Liv 2 Korentyen
Chapit 13
Klike la pou koute lekti chapit sa1
Sa fè twazyèm fwa ke m ap vin lakay nou. Se dapre deklarasyon ki sot nan bouch de oubyen twa temwen ke tout sa ki gen pou regle, regle.
2
Mwen te deja avèti nou, e m ap di nou davans, tankou m te fè lè m te lakay nou dezyèm fwa a; kounye a ke m pa la a, m ap ekri pou m di moun ki te peche anvan sa yo, ansanm ak tout lòt moun, ke si m vini ankò, mwen p ap menaje pèsonn;
3
kòm n ap chèche yon prèv ke Kris ap pale nan mwen; Li menm ki pa fèb anegad nou, men pito, ki puisan nan nou an;
4
vrèmanvre, atout se atravè feblès ke yo te krisifye Li; men, L ap viv pa mwayen puisans Bondye. Paske mwen menm ak lòt yo, nou fèb nan Li tou, men, nou vivan avè L pa mwayen puisans Bondye anegad ou menm.
5
Egzamine tèt nou, pou n gade èske nou nan lafwa; teste pwòp tèt nou. Èske nou pa rekonèt poukont nou kijan ke Jezi Kris anndan nou; amwenske se moun ke yo rejte nou ye.
6
Men, mwen kwè ke nou va rekonèt ke mwen menm ak lòt yo, nou pa moun ki rejte.
7
Alèkile, m ap lapriyè Bondye pou ke w pa fè anyen ki mal; se pa pou ke mwen menm ak lòt yo ta parèt tankou moun ki apwouve non, men pito, pou ke w fè sa ki onèt, menmsi mwen menm ak lòt yo ta vin tankou moun ki rejte.
8
Avredi, mwen menm ak lòt yo, nou pa ka fè anyen kont verite a; men, pou verite a.
9
Paske, nou kontan lè nou fèb; epi, ou menm ou fò; e, sa ke mwen menm ak lòt yo swete a menm, se pou w rive nan pèfeksyon.
10
Se poutèt sa m ap ekri bagay sa yo pandan m pa la a, pou sa pa rive ke lè m prezan, mwen ta blije tchak ak nou, dapre pouvwa ke Senyè a ban mwen pou m edifye, e nonpa pou m detwi.
11
Anfen, frè yo, orevwa. Se pou nou okonplè, se pou nou byen konfòtab, se pou nou mete nou dakò, viv nan lapè; epi Bondye lanmou ak lapè a va avèk nou.
12
Youn va salye lòt ak yon bo ki sen,
13
Tout Sen yo voye salye nou.
14
Se pou gras Senyè Jezi Kris, ak lanmou Bondye, ak kominyon Lespri Sen an avèk nou tout. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!