Liv 2 Korentyen
Chapit 8
Klike la pou koute lekti chapit sa1
Anplis de sa, frè yo, mwen vle ke nou konnen gras Bondye ke legliz Masedwàn yo te jwi;
2
kijan ke nan mitan yon gwo zeprèv soufrans ke yo t ap viv, abondans lajwa nan kè yo ak mizè depase mezi nan lavi yo a debòde nan kantite sa ke yo bay, kòmkwa yo te de moun ki genyen.
3
Avredi, mwen temwaye sa, yo te bay sa yo kapab, e yo menm pou tèt pa yo, yo te chwazi bay depase sa yo te kapab.
4
Yo sipliye nou, mwen menm ak lòt yo, san rete pou ke nou te resevwa kado a nan men yo, epi pou nou te pran responsablite fè tèt ansanm sa a pou rann Sen yo sèvis.
5
E, yo te fè sa, nonpa jan nou t ap atann nou an, men, yo te bay tèt yo ba Senyè a anpremye; apre sa, ba nou menm, dapre volonte Bondye.
6
Se rezon sa a ki fè ke nou vle ke Tit, menm jan ke l te kòmanse l la, konsa tou pou li fini menm gras sa a avèk ou tou.
7
Konsa donk, kòm ou gen abondans nan tout bagay: nan lafwa, e nan pawòl, e nan konesans, e nan tout kalite devouman, e nan lanmou w pou mwen menm ak lòt yo, fè ansòt pou ou gen abondans nan gras sa a tou.
8
Mwen pa di sa tankou yon lòd, men m pran okazyon dilijans lòt moun, pou m teste senserite lanmou pa nou.
9
Paske, nou konnen gras Senyè nou an, Jezi Kris, kijan ke atout Li te rich, men poutèt nou menm, Li te vin pòv, dekwa pou ke nou menm, atravè pòv Li te vin pòv la, nou te ka rich.
10
Se sa m ap bay kòm konsèy; paske, se pou byen nou li ye; nou menm nan ki te kòmanse l anvan, non sèlman pou nou te fè l, mentou pou nou te voye l depi ane pase anwo.
11
Alò, kounye a, se pou nou egzekite aksyon pou nou fè l la; pou ke menm jan nou te pare pou nou gen volonte a, konsa tou nou va pare pou fini ak zèv la selon sa ke nou genyen.
12
Paske toudabò, depi ke nan lespri yon moun li gen volonte pou bay, sa l ap bay la, yo resevwa l dapre sa moun nan genyen, e nonpa dapre sa l pa posede.
13
Paske, mwen pa vle di ke lòt moun yo vin alèz epi pou nou menm nou vin nan detrès.
14
Men, se pou gen egalite; kounye a la a se pou abondans lakay nou an kapab vin yon sous ki satisfè bezwen yo; lèfini, abondans lakay pa yo a va sèvi yon sous tou pou satifè bezwen pa nou; dekwa pou gen egalite;
15
Tankou ke sa te ekri a: Moun ki te ranmase anpil la pa t gen anyen anplis; e, moun ki te ranmase tikras la pa t manke anyen.
16
Men, ann di Bondye mèsi, Li menm ki mete menm devouman pou sèvi a nan kè Tit pou nou.
17
Avredi, li te aksepte ankourajman an, men dilijans li te tèlman anpil ke se pou kò l ke l te deside al jwenn nou an.
18
Epi, mwen menm ak lòt yo, nou voye frè a avèk li, li menm nan ke y ap fè lwanj pou li a akòz levanjil la pami tout legliz yo.
19
E, se pa sa sèlman, men se li tou ki te moun ke legliz yo te chwazi pou vwayaje ak nou avèk gras sa a ki nan men nou an; yon travay ke n ap fè pou glwa Senyè a menm, e pou deklare bon lide yo ki nan tèt ou a.
20
Se pou evite, ke okenn moun ta va akize nou nan gwo mago sa a ke nou gen pou distribye a.
21
Nou fè sa ki onèt, non sèlman devan Senyè a, men devan lèzòm tou.
22
Kidonk, nou voye frè nou an avèk yo; li menm ki pwouve nou dilijans li nan plizyè bagay, men kounye a, ki pi dilijan toujou poutèt konfyans sa a ke m gen pou nou an.
23
Si ta gen yon moun ki bezwen konn plis sou Tit, misye se patnè m, epi se li k ap ede m nan travay pou ou yo; oubyen ke moun ta vle konn plis konsènan frè nou yo, se mesaje legliz yo ke yo ye, epi se glwa Kris yo ye.
24
Konsa donk, ba yo prèv de lanmou nou pou yo devan legliz yo, montre yo ke mwen menm ak lòt yo gen rezon fè lwanj pou ou konsa a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!