Liv 2 Korentyen
Chapit 2
Klike la pou koute lekti chapit sa1
Men, mwen te deside sa nan kè m, se pou m pa vin bò kote nou ak lapenn ankò.
2
Paske, si m fè ke nou nan lapenn, kiyès ki pou ta fè kè m kontan, si se pa moun sa ke m te lakòz ki nan lapenn nan?
3
E, se sa menm ke m te ekri nou wi, dekwa pou sa pa rive ke lè m vini se ta lapenn mwen jwenn nan men moun ki pou ta fè m rejwi yo; e, sa ke m asire nan nou tout, sèke kè kontan pa m, se kè kontan pa nou tout.
4
Avredi, se ak anpil doulè ak kè sere, e avèk bon kou dlo nan je ke mwen te ekri nou an; nonpa pou m te fè nou lapenn, men pito, se pou nou te ka konnen kalite lanmou ann abondans sa a ke m gen pou nou an.
5
Si ta gen yon moun ki lakòz gen lapenn, se pa mwen ke l fè gen lapenn nan non; men, se nou menm an pati, pou m pa egzajere di se nou tout.
6
Chatiman ke anpil nan nou te bay nonm sa a ase pou li.
7
Kounye a okontrè, se pou nou padone li pito, konsole li, pou sa pa rive petèt ke yon moun konsa ta vin anvayi ak yon tristès ki twòp pou li.
8
Se sa k fè m ap mande nou pou nou demontre lanmou ke n genyen anegad li.
9
Paske, se pou rezon sa a tou ke m te ekri a, dekwa pou m te ka fè yon tès sou nou, pou m wè si nou obeyisan nan tout bagay.
10
Moun ke nou padone pou kichòy li te fè, mwen padone l tou; vrèmanvre, si m te padone nenpòt sa l te ye a, a moun ke mwen te padone l la, se poutèt nou menm ke mwen padone l, nan Kris.
11
Pou sa pa rive ke Satan ta pran avantaj sou nou menm avè m; paske, se pa konnen nou pa konnen plan li yo.
12
Epi ankò, lè mwen te vin preche levanjil Kris la nan Twowas, e ke te gen yon pòt ki te louvri pou mwen,
13
lespri m pa t poze, difèt ke m pa t twouve Tit, frè m nan la; kidonk, mwen vin ale kite yo, epi m soti la, m ale Masedwàn.
14
Kounye a, remèsiman pou Bondye, Li menm ki toujou pèmèt nou gen laviktwa nan Kris; lèfini, Li itilize nou pou fè lodè konesans Li parèt aklè toupatou.
15
Vrèmanvre, pou Bondye, se yon bon lodè pafen Kris la nou ye, e pami sila ki sove yo, e pami sila ki peri yo;
16
pou yon gwoup nan yo, nou se lodè lanmò pou al nan lanmò; pou yon lòt gwoup, nou se lodè lavi pou al nan lavi;
17
Paske nou menm, nou pa tankou bann moun k ap kowonp Pawòl Bondye a non; okontrè, nou sensè, antan ke moun ki pou Bondye; e se devan Bondye ke n ap pale an Kris.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!