Liv 2 Korentyen
Chapit 7
Klike la pou koute lekti chapit sa1
Alò, difèt ke nou gen pwomès sa yo, byenneme, an nou pirifye tèt nou anba tout kalite salte ki gen pou wè e ak lachè, e ak lespri; epi, pèfeksyone sanktifikasyon nou nan krentif pou Bondye.
2
Resevwa nou non; nou pa fè pèsonn moun mal, nou pa rinen pèsonn moun, nou pa eksplwate pèsonn moun.
3
Mwen pa di sa pou kondane w non; paske, mwen te deja di ke w nan kè mwen menm ak lòt yo, e pou lavi, e pou lanmò ansanm avè w.
4
E, se ak anpil konfyans ke m pale de ou; e mwen vante tèt mwen anpil de ou; kè mwen plen ak ankourajman; mwen gen yon kè kontan depase mezi nan mitan tray mwen menm ak lòt yo ap pase yo.
5
Paske avredi, depi lè nou te rive Masedwàn lan, kò nou pa gen ankenn repo; okontrè, se toupatou nou te twouble; sou deyò, te gen lit; sou anndan, te gen laperèz.
6
Sepandan Bondye, ki konn konsole malere k ap soufri yo, te pote konsolasyon nan kè nou avèk rive Tit te vin rive a.
7
E, se pa t poutèt vini li te vini an sèlman non, men, se te avèk konsolasyon an ke misye te jwenn anegad ou, lè li te rakonte mwen menm ak lòt yo dezi sensè ki nan kè w, dlo ki te koule nan je w, devouman w anvè mwen; ki vin fè ke mwen rejwi plis toujou.
8
Se sa k fè ke malgre m te lakòz nou te nan lapenn ak lèt ke m te ekri nou an; men, mwen pa regrèt sa; e, si zoka m te regrèt sa palefèt ke m te wè kijan menm lèt sa a te fè nou anpil lapenn, kwake se te pou yon moman.
9
Kounye a la a, se rejwi m ap rejwi; nonpa difèt ke m te fè nou nan lapenn nan, men paske lapenn nou an te mennen nou nan repantans; vrèmanvre, tris nou te tris la, se te pou yon kòz ki dapre Bondye, dekwa pou ke se pa t nan men mwen menm ak lòt yo ke nou ta sibi ankenn domaj.
10
Paske, lapenn ke Bondye lakòz la mennen nan repantans, pou rive nan sali nanm; sa ke moun p ap janm regrèt; alòske, lapenn ke lemonn lakòz la mennen nan lanmò.
11
Avredi, gade menm lapenn sa a ki te pote tristès lakay nou an, pou kòz ki te dapre Bondye a: gade ki kalite dilijans li pwodwi lakay nou; wi, gade kalite jistifikasyon tèt nou; wi, gade kalite endiyasyon; wi, gade kalite krentif; wi, gade kalite dezi sensè; wi, gade kalite devouman; wi, gade kalite chatiman! Nan tout jan, nou te demontre tèt nou inosan nan zafè sa a.
12
Konsa donk, menmsi mwen te ekri nou, mwen pa t fè l ni poutèt moun ki te fè mal la, ni poutèt moun ki te sibi mal la; men, se te pou nou tout te ka wè aklè kijan mwen menm ak lòt yo nou pran swen de ou devan Bondye.
13
Kidonk, mwen menm ak lòt yo te rekonfòte ak ankourajman sa a bò kote w. Se vre wi, sa ki te fè n pi rejwi toujou, se kè kontan ki te lakay Tit la, paske lespri misye te rafrechi gras a nou tout.
14
Vrèmanvre, si m te fè lwanj ba misye sou nenpòt sa l te ye konsènan nou, mwen pa sot wont, difèt menm ke lwanj ke m te fè bay Tit la, se te verite l te ye.
15
Epi, afeksyon li gen anndan kè li pou nou an vin pi plis toujou, lè l sonje obeyisans ki te genyen lakay nou tout, epi, avèk ki kalite krentif ak latranblay nou te resevwa li.
16
Alò, mwen rejwi anpil dèske m ka fè nou konfyans nan tout bagay.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!