Liv 2 Korentyen
Chapit 4
Klike la pou koute lekti chapit sa1
Konsa donk, difèt ke nou gen ministè sa a dapre mizerikòd ke nou jwenn, se pou sa nou pa dekouraje.
2
Okontrè, nou renonse a tout bagay dezonèt k ap fèt an kachèt yo, nou pa fonksyone nan riz, ni nou pa itilize Pawòl Bondye a pou twonpe moun; men pito, nan fè ke nou fè verite a parèt aklè a, nou rekòmande tèt nou bay konsyans tout moun, devan Bondye.
3
Men, si levanjil nou an kache, se pou moun ki pèdi yo li kache.
4
Se nan yo menm ke dye monn sa a te bouche lespri moun ki pa kwè yo, ansòt pouke sa pa rive ke limyè levanjil gloriye Kris la, Li menm ki se pòtre Bondye, ta klere sou yo.
5
Paske, se pa tèt pa nou ke n ap preche, men se Kris Jezi, Senyè a; epi nou menm, se sèvitè w ke n ye, poutèt Jezi.
6
Paske, Bondye ki te kòmande limyè a pou l klere soti nan fènwa a, Li te klere nan kè nou pou ban nou limyè konesans glwa Bondye a nan figi Jezi Kris.
7
Sepandan, se nan veso an tè ke nou gen trezò sa a nan nou, dekwa pou li klè ke kokenn chenn pouvwa sa a, se pou Bondye l ye, se pa pou nou l ye.
8
Nou pase tray pasi pala, men nou pa an detrès; nou konn nan cho, men san dezespwa;
9
yo pèsekite nou, men nou pa lage pou kò nou; nou tonbe atè, men nou pa peri.
10
Nou toujou pote lanmò Senyè Jezi nan kò nou, dekwa pou ke konsa tou, lavi Jezi kapab parèt aklè nan kò nou.
11
Paske avredi, nou menm k ap viv yo, se toutan y ap livre nou bay lanmò poutèt Jezi, dekwa pou menm jan an tou, lavi Jezi ka parèt aklè nan chè nou ki ka mouri a.
12
Konsa donk, lanmò ap travay nan nou menm, e lavi ap travay nan ou menm.
13
E, kòm se menm lespri lafwa a nou genyen, lespri ki dapre jan sa te ekri a: Mwen kwè, alò, se sa k fè m pale; nou menm tou, nou te kwè, e se poutèt sa n ap pale.
14
Nou konnen ke Sila ki te resisite Senyè Jezi a, va resisite nou tou pa mwayen Jezi; epi, Li va prezante nou ansanm avèk ou.
15
Paske, tout bagay sa yo, se poutèt ou ke y ap fèt, dekwa pou atravè remèsiman anpil moun bay, gras ki vin an kantite a kapab ogmante, pou glwa Bondye.
16
Se poutèt sa nou pa dekouraje; okontrè, lòm ke nou ye sou deyò a ap peri, men lòm ke nou ye sou anndan an ap vin pi nèf, jou apre jou.
17
Vrèmanvre, ti chagren lejè nou sa yo, ki la pou yon ti moman ase, y ap pwodwi pou nou yon glwa ki peze yon pwa depase mezi, pou letènite.
18
Avredi, se pa sou bagay ki vizib yo nou kenbe je nou non, men pito, se sou bagay envizib yo. Paske, bagay ki vizib yo la pou yon tan, alòske bagay ki envizib yo la pou toutan.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!