Liv 1 Korentyen
Chapit 11
Klike la pou koute lekti chapit sa1
Se pou nou imite m, menm jan ke m ap imite Kris la.
2
Kounye a, mwen fè nou konpliman, frè yo, difèt ke nou sonje m nan tout bagay, epi ke nou kenbe koutim yo jan ke m te transmèt yo ban nou an.
3
Men, mwen ta vle nou konnen ke chèf ki sou tèt tout gason, se Kris; epi, chèf sou tèt fi a, se gason an; lèfini, chèf sou tèt Kris, se Bondye.
4
Tout gason k ap lapriyè oswa pwofetize ak tèt li kouvri, li dezonore Chèf ki sou tèt li a.
5
Alòske, tout fi k ap lapriyè oswa pwofetize ak tèt li san kouvri, li dezonore chèf sou tèt li a; paske, se kòmsi se kale li ta kale tèt li.
6
Avredi, si fi a pa kouvri tèt li, ou mèt ta kite l koupe cheve l tou; men, si se yon wont sa ye pou yon fi koupe cheve l oswa kale tèt li, alò, se pou l kouvri tèt li.
7
Paske vrèmanvre, yon gason pa sipoze kouvri tèt li palefèt ke li se pòtre ak glwa Bondye; men, fi a li menm, li se glwa gason an.
8
Paske, gason an pa soti nan fi a; okontrè, se fi a ki soti nan gason an.
9
Nonplis, gason an pa t kreye pou fi a; men fi a pou gason an.
10
Se pou rezon sa a ke fi a dwe gen yon otorite sou tèt li, akòz zanj yo.
11
Malgre sa, pa gen ni gason an san fi a, ni fi a san gason an, nan Senyè a.
12
Paske, menm jan ke fi a soti nan gason an, se konsa tou ke gason an fèt pa mwayen fi a; men, tout bagay soti nan Bondye.
13
Reflechi sou sa pou kò nou non; èske n twouve li konvnab pou fi ap lapriyè Bondye san tèt li pa kouvri?
14
Èske menm lanati li menm pa montre nou ke si yon gason gen cheve long, se yon wont sa ye pou li?
15
Alòske se si yon fi gen cheve long, se yon glwa sa ye pou li; paske, cheve ke yo ba li a vin kòm yon vwal.
16
Men, si yon moun, se diskisyon li vle fè, nou pa gen abitid sa a nou menm, ni legliz Bondye yo nonplis.
17
Alò kounye a, nan sa m ap di nou an, mwen pa fè nou konpliman; paske nou reyini nonpa pou sa k pi bon, men pou sa k pi mal.
18
Paske toudabò, lè nou reyini nan legliz la, m tande ke gen divizyon nan mitan nou; e, mwen kwè anpati ke se vre.
19
Paske, fòk gen move ansèyman nan mitan nou tou, dekwa pou moun sa ki apwouve yo kapab parèt aklè pami nou.
20
Avredi, lè nou reyini ansanm nan yon kote, se pa repa Senyè a nou vin manje;
21
paske pandan repa a, chak moun pran manje pa l anvan yon lòt; lèfini, youn grangou, epi yon lòt sou!
22
Ki bagay sa a! Èske se kay nou pa genyen kote pou nou manje ak bwè? Oswa, èske se legliz Bondye a nou meprize konsa a; epi, se moun ki pa genyen yo nou vle fè wont? Sa pou m ta di nou? Èske se konpliman pou m ta fè nou pou sa? Mwen pa fè nou konpliman!
23
Paske, mwen resevwa nan men Senyè a sa ke m transmèt ban nou an; sèke Senyè Jezi, nan menm jou swa ke yo te trayi L la, Li te pran pen;
24
epi, apre ke Li te rann gras, Li kase moso, lèfini, Li di: Pran, manje! Sa a se kò Mwen ki kase pou nou an. Nou va fè sa an memwa Mwen.
25
Konsa tou, Li pran gode a lè L te fin manje, Li di: Gode sa a se nouvo kontra nan san Mwen. Otan de fwa ke nou bwè Li, nou va fè sa an memwa Mwen.
26
Paske, otan de fwa ke nou manje pen sa a, e ke nou bwè gode sa a, n ap anonse lanmò Senyè a pou jis Li vini.
27
Kidonk, nenpòt moun ki ta va manje pen sa a, e bwè nan gode Senyè a sa a, yon fason ki pa diy, li va koupab annegad kò ak san Senyè a.
28
Men, se pou yon moun egzamine tèt li, e konsa, kite li manje pen an, e bwè nan gode a.
29
Paske, moun sa ki manje e ki bwè yon fason ki pa diy, li manje e bwè madichon sou tèt li, difèt ke l pa bay kò Senyè a valè ke l genyen an.
30
Se sa ki lakòz gen anpil ki fèb e ki malad pami nou, e anpil ki mouri.
31
Paske, si nou ta jije tèt pa nou, yo pa ta dwe jije nou.
32
Men, lè yo jije nou, nou resev wa chatiman nan men Senyè a, dekwa pou nou pa ta kondane ansanm ak lemonn.
33
Kidonk, frè mwen yo, lè nou reyini ansanm pou manje, youn dwe ret tann lòt.
34
E, si nenpòt moun grangou, se pou l manje lakay li, dekwa pou reyinyon nou an pa mennen nou nan kondanasyon. E, pou rès bagay yo, m a regle yo lè m vini.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!