Liv 2 Korentyen
Chapit 6
Klike la pou koute lekti chapit sa1
Konsa donk, kòm se ansanm avèk Li ke n ap travay, nou egzòte w pou w pa resevwa gras Bondye a pou granmesi.
2
(Paske, Li te di: Nan tan ke M te aksepte a Mwen te tande w; epi, nan jou delivrans lan, Mwen te pote w sekou. Gade non, kounye a se tan M aksepte a; gade non, kounye a se jou delivrans lan!)
3
Nou pa fè anyen ki ta ka lakòz ankenn eskandal, dekwa pou moun pa pale mal sou ministè a.
4
Okontrè, nan tout bagay, nou demontre tèt nou antan ke sèvitè Bondye, ak bonjan pasyans, nan soufrans yo, nan afè pa bon yo, nan tèt chaje yo,
5
anba kout fwèt yo, nan prizon yo, nan dezòd yo, nan travay yo, nan vèy yo, nan jèn yo;
6
avèk pwòpte nan lavi nou; avèk konesans nou; avèk pasyans manch long nou; avèk tandrès nou; avèk Lespri Sen an; avèk yon lanmou san ipokrizi;
7
avèk pawòl verite a; avèk puisans Bondye a; avèk koleksyon zam ladwati yo, e nan men dwat, e nan men goch;
8
nan mitan e lonè, e dezonè; kit bon, kit move repitasyon; tankou moun ki sou blòf, alòske ke nou nan laverite;
9
tankou moun yo pa rekonèt, alòske yo konnen nou trèbyen; tankou moun k ap mouri, epi gade non, n ap viv; tankou moun yo bat, men ke yo pa tiye;
10
tankou moun ki nan lapenn, epoutan k ap rejwi toutan; tankou moun ki pòv, epoutan k ap fè anpil moun rich; tankou moun ki pa gen anyen, epoutan ki posede tout bagay.
11
O, nou menm Korentyen yo, mwen menm ak lòt yo, bouch nou louvri pou pale avè w; epi kè nou vin pi laj.
12
Se pa nan kè pa nou ke w ratresi a non, men, se pwòp zantray ou ke w ratresi.
13
Kounye a atò, fè menm jès la, (m ap di sa tankou se ak pitit mwen m ap pale) laji kè w tou non!
14
Pa foure tèt ou nan baboukèt miwo miba ansanm ak enkonvèti; avredi, ki zanmitay ki ka genyen ant ladwati ak òlalwa? Epi, ki kòkòday ki ka genyen ant limyè ak fènwa?
15
E, ki akò ki ka siyen ant Kris ak Belyal? Epi, nan kisa moun ki kwè a ka patisipe ak enfidèl la?
16
Lèfini, ki kontra tanp Bondye a ka genyen ak zidòl? Avredi, se nou ki tanp Bondye vivan an; tankou jan Bondye te di l la: M ap abite nan yo, M ap mache nan mitan yo; M ap Bondye yo, epi, yo va vin pèp Mwen.
17
Se poutèt sa nou dwe soti nan mitan yo, epi, met kò nou apa, Senyè a di; pa manyen bagay ki pa pwòp la, e, M ap resevwa nou,
18
e, M ap yon Papa pou nou, epi, nou va pitit gason M ak pitit fi M, se sa Senyè Toupuisan an di.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!