Liv Galat
Chapit 2
Klike la pou koute lekti chapit sa1
Apre sa, katòzan apre, mwen te monte yon lòt fwa Jerizalèm ak Banabas, e mwen te pran Tit avèk mwen tou.
2
E, mwen te monte dapre yon revelasyon, e mwen te kominike ba yo levanjil ke m preche pami Payen yo, men, an prive bay moun pami yo ki te gen gwo repitasyon yo, dekwa pou sa pa ta rive ke m ta va kouri, oswa ke m te kouri pou granmesi.
3
E konsa, menm Tit ki te avèk mwen, e ki se yon Grèk, yo pa t fòse misye sikonsi nonplis.
4
Sa te rive akòz fo frè yo ki te fofile kò yo antre, ki te vin an sekrè pou fè espyon sou libète a ke nou genyen an nan Kris Jezi, dekwa pou yo te ka mete n nan esklavaj.
5
Nou pa soumèt devan yo, non; menm pa pou yon tan, dekwa pou ke verite levanjil la ka kontinye avèk nou.
6
Men sila ke yo te pi konsidere yo (nenpòt sa yo te ye a, sa pa enterese m, paske Bondye pa gade sou figi moun) sila ki te gen plis konsiderasyon yo pa t ajoute anyen ban mwen.
7
Men okontrè, lè yo wè ke levanjil ensikonsizyon an se ban mwen ke li te konfye, tankou ke levanjil sikonsizyon an te konfye bay Pyè,
8
paske, Sila ki te travay ak bon rezilta nan Pyè pou li apot sikonsizyon an, se Li menm tou ki te travay nan mwen ak fòs pou Payen yo.
9
E lè Jak, Pyè ,ak Jan, yo menm ki parètil te poto mitan yo, lè yo santi gras ke m te genyen an, yo bay mwen menm ak Banabas lanmen antan ke patnè; pou ke n al bò kote Payen yo, epi yo menm, bò kote sikonsi yo.
10
Sa sèlman yo te mande, se pou n te sonje pòv yo, ki se menm sa mwen te gen dezi pou m te fè.
11
Men, lè Pyè te vin Antyòch, mwen te fè l opozisyon nan figi l, paske li te merite blame.
12
Vrèmanvre, anvan kèk mesye ki te sot bò kote Jak yo te vini an, misye te chita manje ak Payen yo; men lè yo te vin rive a, li te fè bak, misye te separe tèt li, difèt ke li te pè sila yo ki te moun sikonsizyon yo.
13
Epi lòt Jwif yo te demake menm jan avèk li tou, ansòt ke menm Banabas te trennen nan zak ipokrit yo a.
14
Alò, lè mwen wè ke yo pa t ap mache dwat dapre verite levanjil la, mwen di Pyè devan yo tout: Si ou menm ki Jwif, w ap viv tankou Payen e nonpa tankou Jwif yo viv; poukisa w ap fòse Payen yo viv tankou Jwif la?
15
Nou menm ki fèt Jwif, e ki pa pechè nan pami Payen yo,
16
difèt ke nou konnen ke yon moun pa jistifye pa mwayen zèv lalwa, men gras a lafwa nan Jezi Kris, menm nou menm, nou te kwè nan Kris, dekwa pou nou ka jistifye nan Kris, e nonpa pa mwayen zèv lalwa, paske: Pa gen okenn chè k ap jistifye pa mwayen zèv lalwa.
17
Men, si pandan n ap chèche pou nou jistifye pa mwayen Kris, e ke nou menm tou, yo vin jwenn ke nou se pechè; èske Kris se minis peche poutèt sa? Mande Bondye padon, non!
18
Paske, si mwen rebati bagay ke m te fin detwi yo, mwen fè tèt mwen tounen yon rebèl.
19
Paske, se atravè lalwa ke m mouri parapò a lalwa, dekwa pou m ka viv pou Bondye.
20
Mwen te krisifye avèk Kris; poutan m ap viv; epoutan se pa mwen, men se Kris k ap viv nan mwen; e lavi sa a ke kounye a m ap viv nan lachè a, m ap viv li pa mwayen lafwa nan Pitit Gason Bondye a, ki te renmen mwen, e ki te bay tèt Li pou mwen.
21
Mwen pa met gras Bondye sou kote; paske, si lajistis vini pa mwayen lalwa, alò se pou granmesi Kris mouri.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!