Liv 2 Korentyen
Chapit 5
Klike la pou koute lekti chapit sa1
Vrèmanvre, nou konnen ke si tant sa nou ret ladan l sou latè a ta va disparèt, nou gen yon konstriksyon Bondye fè, yon kay ki pa fèt ak men lèzòm, ki etènèl nan syèl la.
2
Paske, se jemi n ap jemi nan tant sa a, sitèlman nou anvi abiye nou ak kay ke nou genyen nan syèl la.
3
E, si se konsa nou abiye, yo p ap jwenn nou toutouni.
4
Paske, nou menm ki nan tant sa a, se plenn n ap plenn anba fado yo; se pa ke nou ta vle wete rad sou nou, men pito, pou nou ta abiye, dekwa pou lavi rive vale kondisyon lanmò a nèt.
5
Alèkile, Sila ki pare nou pou bagay sa a menm nan, se Bondye; se Li tou ki ban nou Lespri a kòm avalwa.
6
Kidonk, nou toujou gen konfyans, paske nou konnen ke pandan kay nou se nan kò sa a li ye, alò nou absan de Senyè a.
7
(Vrèmanvre, se dapre lafwa nou mache; se pa dapre sa je nou wè).
8
Mwen di ke nou gen konfyans; e ke volonte nou se pito pou nou absan de kò a, epi prezan ak Senyè a.
9
Se poutèt sa n ap fè efò, de fason ke, kit nou prezan, kit nou absan, nou ka nan kondisyon pou Li aksepte nou.
10
Paske, nou tout va blije konparèt devan tribinal Kris la; dekwa pou chak moun ka resevwa bagay sa ke l fè yo pandan ke l te nan kò li a; ann akò ak sa ke l te fè, kit se te byen, kit se te mal.
11
Alò, kòm nou konn sa krentif pou Senyè a ye, n ap konvenk lèzòm; men, se aklè ke nou parèt devan Bondye; e, nou vle kwè ke nou parèt aklè nan konsyans ou tou.
12
Avredi, se pa rekòmande n ap rekòmande tèt nou ankò ba ou non; okontrè, se okazyon n ap ba ou pou glorifye tèt pa w nan plas pa mwen menm ak lòt yo; dekwa pou w ka gen yon repons pou w bay moun k ap vante tèt yo poutèt bagay ki se aparans yo ye, men ki pa sot nan kè yo vre.
13
Avredi, kit mwen menm ak lòt yo, nou ta fou, se pou Bondye; kit tèt nou ta dwat, se pou byen w.
14
Vrèmanvre, lanmou Kris sentre nou; paske, nou konsidere ke si yon sèl moun te mouri pou tout moun, alò, tout moun te mouri;
15
e, ke Li te mouri pou tout moun, dekwa pou sila k ap viv yo, pa viv pou tèt yo ankò, men pito pou Sila a ki te mouri epi ki te resisite pou yo a.
16
Konsa donk, apati jodi a, nou pa konn ankenn moun dapre lachè ankò; wi, menmsi nou te konn Kris dapre lachè, kounye a, se pa konsa ke n konnen L ankò.
17
Kidonk, si yon moun an Kris, se yon nouvo kreyasyon li vin ye; ansyen bagay yo pase ale; epi gade, tout bagay vin bagay nèf!
18
E, tout bagay, se nan Bondye yo soti; Li menm ki te rekonsilye nou avè L pa mwayen Jezi Kris, epi, ki te ban nou ministè rekonsilyasyon an;
19
ki vle di, ke Bondye te nan Kris, Li t ap rekonsilye lemonn avèk Li menm, Li pa t pote akizasyon kont yo pou vyolasyon yo te komèt yo; lèfini, Li te mete pawòl rekonsilyasyon an nan nou.
20
Kounye a la a atò, se anbasadè pou Kris ke n ye, kòmsi Bondye sèvi ak nou pou egzòte moun; n ap sipliye nou nan non Kris, se pou nou rekonsilye ak Bondye.
21
Paske, Li te fè Sila a ki pa t konn ankenn peche a vin tounen peche poutèt nou, dekwa pou nou te ka vin tounen dwati Bondye nan Li menm.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!