
Èske se pa yon apot mwen ye? Èske m pa lib? Èske m pa t wè Jezi Kris, Senyè nou an? Èske se pa travay mwen nan Senyè a nou ye?
2
Menmsi m pa ta yon apot pou lòt moun, men, san mank, se sa m ye pou nou menm; paske, so ki poze pou pòs apot mwen an, se nou menm, nan Senyè a.
3
Repons mwen pou sila k ap jije m yo, se sa:
4
Èske nou pa gen dwa pou n manje ak bwè?
5
Èske nou pa gen dwa pou nou pran yon sè avèk nou, madanm nou, menm jan ak lòt apot yo, e tankou frè Senyè a yo, ak Sefas?
6
Oubyen, èske se sèlman mwen menm ak Banabas ki pa gen dwa sispann travay?
7
Kiyès ki janm al nan lagè pou se li menm ki peye tèt li? Kiyès ki plante yon pye rezen, epi pou l pa manje fwi pye rezen an? Oubyen, kiyès ki bay twoupo mouton swenyay, epi pou l pa bwè nan lèt twoupo a?
8
Èske se tankou lèzòm m ap di bagay sa yo? Oswa, èske lalwa pa di menm bagay la tou?
9
Vrèmanvre, sa ekri nan lwa Moyiz la, 'Ou pa dwe met baboukèt nan bouch bèf k ap dekòtike grenn nan.' Èske se de bèf ke Bondye ap okipe L?
10
Oswa ke Li te di sa patikilyèman poutèt nou? Se te poutèt nou, san mank, paske men sa ki te ekri: Se pou moun k ap raboure tè a, raboure ak espwa; epi, pou ke moun k ap dekòtike ak espwa a, patisipe nan espwa ke li te genyen an.
11
Si nou te simen bagay espirityèl nan ou, èske se yon gwo zafè sa ye, pou nou ta rekòlte bagay materyèl ou yo?
12
Si lòt moun ap benefisye de dwa sa a sou ou, èske se pa ta dwe nou menm de preferans? Malgre sa, nou pa revandike dwa sa a, okontrè, nou soufri tout kalite bagay, pou sa pa rive ke nou ta jennen pye levanjil Kris la.
13
Èske w pa konnen ke moun k ap fè sèvis ak bagay ki sen yo, se de bagay ki nan tanp lan ke yo viv? Epi, moun k ap fè sèvis sou lotèl la, patisipe avèk lotèl la?
14
Konsa menm Senyè a te kòmande pou ke moun k ap preche levanjil la dwe viv de levanjil la.
15
Epoutan, mwen pa itilize ankenn nan bagay sa yo; nitou, mwen pa ekri pawòl sa yo dekwa pou yo ta fè bagay sa yo pou mwen; avredi, mwen ta pito mouri tan pou yon moun fè ke lwanj mwen sa a ta anile.
16
Paske, menmsi m ap preche levanjil la, mwen pa gen ankenn glwa nan sa; avredi, se yon obligasyon ki sou tèt mwen; malè pou mwen, si m pa preche levanjil la!
17
Paske, si se mwen ki vle fè sa, m ap gen yon rekonpans; men, si se kont volonte m ke travay preche levanjil la enpoze sou tèt mwen,
18
kote rekonpans mwen an lè sa a? Men kisa l ye: Sèke lè m ap preche levanjil la, mwen ka fè ke levanjil la pa koute anyen, pou m pa abize dwa m nan levanjil la.
19
Paske, menmsi mwen lib anegad tout moun, men, mwen met tèt mwen osèvis tout moun, dekwa pou m ka rive genyen plis moun.
20
Kidonk, ak Jwif yo, mwen vin tankou yon Jwif, dekwa pou m ka genyen Jwif yo; ak sila yo ki anba lalwa a, m vin tankou anba lalwa, dekwa pou m ka genyen sila ki anba lalwa yo;
21
ak sila yo ki san lwa yo, m vin tankou san lwa, (se pa ke mwen te san lalwa devan Bondye, men, m te anba lalwa Kris la,) dekwa pou m ka genyen sila yo ki san lwa a.
22
Ak moun fèb yo, mwen vin tankou fèb, dekwa pou m ka genyen moun fèb yo. Mwen fè tèt mwen tounen tout bagay pou tout moun, dekwa pou ke pa nenpòt ki mwayen, m ta sove kèk nan yo.
23
E sa, mwen fè l poutèt levanjil la, dekwa pou m ka patisipe ladan l avèk nou.
24
Èske nou pa konnen ke moun yo ki kouri nan yon kous, se yo tout ki kouri, men se youn ki resevwa pri a? Alò, nou dwe kouri pou n ka resevwa l.
25
Tout moun ki antre tèt yo nan konpetisyon met tèt yo sou kontwòl nan tout bagay. Avredi, y ap fè sa pou yo resevwa yon kouwòn ki pral gate, alòske nou menm, se pou yon kouwòn ki pa ka gate.
26
Se konsa donk m ap kouri, nonpa tankou o aza; se konsa m goumen, nonpa tankou yon moun k ap fè flay nan voye koutpwen;
27
Men, mwen met kò m sou kontwòl, lèfini, mwen fè l soumèt li; pou sa pa rive nan ankenn ka, ke alòske m preche bay lòt moun, pou ta twouve ke mwen menm, mwen vin youn ke yo ta rejte.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!