Liv Galat
Chapit 1
Klike la pou koute lekti chapit sa1
Pòl, yon apot, (nonpa dapre lèzom, nonplis gras a lòm; men, pa mwayen Jezi Kris ak Bondye Papa a, ki te resisite Li pami mò yo);
2
avèk tout frè ki ak mwen yo, a legliz yo ki nan Galasi.
3
Se pou gras la avèk nou ansanm ak lapè ki soti kote Bondye Papa a e kote Senyè nou an Jezi Kris,
4
ki te bay tèt Li pou peche nou yo, dekwa pou Li te ka delivre nou anba monn kowonpi kounye a, dapre volonte Bondye e Papa nou an;
5
Se pou Li laglwa ye pou letan e letènite. Amèn.
6
Mwen sezi wè ke bonè konsa nou gentan kite sila ki te rele nou nan gras Kris la pou n al nan yon lòt levanjil,
7
ki pa yon lòt vre, men gen kèk moun k ap vire lòlòj nou, e ki vle pèvèti levanjil Kris la.
8
Poutan, menm si mwen menm ak lòt yo, oswa yon zanj ki sot nan syèl ta preche yon lòt levanjil ban nou, apa de sa nou te anonse ban nou an, se pou li anatèm!
9
Tankou nou te deja di, n ap repete kounye a ankò, si nenpòt moun preche nenpòt ki lòt levanjil ban nou apa de sa nou te resevwa a, se pou l anatèm!
10
Paske kounye a, èske se favè nan men lèzòm mwen vle, oswa nan men Bondye? Oubyen èske m ap chèche fè lèzòm plezi? Paske si jiskisi se ta lèzòm m ap chèche fè plezi, ebyen mwen pa ta dwe yon sèvitè Kris non!
11
Men, mwen sètifye nou, frè yo, ke levanjil ki te anonse pa mwen menm nan, se pa dapre moun li ye.
12
Paske, se pa nan men moun mwen te resevwa l, ni se pa aprann ke m te aprann li, men, se te pa mwayen revelasyon Jezi Kris te ban mwen an.
13
Anfèt, nou te tande pale de konpòtman mwen, te gen kèk tan de sa, nan relijyon Jwif la; kijan ke m te pèsekite legliz Bondye a depase limit, e ke m te ravaje li;
14
epi, kijan tou ke nan relijyon Jwif la mwen te devanse moun laj mwen nan pwòp nasyon m, difèt ke mwen te gen yon mache prese san mezi pou tradisyon zansèt mwen yo.
15
Men, lè sa te fè Bondye plezi, Li menm ki te mete m apa depi nan vant manman m, e ki te rele m pa gras Li,
16
pou revele Pitit Gason Li a nan mwen, pouke mwen preche Li pami Payen yo; e lè sa a mwen pa t konsilte ni chè, ni san.
17
Nonplis tou, mwen pa t ale Jerizalèm bò kote sila yo ki te apot anvan mwen yo; men, mwen te al ann Arabi; apre sa, mwen te retounen ankò nan Damas.
18
Ansuit, apre twa zan, mwen te monte Jerizalèm pou m wè Pyè, e mwen te pase kenz jou avèk li.
19
Men pa gen okenn nan lòt apot yo ke m te wè, eksepte Jak, frè Senyè a.
20
Alèkile, bagay sa ke m ap ekri nou yo, gade non, devan Bondye, mwen pa bay manti.
21
Apre sa, mwen te vini nan zòn Siri ak Silisi yo;
22
e, mwen pa t yon moun yo te rekonèt figi l nan legliz nan Jide ki te nan Kris yo.
23
Men, sa yo te tande sèlman sèke sila ki te konn pèsikite nou nan tan pase yo, kounye a, twouve misye ap preche lafwa ke li t ap detwi a.
24
Konsa, yo te bay Bondye glwa poutèt mwen.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!