Liv 1 Korentyen
Chapit 15
Klike la pou koute lekti chapit sa1
An plis de sa, frè yo, m ap deklare ban nou levanjil sa m te preche nou an, li menm tou ke nou te resevwa a; e, Li menm ke nou kanpe fèm sou li a.
2
Se pa mwayen li tou ke nou sove, si nou kenbe sa ke m te preche nou yo nan memwa nou; amwens ke kwè nou te kwè a, se te pou granmesi.
3
Paske, anvan tout bagay, mwen te transmèt ban nou sa ke mwen menm tou mwen te resevwa a: Kijan ke Kris te mouri pou peche nou yo, dapre Ekriti yo;
4
Epi, ke Li te antere, ansuit, Li te resisite sou twazyèm jou a, daprè Ekriti yo;
5
lèfini, ke Sefas te wè Li, epi Douz yo te wè Li.
6
Apre sa, plis pase senksan frè te wè Li denkou; e, pifò ladan yo la toujou jodi a la a; men, kèk nan yo mouri deja.
7
Ansuit, Jak te wè Li; epi, tout apot yo te wè Li.
8
E, an dènye apre yo tout, mwen menm ki tankou yon ti moun ki fèt anvan l tèm, m te wè Li tou.
9
Avredi, se mwen ki pi piti pami apot yo; m pa merite pou yo rele m yon apot, difèt ke m te pèsekite legliz Bondye a.
10
Men, ak gras Bondye, mwen sa m ye a; e, gras Li te genyen anegad mwen an pa t initil; okontrè, m te travay pi di pase yo tout; alò, se pa t mwen menm, men, se gras Bondye ki te avèk mwen an.
11
Kidonk, kit se te mwen menm, kit se te yo menm, se sa nou preche; e, se sa ke ou menm, ou kwè.
12
Kounye a, si n ap preche Kris pou di ke Li resiste pami mò yo, kijan fè gen kèk pami nou k ap di ke pa gen rezireksyon pou moun mouri?
13
Ebyen, si pa gen rezireksyon pou moun mouri; kifè, Kris pa t resisite!
14
E, si Kris pa t resisite, alò, preche n ap preche a pa sèvi anyen; epi, lafwa w genyen an, pa sèvi anyen nonplis.
15
Se vre wi; se fo temwen Bondye nou ta va ye, pa lefèt ke nou sètifye de Bondye ke Li te resisite Kris, alòske Li pa t resisite L vre, si mò pa ka resisite.
16
Se sa l ye: Si moun mouri pa ka resisite, alèkile, Kris pa t resisite.
17
Lèfini, si Kris pa t resisite, lafwa w genyen an pa sèvi anyen; ou anba peche w yo toujou.
18
E alò, moun ki te mouri an Kris yo, yo pèdi.
19
Si se te nan lavi sa a sèlman ke nou te met espwa nou nan Kris, se ta nou ki pi mizerab pami tout moun.
20
Men kounye a la a, Kris resisite pami mò yo; epi, Li vin tounen premye dòn moun ki mouri yo.
21
Paske, puiske se te pa mwayen lòm ke lanmò te rive, se te pa mwayen lòm tou ke rezireksyon pami mò yo te rive.
22
Paske, kòm se nan Adan tout moun mouri, menm jan an tou, se nan Kris tout moun va vin vivan.
23
Men, se va chak moun nan tou pa l; Kris se premye dòn, apre sa, se va sila ki an Kris yo, nan moman retou Li a.
24
Epi apre, se va lafen k ap rive, kote ke L pral remèt wayòm nan bay Bondye Papa a menm, lè ke Li va detwi tout gouvènman, tout otorite, ak tout puisans.
25
Paske, fòk Li reye jouk pou Li mete tout lènmi Li yo anba pye L.
26
Dènye lènmi ki va detwi a, se lanmò.
27
Paske, Bondye mete tout bagay anba pye Kris. Men, lè Li di ke L mete tout bagay anba pye L la, se klè ke se eksepte Li menm, Sila a ki mete tout bagay anba Li a.
28
E, lè tout bagay a va soumèt anba Li a, se lè sa a ke Pitit Gason an tou Li menm va soumèt tèt Li anba Sila ki te mete tout bagay anba L la, dekwa pou Bondye ka tout bagay nan tout moun.
29
Si se pa sa, kisa moun k ap batize poutèt moun ki mouri yo va fè, si mò pa resisite ditou? Alò, pouki y ap batize poutèt mò menm?
30
Lèfini, poukisa nou ret la n ap riske lavi nou tout lajounen konsa a?
31
Mwen pwoteste kont sa, ak glwa sa a ke m genyen poutèt nou, nan Kris Jezi Senyè nou an; avredi, se chak jou m ap mouri.
32
Si se te pou rezon ki gen pou wè ak lèzòm, ke m te goumen ak bèt sovaj nan Efèz, kisa m benefisye la a, si mò pa leve? An nou manje, bwè, paske demen n ap mouri!
33
Pa kite moun twonpe nou tande: move konpayi pouri bon mànyè.
34
Louvri je nou sou bagay ki jis; epi, pa peche; avredi, gen moun pami nou ki pa konn Bondye; e, m ap di sa pou wont nou!
35
Men, gen moun ki pral di: Kijan moun mouri resisite menm? Epi, ki kalite kò yo vin genyen?
36
Egare! Sa w simen an p ap pran eksepte si l mouri.
37
Epi, sa w simen an, se pa kò ki pral vin parèt la ke w simen; men, se grenn, ki petèt se ka ble, oswa kèk lòt grenn semans.
38
Men Bondye ba li yon kò dapre fason ki te fè L plezi a; epi chak semans gen pwòp kò pa l.
39
Tout chè pa menm chè a; men, gen yon kalite chè pou lèzom, gen yon lòt pou bèt, yon lòt pou pwason, e yon lòt pou zwazo.
40
Epitou, gen kò ki selès, e gen kò ki terès. Men, jan kò selès yo klere a se youn, epi, jan kò terès yo klere a se yon lòt.
41
Gen yon klate pou solèy, epi yon lòt klate pou lalin, ansuit yon lòt klate pou zetwal; avredi, yon zetwal diferan de yon lòt zetwal nan jan ke l klere.
42
Se konsa sa ye tou pou rezireksyon mò yo wi. Kò ki simen an pouri, epi li leve nan yon kalite kò ki pa ka pouri.
43
Li simen nan dezonè, men li leve nan laglwa; li simen nan feblès, men li leve nan puisans;
44
li simen tankou yon kò natirèl, li leve tankou yon kò espirityèl.
45
Se konsa sa te ekri a: Premye moun nan, Adan, te vin tounen yon nanm vivan; dènye Adan an te vin tounen yon Espri ki bay lavi.
46
Sepandan, se pa t sa ki espirityèl la ki te anpremye non, men se sa ki natirèl la; se apre sa ke espirityèl la vini.
47
Premye moun nan te sot nan latè, li terès; dezyèm moun nan, se Senyè a ki soti nan syèl.
48
Jan sila ki terès la ye a, se konsa moun ki terès yo ye tou; jan Sila ki selès la ye a, se konsa moun ki selès yo ye tou.
49
E, tankou nou te gen menm pòtre ak sila ki terès la, nou va vin gen menm pòtre ak Sila ki selès la.
50
Kounye a, sa m ap di, frè yo, sèke chè ak san pa kapab eritye wayòm Bondye a; nonplis tou, sa ki ka pouri pa kapab eritye sa k pa ka pouri.
51
Gade! Se yon mistè sa m ap di nou an ye; se pa nou tout k ap mouri, men nou tout ap chanje.
52
Nan yon moman, anvan je n bat, nan dènye kout twonpèt la – avredi, twonpèt la gen pou sonnen – epi, mò yo va leve nan yon eta ki pa ka pouri, epi nou va chanje.
53
Paske, fòk sa ki ka pouri a abiye l nan eta ki pa ka pouri a; e, fòk sa ki ka mouri a abiye l ak imòtalite.
54
Konsa donk, lè sa ki pouri a abiye l nan yon eta ki pa ka pouri; epi, sa ki ka mouri a abiye l ak imòtalite, se lè sa a ke pawòl ki te ekri a va rive: Lanmò neye nan laviktwa!
55
O, lanmò, kote pikan pike w la? O, kavo, kote laviktwa w la?
56
Se peche ki pikan pike lanmò a; e, fòs peche se lalwa.
57
Men, remèsiman pou Bondye ki ban nou laviktwa atravè Senyè nou an, Jezi Kris.
58
Kidonk, frè byeneme m yo, se pou nou fèm, san brannen, pou nou toujou ap vanse nan travay Senyè a; nou konnen ke se pa pou granmesi ke n ap travay pou Senyè a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!