Liv 1 Korentyen
Chapit 13
Klike la pou koute lekti chapit sa1
Atout ke mwen ta pale nan lang lèzòm ak lang zanj yo, si mwen pa gen lanmou nan kè m, mwen vin tankou yon gong k ap fè bwi, oswa yon senbal k ap sonnen.
2
Atout ke m ta gen don pwofetize, e ke m ta konprann tout kalite mistè ak tout sòt konesans; e, atout ke m ta gen tout lafwa, dekwa pou m ta kapab deplase mòn; si mwen pa gen lanmou nan kè m, mwen pa anyen.
3
Atout ke mwen ta fè kado tout byen m pou bay pòv manje, e atout ke mwen ta bay kò m pou yo boule l; si m pa gen lanmou nan kè m, sa pa sèvi m anyen.
4
Lanmou gen pasyans, e li gen bonte; lanmou pa anvye, lanmou pa vante tèt li, li pa gonfle ak lògèy;
5
li pa fè anyen ki malonèt, li pa chèche pwòp enterè pa l, li pa fache fasil, li pa sispèk moun ap fè l mal;
6
li pa rejwi nan enjistis, men li rejwi nan laverite;
7
li padonnen tout bagay, li kwè tout bagay, li gen espwa nan tout bagay, li sipòte tout bagay.
8
Lanmou p ap janm peri; men, kit se pwofesi, yo va peri; kit se lang, yo va sispann; kit se konesans, li va disparèt.
9
Vrèmanvre, sa nou konnen an, se yon pòsyon l ye; e, sa n ap pwofetize a, se yon pòsyon l ye.
10
Men, lè sa ki okonplè a vini, alò, yo va fini ak sa ki te yon pòsyon an.
11
Lè m te timoun, mwen te pale tankou timoun, mwen te reflechi tankou timoun, m te panse tankou timoun; men, lè m vin granmoun, m met bagay timoun yo sou kote.
12
Avredi, kounye a, n ap gade atravè yon glas, li twoub; men apre, se fas a fas n ap ye. Kounye a mwen konnen anpati; men apre, mwen va konnen menm jan ke yo konnen mwen an.
13
Alèkile, lafwa, lesperans, lanmou, se twa bagay sa yo ki rete; men sa k pi gran nan yo a, se lanmou.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!