Liv Galat
Chapit 4
Klike la pou koute lekti chapit sa1
Sa m vle di sèke, toutotan ke eritye a se yon timoun li ye, li pa gen okenn diferans ak yon sèvitè, menm si se li ki mèt tout bagay.
2
Men, li anba antrenè ak gouvènè pou jis rive nan lè ke papa li te fikse a.
3
Se menm jan pou nou tou; lè nou te timoun, nou te nan esklavaj anba bagay elemantè nan monn lan,
4
men, lè akonplisman tan an vin rive, Bondye voye Pitit Gason Li a vini, ki te fèt pa mwayen yon fanm, ki te fèt sou lalwa,
5
pouke Li rachte moun sa yo ki te anba lalwa a, dekwa pou nou te ka resevwa adopsyon kòm pitit.
6
E difèt ke se pitit nou ye, Bondye voye Lespri Pitit Gason Li an vin antre nan kè nou, pou rele ‘Abba’ O Papa!
7
Konsa donk, nou pa yon sèvitè ankò, men, yon pitit; e, si nou se yon pitit, alò, nou se yon eritye gras a Kris.
8
Men, anvan sa, lè nou pa t konn Bondye, nou t ap sèvi sa ki natirèlman pa t bondye vre;
9
men, kounye a, apre ke nou te fin konnen Bondye, oubyen pito, ke nou te vin moun ke Bondye konnen, kijan fè nou tounen nan bagay fèb e pòv sa yo, kòmsi nou vle vin anba esklavaj ankò?
10
N ap obsève jou, ak mwa, tan, ak ane.
11
Mwen pè pou nou, pou sa pa ta rive ke mwen te redi travay avè nou pou granmesi.
12
Frè yo, mwen sipliye nou, se pou nou tankou m ye a, paske, mwen tankou nou ye a; nou pa fè m anyen ki mal.
13
Nou konnen kijan ke se akòz yon enfimite nan lachè ke m te preche levanjil la ban nou premye fwa a.
14
E, eprèv sa a ki te nan kò m nan, nou pa t ni meprize l, ni rejte l; men, nou te resevwa m tankou yon zanj Bondye; menm tankou Jezi Kris.
15
Alò, kote benediksyon nou te pale de li a? Paske m ap temwaye sa sou nou, ke si l te posib, nou t ap rache pwòp je pa nou pou nou te ban mwen yo.
16
Èske m vin tounen lènmi nou, paske m ap di nou laverite?
17
Moun sa yo gen devouman pou nou, men se pa pou yon byen; sa yo vle se pou separe nou avèk mwen; pou nou ka devwe pou yo.
18
Men, sa ki byen se pou nou devwe pou bon bagay tout tan, e pa sèlman lè mwen la avè nou.
19
Ti pitit mwen yo, nou menm ke m gen tranche ankò pou yo a, jiskaske Kris fin pran fòm nan nou an;
20
mwen ta vle pou m ta avèk nou kounye a, epi pou m ta chanje mesaj, paske, mwen gen dout sou jan nou ye.
21
Di m non, nou menm sa yo ki vle antre anba lalwa a, èske nou pa tande sa lalwa di?
22
Paske sa ki ekri, sèke Abraram te gen de pitit gason, youn ak fanm esklav la, e lòt la ak fanm lib la;
23
men, sila ki te fèt ak fanm esklav la, li te fèt dapre lachè; alòske sila ki te fèt ak fanm lib la, dapre pwomès la.
24
Bagay sa yo se tankou yon senbòl yo ye, paske se de testaman yo ke yo reprezante; youn ki soti nan Mòn Sinayi; e ki bay nesans a esklavaj, se Aga.
25
Paske Aga sa a, se Mòn Sinayi ki ann Arabi a, e, li koresponn a Jerizalèm ki la kounye a, ki nan esklavaj avèk pitit li yo.
26
Men, Jerizalèm ki anwo a, li lib; se li ki manman nou tout.
27
Paske, sa te ekri: Rejwi, ou menm ki esteril, ki pa ka fè pitit! Pete rele, kriye, ou menm ki pa gen tranche! Paske, sila ki te abandone a, gen plis pitit, pase sila ki te gen mari a!
28
Alò, nou menm, frè yo, tankou Izarak te ye, nou se pitit pwomès la.
29
Men, menm jan lè sa a, ke sila ki te fèt dapre lachè a te pèsekite sila ki fèt dapre Lespri a, se menm jan sa ye kounye a.
30
Sepandan, kisa Lekriti di? Voye fanm lan ak pitit gason l lan ale; paske, pitit gason fanm eklav la p ap ka eritye avèk pitit gason fanm lib la.
31
Konsa donk, frè yo, nou pa pitit fanm esklav la; men, fanm lib la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!