Liv 2 Korentyen
Chapit 1
Klike la pou koute lekti chapit sa1
Pòl, yon apot Jezi Kris, dapre volonte Bondye, e Timote, frè nou, ba legliz Bondye ki Korent lan, ansanm ak tout Sen yo ki nan Akayi yo:
2
Se pou gras avèk ou, epi, lapè ki soti nan Bondye Papa nou an, ak nan Senyè Jezi Kris.
3
Benediksyon pou Bondye, Li menm ki Papa Senyè nou an, Jezi Kris, Papa tout mizerikòd, e Bondye tout konsolasyon;
4
Li menm ki rekonfòte nou nan tout tribilasyon nou yo, dekwa pou nou kapab rekonfòte sila yo ki nan kèlkeswa pwoblèm, avèk rekonfò sa a ke nou menm nou te resevwa nan men Bondye a.
5
Paske, menm jan soufrans Kris yo ap vide an kantite sou nou an, se konsa tou ke konsolasyon nou ap vide an kantite pa mwayen Kris.
6
E, se soufri nou menm, n ap soufri a, ki va pou konsolasyon ak sali nanm ou; sa k ap vin reyalize lè ke w sipòte menm kalite soufrans ke nou menm, nou te soufri yo; oswa ke se ta rekonfò nou menm, nou jwenn, se va pou konsolasyon ak sali nanm ou.
7
E, esperans sa ke nou menm, nou gen anegad ou, li fèm; paske nou konnen ke w pataje nan soufrans yo, se konsa tou ke w va gen pou patisipe nan konsolasyon an.
8
Paske, nou pa ta vle, frè yo, ke w pa okouran de pwoblèm ke nou te fè fas ak yo ann Azi a; ke nou te about nan sa n te ka sipòte, sa te depase mezi fòs kouraj nou, sitèlman ke nou te menm pèdi espwa ke nou t ap soti vivan.
9
Men, te vin gen yon santiman nan nou kòmkwa nou te kondane amò, se te dekwa pou nou pa t met konfyans nan tèt pa nou, men pito, nan Bondye ki resisite mò yo;
10
Li menm ki te delivre nou anba yon si gran danje lanmò; Li menm k ap delivre nou kounye a la a; e, se nan Li menm nou kwè ke Li va kontinye delivre nou toujou.
11
Ou met tèt ansanm avèk nou nan lapriyè ke n ap lapriyè pou ou a, se dekwa pou ke gras sa a ke nou resevwa pa mwayen anpil moun nan, li ka vin yon rezon pou anpil moun bay gras poutèt nou.
12
Avredi, men sa ki fè kè nou kontan: se temwayaj pwòp konsyans nou; difèt ke se ak senplisite e ak kalite senserite ke Bondye bay la, nonpa ak sajès dapre lachè, men pito pa gras Bondye, ke nou te kondui tèt nou nan lemonn, e plis ankò anegad ou menm.
13
Paske, nou pa ekri w ankenn lòt bagay apa de sa ke w ap li, oubyen ke w rekonèt kòm verite; e, mwen vle kwè ke w va kontinye rekonèt yo kòm verite jiska lafen;
14
tankou ke anpati ou rekonèt kòm verite ke nou menm, nou se rezon kè kontan pou ou; e se konsa tou ke w a va rezon kè kontan pou nou menm, nan jou Senyè Jezi a.
15
E, se ak asirans sa a ke mwen te deside pou m vin bò kote w anvan, dekwa pou nou ta ka gen doub benediksyon;
16
konsa, m t ap pase kote w pou m al Masedwàn; epi, kite Masedwàn pou m vin kote w ankò; lèfini, ou ta fè kondui m sou wout pou m al Jide.
17
Lè m te met nan tèt mwen pou m fè sa yo, èske se vaykevay ke m te fè l? Oubyen, bagay ke m deside fè yo, èske se dapre lachè ke m deside fè yo; kòmkwa ta gen ‘wi wi’ ak ‘non non’ nan mwen?
18
Men, menm jan Bondye fidèl la, se konsa tou ke mo ke nou ba w yo pa t wi ak non melanje.
19
Paske, Pitit Gason Bondye a, Jezi Kris, ki te anonse ba ou, pa nou menm: Silven, Timote avèk mwen, se pa t 'wi e non' ke l te ye; paske nan Li menm, se te 'wi' sèlman ki genyen.
20
Vrèmanvre, tout pwomès Bondye yo ki nan Li yo, se 'wi' yo ye; epi, nan Li yo se 'amèn' pou glwa Bondye pa mwayen nou menm.
21
Alèkile, Sila a ki tabli nou menm ansanm avèk ou a nan Kris, lèfini ki ban nou onksyon an, se Bondye.
22
Se Li menm tou ki poze so sou nou; epi, ki bay Lespri a nan kè nou tankou yon avalwa.
23
Plis pase sa, mwen pran Bondye kòm temwen sou nanm mwen, ke se menaje m t ap menaje nou kifè m pa t ko vini Korent;
24
se pa ke nou menm, nou gen otorite sou lafwa w non; men, ke n ap patisipe nan travay la dekwa pou ou ka nan lajwa difèt ke se avèk lafwa ke w kanpe.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!